ವಾಷಿಂಗ್ಟನ್: ಭಾರತದ ಪ್ರಧಾನಿ ನರೇಂದ್ರ ಮೋದಿ ಫೇಸ್ಬುಕ್ ಪ್ರಧಾನ ಕಾರ್ಯಾಲಯವನ್ನು ಸಂದರ್ಶಿಸಲಿದ್ದಾರೆ ಎಂದು ಫೇಸ್ಬುಕ್ ಸಂಸ್ಥಾಪಕ ಮಾರ್ಕ್ ಜೂಕರ್ಬರ್ಗ್ ಹಾಕಿದ ಫೇಸ್ಬುಕ್ ಪೋಸ್ಟ್ಗೆ ಸಿಕ್ಕಾಪಟ್ಟೆ ಕಾಮೆಂಟುಗಳು ಬರತೊಡಗಿವೆ. ಜೂಕರ್ ಬರ್ಗ್ನ ಪೋಸ್ಟ್ಗಳಿಗೆ ಕಾಮೆಂಟ್ಗಳ ಸುರಿಮಳೆ ಬೀಳುವುದು ವಿಶೇಷವೇನೂ ಅಲ್ಲ ಆಗಿದ್ದರೂ ಈ ಪೋಸ್ಟಿಗೆ ಬರುವ ಕಾಮೆಂಟ್ಗಳು ಆಸಕ್ತಿದಾಯಕವಾಗಿವೆ.
ಈ ಮಾಸಾಂತ್ಯದಲ್ಲಿ ಅಂದರೆ ಸೆಪ್ಟೆಂಬರ್ 27ರಂದು ಮೋದಿ ಫೇಸ್ಬುಕ್ ಪ್ರಧಾನ ಕಾರ್ಯಾಲಯವನ್ನು ಸಂದರ್ಶಿಸಲಿದ್ದಾರೆ. ಮೋದಿ ಮತ್ತು ನಾನು ಸಾಮಾಜಿಕ ಮತ್ತು ಆರ್ಥಿಕ ಸವಾಲುಗಳನ್ನು ಎದುರಿಸಲು ಸಾಮಾಜಿಕ ತಾಣಗಳು ಹೇಗೆ ಸಹಾಯ ಮಾಡಬಲ್ಲುದು ಎಂಬುದರ ಬಗ್ಗೆ ಚರ್ಚಿಸಲಿದ್ದೇವೆ. ನೀವೂ ಈ ಪೋಸ್ಟಿಗೆ ಕಾಮೆಂಟ್ ಹಾಕುವ ಮೂಲಕ ನಿಮ್ಮ ಪ್ರಶ್ನೆಯನ್ನು ಕೇಳಬಹುದು. ಮೋದಿ ಜತೆಗಿನ ಭೇಟಿಯ ಲೈವ್ ವಿಡಿಯೋವನ್ನು ನಾನು ಇದೇ ಪೇಜ್ನಲ್ಲಿ ಶೇರ್ ಮಾಡಲಿದ್ದೇನೆ ಎಂದು ಜೂಕರ್ಬರ್ಗ್ ಸ್ಟೇಟಸ್ ಅಪ್ಡೇಟ್ ಮಾಡಿದ್ದರು.