ಯುಎಇಯಲ್ಲಿ ಕೆಲಸದ ಪರವಾನಗಿ ಹೊಂದಿದ್ದ ಪಾಕ್ ವಿದೇಶಾಂಗ ಸಚಿವ ಖವಾಜಾ ಅಸೀಫ್ ಅವರನ್ನು ಪಾಕಿಸ್ತಾನದ ಕೋರ್ಟ್ ಸಂಸದ ಹಾಗೂ ವಿದೇಶಾಂಗ ಸಚಿವನ ಹುದ್ದೆಯಿಂದ ಅನರ್ಹಗೊಳಿಸಿದೆ. 

2013 ರಲ್ಲಿ ಚುನಾವಣೆಗೆ ಸ್ಪರ್ಧಿಸಿದ್ದ ಖವಾಜಾ ಅಸೀಫ್ ಯುಎಇಯಲ್ಲಿ ಕೆಲಸದ ಪರವಾನಗಿ ಹೊಂದಿದ್ದ ವಿಷಯವನ್ನು ಮರೆಮಾಚಿದ್ದರು. ಈ ವಿಷಯಕ್ಕೆ ಸಂಬಂಧಿಸಿದಂತೆ ಪಾಕಿಸ್ತಾನ್ ತೆಹ್ರೀಕ್-ಎ-ಇನ್ಸಾಫ್ ನಾಯಕ ಉಸ್ಮಾನ್ ದರ್  ಅರ್ಜಿ ಸಲ್ಲಿಸಿದ್ದರು. ವಿಚಾರಣೆ ನಡೆಸಿರುವ ಇಸ್ಲಾಮಾಬಾದ್ ನ ಹೈಕೋರ್ಟ್ ನ ತ್ರಿಸದಸ್ಯ ಪೀಠ ಖವಾಜಾ ಅಸೀಫ್  ಅವರನ್ನು ಹುದ್ದೆಯಿಂದ ಅನರ್ಹಗೊಳಿಸಿದೆ. 

ಯುಎಇಯಲ್ಲಿ ಕೆಲಸದ ಪರವಾನಗಿ ಹೊಂದಿರುವುದನ್ನು ಪ್ರಶ್ನಿಸಿದ್ದ ಉಸ್ಮಾನ್ ದರ್, ಸಂವಿಧಾನದ ಪರಿಚ್ಛೇಧ 62 ಹಾಗೂ 63 ಪ್ರಕಾರ ಖವಾಜಾ ಅಸೀಫ್ ಅವರನ್ನು ಅನರ್ಹಗೊಳಿಸಬೇಕೆಂದು ಆಗ್ರಹಿಸಿದ್ದರು. ಪರವಾನಗಿಯ ವಿಷಯವನ್ನು ಮರೆಮಾಚಿರುವ ಖವಾಜಾ ಅಸೀಫ್, ಸಂಸದ ವಿದೇಶಾಂಗ ಸಚಿವನ ಸ್ಥಾನದಲ್ಲಿ ಮುಂದುವರೆಯುವುದಕ್ಕೆ ಸಾಧ್ಯವಿಲ್ಲ ಎಂದು ಕೋರ್ಟ್ ಹೇಳಿದೆ.