ಪಣಜಿ: ಮುಂದಿನ ಗೋವಾ ವಿಧಾನಸಭಾ ಚುನಾವಣೆಗಳಲ್ಲಿ ಶಿವಸೇನೆ 20 ಕ್ಷೇತ್ರಗಳಲ್ಲಿ ಸ್ಪರ್ಧಿಸುವ ಸಾಧ್ಯತೆ ಇದೆ ಎಂದು ಪಕ್ಷದ ಸಂಸದ ಹೇಳಿದ್ದಾರೆ. ಆರ್ ಎಸ್ ಎಸ್ ನಿಂದ ಬಂಡಾಯ ಎದ್ದಿರುವ ಸದಸ್ಯರು ಶೀಘ್ರದಲ್ಲೇ ಸ್ಥಾಪಿಸಲಿರುವ ಪಕ್ಷದ ಜೊತೆಗೆ ಮೈತ್ರಿ ಮಾಡಿಕೊಂಡು ಈ ಚುನಾವಣೆಯಲ್ಲಿ ಶಿವಸೇನೆ ಸ್ಪರ್ಧಿಸಲಿದೆ ಎಂದು ಅವರು ಶನಿವಾರ ಹೇಳಿದ್ದಾರೆ. 

ಪಣಜಿಯಲ್ಲಿ ಪತ್ರಿಕಾಗೋಷ್ಠಿ ನಡೆಸಿದ ಸಂಜಯ್ ರಾವುತ್, ಬಿಜೆಪಿ ವಿರುದ್ಧ ಈ ನೂತನ ಪಕ್ಷದ ಮೈತ್ರಿಯೊಂದಿಗೆ ಇಲ್ಲಿ ಸೆಣೆಸಿದರೂ, ಮಹಾರಾಷ್ಟ್ರದ ಬಿಜೆಪಿ-ಶಿವಸೇನಾ ಮೈತ್ರಿಗೆ ಯಾವುದೇ ಧಕ್ಕೆ ಇಲ್ಲ ಎಂದಿದ್ದಾರೆ. 

"ನಾವು ಸುಮಾರು 20 ಕ್ಷೇತ್ರಗಳಲ್ಲಿ ಸೆಣಸುವ ಸಾಧ್ಯತೆ ಇದೆ ಮತ್ತು ಸುಭಾಷ್ ವೆಲಿಂಗ್ಕರ್ ಪಕ್ಷದ ಜೊತೆ ಶೀಘ್ರದಲ್ಲೇ ಮೈತ್ರಿ ಅಂತಿಮಗೊಳಿಸಲಿದ್ದೇವೆ" ಎಂದು ರಾವುತ್ ಹೇಳಿದ್ದಾರೆ. 

ಗೋವಾದಲ್ಲಿ ಆರ್ ಎಸ್ ಎಸ್ ಬಂಡಾಯಕೋರರ ದಳವನ್ನು ಮುನ್ನಡೆಸುತ್ತಿರುವ ವೆಲಿಂಗ್ಕರ್ ಸೋಮವಾರ ನೂತನ ಪಕ್ಷವೊಂದನ್ನು ಘೋಷಿಸಲಿದ್ದು, ಬಿಜೆಪಿ ವಿರುದ್ಧ ಸೆಣೆಸಲಿದ್ದಾರೆ ಎಂದು ತಿಳಿದುಬಂದಿದೆ.