ಸಿಂಗಾಪುರ: ಯುಎಸ್ಎಸ್ ಫಿಟ್ಜ್ ಗರಾಲ್ಡ್  ಬಳಿಕ ಅಮೆರಿಕದ ಮತ್ತೊಂದು ಯುದ್ಧ ನೌಕೆ ಅಪಘಾತಗೀಡಾಗಿದ್ದು, ಸಿಂಗಾಪುರದಲ್ಲಿ ಯುಎಸ್ಎಸ್ ಜಾನ್ ಎಸ್ ಮೆಕೇನ್ ನೌಕೆ ಆಯಿಲ್ ಟ್ಯಾಂಕರ್ ಗೆ ಢಿಕ್ಕಿ ಹೊಡೆದಿದೆ ಎಂದು ತಿಳಿದುಬಂದಿದೆ.

ಪರಿಣಾಮ ಅಮೆರಿಕದ ಯುದ್ಧ ನೌಕೆಯಲ್ಲಿದ್ದ 10 ಮಂದಿ ನಾವಿಕರು ನಾಪತ್ತೆಯಾಗಿದ್ದು, 5 ನಾವಿಕರಿಗೆ ಗಂಭೀರ ಗಾಯಗಳಾಗಿವೆ ಎಂದು ತಿಳಿದುಬಂದಿದೆ.  ಸಿಂಗಾಪುರ ಬಂದರಿನಿಂದ ಕೂಗಳತೆ ದೂರದಲ್ಲೇ ಈ ದುರಂತ  ಸಂಭವಿಸಿದ್ದು, ಸೋಮವಾರ ಮುಂಜಾನೆ ಯುಎಸ್ಎಸ್ ಜಾನ್ ಎಸ್ ಮೆಕೇನ್ ನೌಕೆಗೆ ಲೈಬಿರಿಯಾ ಧ್ವಜ ಹೊಂದಿದ್ದ ಆಯಿಲ್ ಟ್ಯಾಂಕರ್ ಢಿಕ್ಕಿ ಹೊಡೆದಿದೆ ಎಂದು ತಿಳಿದುಬಂದಿದೆ. ಪ್ರಸ್ತುತ ವಿಚಾರ ತಿಳಿಯುತ್ತಿದ್ದಂತೆಯೇ  ಸಿಂಗಾಪುರ ನೌಕಾದಳದ ಸಿಬ್ಬಂದಿ ಕಾರ್ಯಾಚರಣೆಗೆ ಇಳಿದಿದ್ದು, ನಾಪತ್ತೆಯಾಗಿರುವ ನಾವಿಕರ ಹುಡುಕಾಟಕ್ಕೆ ಕಾರ್ಯಾಚರಣೆ ಆರಂಭಿಸಿದ್ದಾರೆ.

ಇನ್ನು ಗಾಯಾಳು ನಾವಿಕರಿಗೆ ಸಿಂಗಾಪುರ ಬಂದರಿನಲ್ಲಿರುವ ಆಸ್ಪತ್ರೆ ಚಿಕಿತ್ಸೆ ಕೊಡಿಸಲಾಗುತ್ತಿದೆ. ಇನ್ನು ಅಮೆರಿಕ ನೌಕಾದಳಕ್ಕೂ ಕೂಡ ವಿಚಾರ ಮುಟ್ಟಿಸಲಾಗಿದ್ದು, ಅಮೆರಿಕದ ನೌಕಾಪಡೆಯ ವಿಶೇಷ ಹೆಲಿಕಾಪ್ಟರ್ ಸೀ ಹಾಕ್  ಮತ್ತು ಇತರೆ ಶೋಧ ಕಾರ್ಯಾಚರಣೆಗೆ ಬಳಸಲಾಗುವ ನೌಕೆಗಳನ್ನು ಸಿಂಗಾಪುರಕ್ಕೆ ರವಾನಿಸಲಾಗುತ್ತಿದೆ. ನಾಪತ್ತೆಯಾಗದಿರುವ ನಾವಿಕರ ಹುಡುಕಾಟ ಭರದಿಂದ ಸಾಗಿದೆ ಎಂದು ಸಿಂಗಾಪುರ ನೌಕಾದಳದ ಅಧಿಕಾರಿಗಳು  ತಿಳಿಸಿದ್ದಾರೆ.

ಕೇವಲ 2 ತಿಂಗಳ ಅವಧಿಯಲ್ಲಿ ಅಮೆರಿಕದ ಎರಡು ಯುದ್ಧ ನೌಕೆಗಳು ಅಪಘಾತಕ್ಕೀಡಾಗಿದ್ದು, ಇಂದು ಸಂಭವಿಸಿದ ಯುಎಸ್ಎಸ್ ಜಾನ್ ಎಸ್ ಮೆಕೇನ್ ನೌಕೆಯ ಅಪಘಾತ ಎರಡನೆಯ ಅಪಘಾತವಾಗಿದೆ. ಈ ಹಿಂದೆ ಕಳೆದ  ಜೂನ್ ನಲ್ಲಿ ಇದೇ ಅಮೆರಿಕದ ಯುಎಸ್ಎಸ್ ಫಿಟ್ಜ್ ಗರಾಲ್ಡ್ ಜಪಾನ್ ನ ಇಂಧನ ಟ್ಯಾಂಕರ್ ಗೆ ಢಿಕ್ಕಿ ಹೊಡೆದಿತ್ತು. ಪರಿಣಾಮ ಅಮೆರಿಕದ ಅತ್ಯಾಧುನಿಕ ಯುದ್ಧ ನೌಕೆ ಯುಎಸ್ಎಸ್ ಫಿಟ್ಜ್ ಗರಾಲ್ಡ್ ಗಂಭೀರವಾಗಿ  ಹಾನಿಗೊಳಗಾಗಿತ್ತು.