ನವದೆಹಲಿ: ಭಾನುವಾರ ಗುಜರಾತಿನ ಸೂರತ್ ನಲ್ಲಿ ಆಮ್ ಆದ್ಮಿ ಪಕ್ಷ ನಡೆಸಲಿರುವ ರ್ಯಾಲಿಗೆ ಭಾರತೀಯ ಜನತಾ ಪಕ್ಷದ ಕಾರ್ಯಕರ್ತರು ಅಡ್ಡಿಪಡಿಸಲಿದ್ದಾರೆ ಎಂಬ ವರದಿಗಳ ನಡುವೆ ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಬುಧವಾರ ಆತಂಕ ವ್ಯಕ್ತಪಡಿಸಿದ್ದಾರೆ. 

"ಸೂರತ್ ಸಭೆಗೆ ಬಿಜೆಪಿ ಅಡ್ಡಿ? ಇದು ಪ್ರಜಾಪ್ರಭುತ್ವಕ್ಕೆ ಧಕ್ಕೆ. ಬಿಜೆಪಿ ಇದನ್ನು ಮಾಡಬಾರದು. ಜನರಿಗೆ ತಮ್ಮ ತೊಂದರೆಗಳನ್ನು ತೋಡಿಕೊಳ್ಳಲಾದರೂ ಅವಕಾಶ ನೀಡಿ" ಎಂದು ಪತ್ರಿಕಾ ವರದಿಯನ್ನು ಉಲ್ಲೇಖಿಸಿ ಟ್ವೀಟ್ ಮಾಡಿದ್ದಾರೆ. ಗುಜರಾತಿನಲ್ಲಿ ನಡೆಯಲಿರುವ ಆಮ್ ಆದ್ಮಿ ಪಕ್ಷದ ರಾಷ್ಟ್ರೀಯ ಸಮಾವೇಶದ ಸಭೆಗೆ ಬಿಜೆಪಿ ಅಡ್ಡಿಪಡಿಸಲಿದೆ ಎಂದು ಪತ್ರಿಕೆ ವರದಿ ಮಾಡಿತ್ತು. 

ಕೇಜ್ರಿವಾಲ್ ಶುಕ್ರವಾರ ಗುಜರಾತಿನ ಎರಡು ದಿನದ ಪ್ರವಾಸಕ್ಕೆ ತೆರಳಲಿದ್ದಾರೆ. ಶುಕ್ರವಾರ ಸಂಜೆ ಅಹಮದಾಬಾದಿಗೆ ತೆರಳಲಿರುವ ಅವರು ಭಾನುವಾರ ಸೂರತ್ ಗೆ ತೆರಳಲಿದ್ದಾರೆ. 

ಅಹಮದಾಬಾದಿನಲ್ಲಿ ಅವರು ಹಲವು ಸಂಘಟನೆಗಳ ಮತ್ತು ಅಭಿಯಾನಗಳ ಕಾರ್ಯಕರ್ತರೊಂದಿಗೆ ಮಾತುಕತೆ ನಡೆಸಲಿದ್ದಾರೆ.