ನವದೆಹಲಿ: ವಿಶ್ವಸಂಸ್ಥೆಯ ಪರಮಾಣು ಪೂರೈಕೆದಾರ ಸಮೂಹ(ಎನ್ಎಸ್ ಜಿ) ಸಭೆ ಮುಂದಿನ ತಿಂಗಳು ನಡೆಯಲಿದ್ದು, ಭಾರತದ ಎನ್ಎಸ್ ಜಿ ಸದಸ್ಯತ್ವಕ್ಕೆ ಸಂಬಂಧಿಸಿದಂತೆ ಮಹತ್ವದ ಬೆಳವಣಿಗೆ ನಡೆಯುವ ಸಾಧ್ಯತೆ ಕ್ಷೀಣವಾಗಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. 

ಕಳೆದ ವರ್ಷದ ಮೇ ತಿಂಗಳಲ್ಲಿ ಭಾರತ ಎನ್ಎಸ್ ಜಿ ಸದಸ್ಯತ್ವಕ್ಕೆ ಅರ್ಜಿ ಸಲ್ಲಿಸಿತ್ತು. ಆ ನಂತರ ನಡೆದ ಎನ್ಎಸ್ ಜಿ ಸಭೆಯಲ್ಲಿ ಭಾರತಕ್ಕೆ ಸದಸ್ಯತ್ವ ನೀಡುವುದಕ್ಕೆ ಚೀನಾ ವಿರೋಧ ವ್ಯಕ್ತಪಡಿಸಿತ್ತು. ಅಮೆರಿಕ, ಫ್ರಾನ್ಸ್, ಬ್ರಿಟನ್, ರಷ್ಯಾ ಸೇರಿದಂತೆ ಅನೇಕ ರಾಷ್ಟ್ರಗಳು ಭಾರತದ ಸೇರ್ಪಡೆಗೆ ಬೆಂಬಲ ನೀಡಿದ್ದವಾದರೂ ಚೀನಾದ ಅಡ್ಡಗಾಲಿನಿಂದ ಭಾರತಕ್ಕೆ ಸದಸ್ಯತ್ವ ಕೈತಪ್ಪಿತ್ತು. ಈ ಬಾರಿಯೂ ಚೀನಾ ಭಾರತದ ಸದಸ್ಯತ್ವಕ್ಕೆ ಅಡ್ಡಗಾಲು ಹಾಕಲಿದೆ ಎಂದಿ ವಿಶ್ಲೇಷಿಸಲಾಗುತ್ತಿದೆ.  

ಎನ್ ಪಿಟಿಗೆ ಸಹಿ ಹಾಕದ ರಾಷ್ಟ್ರಗಳಿಗೆ ಎನ್ಎ ಜಿ ಸದಸ್ಯತ್ವ ನೀಡಬಾರದು ಎಂದು ಚೀನಾ ಎನ್ಎಸ್ ಜಿ ಮಂಡಳಿ ಸಭೆಯಲ್ಲಿ ಒತ್ತಡ ಹೇರುತ್ತಿದ್ದು, ಭಾರತದ ಸದಸ್ಯತ್ವ ವಿರೋಧಿಸುತ್ತಿರುವುದಕ್ಕೂ ಸಹ ಇದೇ ಕಾರಣ ನೀಡಿದೆ.  ಸ್ವಿಸ್ ರಾಜಧಾನಿ ಬರ್ನ್ ನಲ್ಲಿ ಮುಂದಿನ ತಿಂಗಳು ಎನ್ಎಸ್ ಜಿ ಸಭೆ ನಡೆಯಲಿದ್ದು ಮತ್ತೊಮ್ಮೆ ಭಾರತದ ಸದಸ್ಯತ್ವದ ಬಗ್ಗೆ ಚರ್ಚೆ ನಡೆಯಲಿದೆ. ಆದರೆ ಯಥಾಸ್ಥಿತಿ ಮುಂದುವರೆಯಲಿದ್ದು ಈ ಸಭೆಯಲ್ಲೂ ಭಾರತದ ಸದಸ್ಯತ್ವ ಸಿಗುವ ಸಾಧ್ಯತೆ ಕ್ಷೀಣವಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.