ಇಸ್ಲಾಮಾಬಾದ್: ಅಮೆರಿಕ ಸೇರಿದಂತೆ ವಿದೇಶಿ ಡ್ರೋನ್ ಗಳು ಪಾಕಿಸ್ತಾನದ ವಾಯು ಪ್ರದೇಶವನ್ನು ಅತಿಕ್ರಮಿಸಿ ಒಳ ನುಸುಳಿದರೆ ಕಂಡಲ್ಲಿ ಗುಂಡಿಕ್ಕಿ ಹೊಡೆದುರುಳಿಸುವಂತೆ ಪಾಕಿಸ್ತಾನ ವಾಯುಪಡೆ ಮುಖ್ಯಸ್ಥರು ತನ್ನ ಯೋಧರಿಗೆ ಖಡಕ್ ಸೂಚನೆ ಕೊಟ್ಟಿರುವುದಾಗಿ ವರದಿಯಾಗಿದೆ. 

ಅಮೆರಿಕವನ್ನು ಗುರಿಯಾಗಿರಿಸಿಕೊಂಡೇ ಪಾಕ್ ವಾಯು ಪಡೆ ಮುಖ್ಯಸ್ಥರು ಈ ಸೂಚನೆ ನೀಡಿದ್ದಾರೆ ಎಂದು ತಿಳಿದುಬಂದಿದೆ. 2004ರಿಂದ ಉಗ್ರರರ ಧಮನಕ್ಕಾಗಿ ಅಮೆರಿಕ ಡ್ರೋನ್ಗಳು ಆಫ್ಘಾನ್-ಪಾಕ್ ಗಡಿಯಲ್ಲಿ ಹಾಗೂ ಬುಡಕಟ್ಟು ಪ್ರದೇಶಗಳಲ್ಲಿ ಕಾರ್ಯಾಚರಣೆ ನಡೆಸುತ್ತಿವೆ. 

ಪಾಕಿಸ್ತಾನ ವಾಯು ಪ್ರದೇಶವನ್ನು ಯಾರಾದರೂ ಅತಿಕ್ರಮಿಸಿದರೆ ನಾವು ಸಹಿಸುವುದಿಲ್ಲ ಹಾಗೂ ಅದಕ್ಕೆ ಅವಕಾಶವನ್ನು ಕೊಡುವುದಿಲ್ಲ. ಹೀಗಾಗಿ ನಾನು ಪಿಎಎಫ್ ಗೆ ಅಮೆರಿಕ ಸಹಿತ ಯಾವುದೇ ವಿದೇಶಿ ಡ್ರೋನ್ ಗಳು ಪಾಕ್ ವಾಯು ಪ್ರದೇಶವನ್ನು ಅತಿಕ್ರಮಿಸಿ ಒಳಬಂದರೆ ಅವುಗಳನ್ನು ಹೊಡೆದುರುಳಿಸಬೇಕು ಎಂದು ಕಟ್ಟುನಿಟ್ಟಿನ ಸೂಚನೆ ನೀಡಿರುವುದಾಗಿ ಪಾಕ್ ವಾಯು ಪಡೆ ಮುಖ್ಯಸ್ಥ ಏರ್ ಚೀಫ್ ಮಾರ್ಶಲ್ ಸೊಹೇಲ್ ಅಮನ್ ಹೇಳಿದ್ದಾರೆ. 

ಪಾಕ್-ಆಫ್ಕಾನ್ ಗಡಿಯಲ್ಲಿ ಅಮೆರಿಕ ವಾಯುಪಡೆ ಡ್ರೋನ್ ಗಳು ಇತ್ತೀಚೆಗೆ ನಡೆಸಿದ್ದ ದಾಳಿಯಲ್ಲಿ ಮೂವರು ಉಗ್ರರು ಹತರಾಗಿದ್ದರು.