ವಾಷಿಂಗ್ ಟನ್: ಪೋಷಕರು ಮಗುವನ್ನು ಕಾರಿನಲ್ಲೇ ಬಿಟ್ಟು ತೆರಳಿದ್ದರ ಪರಿಣಾಮ 18 ತಿಂಗಳ ಶಿಶು ಮೃತಪಟ್ಟಿರುವ ಘಟನೆ ಅಮೇರಿಕಾದಲ್ಲಿ ವರದಿಯಾಗಿದೆ.
 
ಸಿಎನ್ಎನ್ ಈ ಬಗ್ಗೆ ವರದಿ ಪ್ರಕಟಿಸಿದ್ದು, ರಾತ್ರಿ ಇಡೀ ಮಗುವನ್ನು ಉಷ್ಣಾಂಶ ಹೆಚ್ಚಿರುವ ಕಾರಿನಲ್ಲಿ ಪೋಷಕರು ಬಿಟ್ಟಿದ್ದಾರೆ.  ಬೆಳಿಗ್ಗೆ 3 ಗಂಟೆಯಿಂದ 11 ಗಂಟೆ ವರೆಗೆ ಮಗು 105 ಡಿಗ್ರಿ ಉಷ್ಣಾಂಶದಲ್ಲಿತ್ತು ಎಂದು ಅಲ್ಲಿನ ಪೊಲೀಸ್ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಜೋಯಲ್ ಹಾಗೂ ಜಾಜ್ಮೈನ್ ರಾಂಡನ್ ದಂಪತಿ 9 ವರ್ಷಗಳಿಗಿಂತ ಕಿರಿಯವರಾದ  ತಮ್ಮ ಮೂವರು ಮಕ್ಕಳೊಂದಿಗೆ ಜುಲೈ ನಾಲ್ಕರಂದು ಮನೆಯಿಂದ ಹೊರಗೆ ಪಾರ್ಟಿಗೆ ತೆರಳಿದ್ದರು. ಮನೆಗೆ ವಾಪಸ್ಸಾದ ಬಳಿಕ ಮಕ್ಕಳನ್ನು ಕರೆತರಲು ಜಾಜ್ಮೈನ್ ಪತಿಗೆ ಹೇಳಿದ್ದಾರೆ. ಈ ವೇಳೆ ಜೋಯಲ್ ಹೊರ ಹೋದಾಗ ಕಾರಿನ ಬಾಗಿಲು ತೆರೆದಿತ್ತು. ಪಾರ್ಟಿಗೆ ತೆಗೆದುಕೊಂಡು ಹೋಗಿದ್ದ ಟ್ರೇ, ಆಹಾರ ಪದಾರ್ಥಗಳನ್ನು ತೆಗೆದುಕೊಂಡು ಹೋದರು. ಮರಳಿ ವಾಪಸ್ಸಾದಾಗ ಕಾರಿನ ನಾಲ್ಕೂ ಬಾಗಿಲು ಬಂದ್ ಆಗಿತ್ತು.

ಇದನ್ನೂ ಓದಿ: BWSSB ನಿರ್ಲಕ್ಷ್ಯಕ್ಕೆ ಗುಂಡಿಗೆ ಬಿದ್ದು ಎರಡೂವರೆ ವರ್ಷದ ಮಗು ಸಾವು: ಎಂಜಿನಿಯರ್, ಕಾಂಟ್ರ್ಯಾಕ್ಟರ್ ವಿರುದ್ಧ ಎಫ್ಐಆರ್ ದಾಖಲು

ಇದನ್ನು ಗಮನಿಸಿದ  ಜೋಯಲ್ ಕಾರಿನಲ್ಲಿದ್ದ ಮಗುವನ್ನು ತನ್ನ ಪತ್ನಿ ಅದಾಗಲೇ ಮನೆಗೆ ಕರೆದೊಯ್ದಿದ್ದಾಳೆ ಎಂದು ಭಾವಿಸಿ ಮನೆಗೆ ವಾಪಸ್ಸಾಗಿದ್ದಾನೆ. ಆದರೆ ಪತಿ-ಪತ್ನಿ ಇಬ್ಬರೂ ಕಾರಿನಲ್ಲಿದ್ದ ಮಗು ಮನೆಯಲ್ಲಿದೆ ಎಂದು ಭಾವಿಸಿ ರಾತ್ರಿ ನಿದ್ರಿಸಿದ್ದಾರೆ. ಮರು ದಿನ ಎದ್ದಾಗ ಮನೆಯಲ್ಲಿ ಮಗು ಕಾಣಿಸಲಿಲ್ಲ.  ಆತಂಕಗೊಂಡ ತಂದೆ ಬಿಸಿಲಿನಲ್ಲಿ ನಿಂತಿದ್ದ ಕಾರಿನಲ್ಲೇ ಇದ್ದ ಮಗು ಹಾಗೆಯೇ ಮಲಗಿರುವುದನ್ನು ಕಂಡಿದ್ದಾರೆ. ಕೂಡಲೇ ಮಗುವನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ ಆ ವೇಳೆಗೆ ಮಗು ಸಾವನ್ನಪ್ಪಿತ್ತು.
 
ಘಟನೆ ನಡೆದ ದಿನ ತಾಪಮಾನ ಅಧಿಕವಾಗಿತ್ತು. ಮಗುವಿನ ದೇಹದ ತಾಪಮಾನ 104 ಡಿಗ್ರಿ ಫ್ಯಾರನ್ ಹೀಟ್ ನಷ್ಟಿತ್ತು, ಅತ್ಯಧಿಕ ತಾಪಮಾನದ ಕಾರಣದಿಂದ ಮಗು ಸಾವನ್ನಪ್ಪಿದೆ ಎಂದು ವೈದ್ಯರು ಹೇಳಿದ್ದು. ಪೋಷಕರ ವಿರುದ್ಧ ಹತ್ಯೆ ಪ್ರಕರಣ ದಾಖಲಾಗಿದೆ.