ಅಭಿಪ್ರಾಯ ಲೇಖನ: ಮಿಸ್ ಓರ್ಲಿ ವೈಟ್ಜ್ಮನ್, ದಕ್ಷಿಣ ಭಾರತಕ್ಕೆ ಇಸ್ರೇಲ್ನ ಕಾನ್ಸುಲ್ ಜನರಲ್
ಗಾಜಾದ ಜೈಲುಗಳಲ್ಲಿ 470 ದಿನಗಳ ಕಾಲ ಚಿತ್ರಹಿಂಸೆ ನೀಡಿ, ಜನವರಿ 19 ರಂದು ರೆಡ್ ಕ್ರಾಸ್ಗೆ ಬಿಡುಗಡೆ ಮಾಡುವ ಮೊದಲು ಮೂವರು ಮಹಿಳಾ ಒತ್ತೆಯಾಳುಗಳನ್ನು ಜನಸಮೂಹದ ಮಧ್ಯೆ ಮೆರವಣಿಗೆ ಮಾಡಲಾದ ವಿಕೃತ ದೃಶ್ಯವು ಹಮಾಸ್ನ ಅನಾಗರಿಕತೆಯನ್ನು ತೋರುತ್ತದೆ. ಆ ದಿನ ಭುಗಿಲೆದ್ದ ಯುದ್ಧಕ್ಕೆ ಮತ್ತು ಅನಂತರ ಇಸ್ರೇಲಿಗಳು ಮತ್ತು ಪ್ಯಾಲೆಸ್ಟೀನಿಯನ್ನರ ಮೇಲೆ ಉಂಟಾದ ನೋವು ಮತ್ತು ಗಾಜಾದ ವಿನಾಶಕ್ಕೆ ಹಮಾಸ್ ಸಂಪೂರ್ಣ ಜವಾಬ್ದಾರಿಯನ್ನು ಹೊರುತ್ತದೆ ಎಂಬ ವಾಸ್ತವವನ್ನು ಈ ದುರಂತ ಘಟನೆ ಒತ್ತಿಹೇಳುತ್ತದೆ. ಜಾಗತಿಕ ಸಮುದಾಯವು ಈ ಸತ್ಯವನ್ನು ಎದುರಿಸುವ ಸಮಯ ಬಂದಿದೆ: ಹಮಾಸ್ ಜೊತೆ ಯಾವುದೇ ಭರವಸೆ ಇಲ್ಲ. ಹಮಾಸ್ ಜೊತೆ ಶಾಂತಿ ಇಲ್ಲ. ಹಮಾಸ್ ಶಾಂತಿ ಮತ್ತು ಸ್ಥಿರತೆಗೆ ಅಡ್ಡಿಯಾಗಿದೆ ಮತ್ತು ಗಾಜಾದ ಮೇಲೆ ಅದರ ನಿರಂತರ ಆಡಳಿತವು ಪ್ಯಾಲೆಸ್ಟೀನಿಯನ್ನರು ಮತ್ತು ಆ ಪ್ರದೇಶಕ್ಕೆ ವಿನಾಶವನ್ನುಂಟುಮಾಡುತ್ತದೆ.
ಭಾರತ ಕೂಡ ಗಡಿಯುದ್ದಕ್ಕೂ ಕಾರ್ಯನಿರ್ವಹಿಸುವ, ಶಾಂತಿಯನ್ನು ಅಸ್ಥಿರಗೊಳಿಸುವ ಮತ್ತು ಮುಗ್ಧ ಜೀವಗಳನ್ನು ಗುರಿಯಾಗಿಸುವ ಸಂಘಟನೆಗಳಿಂದ ಭಯೋತ್ಪಾದನೆಯ ಗಂಭೀರ ಬೆದರಿಕೆಯನ್ನು ಎದುರಿಸಿದೆ. ಲಷ್ಕರ್-ಎ-ತೈಬಾ, ಜೈಶ್-ಎ-ಮೊಹಮ್ಮದ್ ಮತ್ತು ಇತರ ಗುಂಪುಗಳು ಹಿಂಸಾಚಾರದ ಕೃತ್ಯಗಳ ಮೂಲಕ ಭಾರತೀಯ ನೆಲದಲ್ಲಿ ಮಾಸದ ಗುರುತುಗಳನ್ನು ಬಿಟ್ಟಿವೆ, ಇದು ಭಯೋತ್ಪಾದಕ ಜಾಲಗಳನ್ನು ಎದುರಿಸುವ ಸಾರ್ವತ್ರಿಕ ಸವಾಲನ್ನು ಒತ್ತಿಹೇಳುತ್ತದೆ. ಈ ಅನುಭವಗಳು, ಎಲ್ಲಾ ರೀತಿಯ ಭಯೋತ್ಪಾದನೆಯನ್ನು ತಿರಸ್ಕರಿಸುವಲ್ಲಿ ರಾಷ್ಟ್ರಗಳು ಒಗ್ಗಟ್ಟಿನಿಂದ ನಿಲ್ಲುವ ಅಗತ್ಯವನ್ನು ಎತ್ತಿ ತೋರಿಸುತ್ತವೆ ಮತ್ತು ಉಗ್ರಗಾಮಿ ಗುಂಪುಗಳು ತಮ್ಮ ಕಾರ್ಯತಂತ್ರ ಸಾಧಿಸಲು ಜನರನ್ನು ಒತ್ತೆಯಾಳಾಗಿ ಇರಿಸಿಕೊಳ್ಳಲು ಸಾಧ್ಯವಿಲ್ಲ ಎಂದು ಖಚಿತಪಡಿಸಿಕೊಳ್ಳಬೇಕು.
ಅಕ್ಟೋಬರ್ 7 ರಂದು ಹಮಾಸ್ ಪಡೆಗಳು ಇಸ್ರೇಲ್ ಮೇಲೆ ಹಿಂದೆಂದೂ ಕಂಡಿಲ್ಲದ ದಾಳಿ ನಡೆಸಿ, ನಗರಗಳು ಮತ್ತು ಹಳ್ಳಿಗಳ ಮೇಲೆ ಬಾಂಬ್ ದಾಳಿ ಮಾಡಿ, ಅಲ್ಲಿನ ನಿವಾಸಿಗಳ ಮನೆಗಳನ್ನು ಸುಟ್ಟು, ಅತ್ಯಾಚಾರ ಮಾಡಿ, ಅಂಗವಿಕಲರನ್ನಾಗಿ ಮಾಡಿ, 1,400 ಕ್ಕೂ ಹೆಚ್ಚು ನಾಗರಿಕರನ್ನು ಕೊಂದು, ಮಕ್ಕಳು, ಶಿಶುಗಳು ಮತ್ತು ವೃದ್ಧರು ಸೇರಿದಂತೆ 250 ಕ್ಕೂ ಹೆಚ್ಚು ಜನರನ್ನು ಒತ್ತೆಯಾಳುಗಳನ್ನಾಗಿ ತೆಗೆದುಕೊಂಡಾಗ, ಅದರ ಪಾರವಿಲ್ಲದ ಕ್ರೌರ್ಯ ಬಯಲಾಯಿತು. ಈ ಘಟನೆಗಳು ಆ ಪ್ರದೇಶವನ್ನು ಇನ್ನೂ ಕಾಡುತ್ತಿರುವ ಹಿಂಸಾಚಾರದ ಅಲೆಯಲ್ಲಿ ಅಸಂಖ್ಯಾತ ಕುಟುಂಬಗಳು ಛಿದ್ರವಾಗುವಂತೆ ಮಾಡಿವೆ. ಆದರೂ, ಇಸ್ರೇಲಿಗಳಿಗೆ ನೋವು ನಿಲ್ಲುವುದಿಲ್ಲ. ಗಾಜಾ ನಿವಾಸಿಗಳು ಸಹ ಹಮಾಸ್ನ ವಿನಾಶಕಾರಿ ಆಡಳಿತದ ಭಾರವನ್ನು ಹೊರುತ್ತಾರೆ. ಪ್ಯಾಲೆಸ್ಟೀನಿಯನ್ ವಿಮೋಚನೆಯನ್ನು ಪ್ರತಿಪಾದಿಸುವುದಾಗಿ ಹೇಳಿಕೊಳ್ಳುವಾಗ, ಹಮಾಸ್ ತನ್ನ ಜನರ ಯೋಗಕ್ಷೇಮಕ್ಕಿಂತ ಸರ್ವಾಧಿಕಾರ ಮತ್ತು ಮಿಲಿಟರೀಕರಣಕ್ಕೆ ಆದ್ಯತೆ ನೀಡಿದೆ, ಮಾನವೀಯ ಸಹಾಯವನ್ನು ದಬ್ಬಾಳಿಕೆಯ ಸಾಧನವಾಗಿ ಬಳಸಿಕೊಂಡಿದೆ ಮತ್ತು ಸಂಪನ್ಮೂಲಗಳನ್ನು ಸುರಂಗಗಳನ್ನು ನಿರ್ಮಿಸಲು ಮತ್ತು ಶಸ್ತ್ರಾಸ್ತ್ರಗಳನ್ನು ಸಂಗ್ರಹಿಸಲು ಬಳಸಿಕೊಂಡಿದೆ.
ಗಾಜಾದಲ್ಲಿನ ಮಾನವೀಯ ಬಿಕ್ಕಟ್ಟು ಹಮಾಸ್ನ ದುರಾಡಳಿತದ ನೇರ ಪರಿಣಾಮವಾಗಿದೆ, ಇದು ಗಾಜಾವನ್ನು ಹತಾಶೆಯ ಹಂತಕ್ಕೆ ಇಳಿಸಿತು. ಈಗ ಮಾತ್ರವಲ್ಲದೆ ಅಕ್ಟೋಬರ್ 7 ರ ದಾಳಿಗೂ ಮೊದಲು, ಗಾಜಾದ ಮೂಲಭೂತ ಸೌಕರ್ಯಗಳು ಹಾಳಾಗಿದ್ದವು, ಆರ್ಥಿಕತೆಯು ಕುಸಿದಿತ್ತು, ಆರೋಗ್ಯ ರಕ್ಷಣೆ ಅಸಮರ್ಪಕವಾಗಿತ್ತು ಮತ್ತು ನಿರುದ್ಯೋಗ ಹೆಚ್ಚಾಗಿತ್ತು. ಹಮಾಸ್ನ ಸಶಸ್ತ್ರ ಸಂಘರ್ಷದ ಗೀಳು, ಯುದ್ಧವನ್ನು ಮೀರಿದ ಭವಿಷ್ಯದ ಬಗ್ಗೆ ಯಾವುದೇ ದೃಷ್ಟಿಕೋನವಿಲ್ಲದೆ ಗಾಜಾ ಜನರನ್ನು ಶಾಶ್ವತವಾಗಿ ಸಂಕಷ್ಟದಲ್ಲಿ ಸಿಲುಕಿಸಿದೆ. ಅತ್ಯಂತ ಸ್ಪಷ್ಟವಾದ ಉದಾಹರಣೆಯೆಂದರೆ ನೂರಾರು ಕಿಲೋಮೀಟರ್ ಭಯೋತ್ಪಾದಕ ಸುರಂಗಗಳ ನಿರ್ಮಾಣ, ಇದರಲ್ಲಿ ಹಮಾಸ್ ಇಸ್ರೇಲಿ ಒತ್ತೆಯಾಳುಗಳನ್ನು ಬಂಧಿಸಿ ಹಿಂಸಿಸುತ್ತದೆ, ಆದರೆ ಆಶ್ರಯಕ್ಕಾಗಿ ಗಾಜಾ ನಾಗರಿಕರಿಗೆ ಪ್ರವೇಶವನ್ನು ನಿರಾಕರಿಸುತ್ತದೆ.
ಗಾಜಾ ಮೇಲಿನ ಹಮಾಸ್ನ ಬಿಗಿ ಹಿಡಿತವು ಉತ್ತಮ ಭವಿಷ್ಯದ ಯಾವುದೇ ಭರವಸೆಯನ್ನು ನಾಶಗೊಳಿಸುತ್ತದೆ. ಗಾಜಾದವರಿಗೆ, ಇದರರ್ಥ ಸಮೃದ್ಧಿಗಿಂತ ಹಿಂಸಾಚಾರಕ್ಕೆ ಆದ್ಯತೆ ನೀಡುವ ಆಡಳಿತದ ಅಡಿಯಲ್ಲಿ ಬದುಕುವುದು. ಇಸ್ರೇಲಿಗಳಿಗೆ, ಇದರರ್ಥ ಜೀವನವನ್ನು ಹಾಳುಮಾಡುವ ಮತ್ತು ಶಾಂತಿಯ ಭರವಸೆಯನ್ನು ಹಾಳುಮಾಡುವ ಇಂತಹ ನಿರಂತರ ದಾಳಿಗಳನ್ನು ಸಹಿಸಿಕೊಳ್ಳುವುದು.
ಮತ್ತು ವಿಸ್ತಾರವಾದ ಪ್ರದೇಶಕ್ಕೆ ಸಂಬಂಧಿಸಿದಂತೆ, ಹಮಾಸ್ ಅಸ್ಥಿರಗೊಳಿಸುವ ಶಕ್ತಿಯನ್ನು ಪ್ರತಿನಿಧಿಸುತ್ತದೆ, ಅದು ದ್ವೇಷದ ಚಕ್ರಗಳನ್ನು ಶಾಶ್ವತಗೊಳಿಸುತ್ತದೆ ಮತ್ತು ಆಮೂಲಾಗ್ರ ಇಸ್ಲಾಮಿಸಂ ಮತ್ತು ಇರಾನಿನ ಹಿತಾಸಕ್ತಿಗಳನ್ನು ಉತ್ತೇಜಿಸುತ್ತದೆ. ವಾಸ್ತವವಾಗಿ, "ದುಷ್ಟತೆಯ ಅಕ್ಷ" ಎಂದು ಕರೆಯಲ್ಪಡುವ ಇರಾನ್ಗೆ ಹಮಾಸ್ನ ನಿಷ್ಠೆಯು ಆ ಪ್ರದೇಶವನ್ನು ಮತ್ತಷ್ಟು ಪ್ರಕ್ಷುಬ್ಧತೆಗೆ ಸಿಲುಕಿಸುತ್ತದೆ, ಏಕೆಂದರೆ ಟೆಹ್ರಾನ್ನ ಪ್ರಭಾವವು ಉಗ್ರವಾದ ಮತ್ತು ಆಕ್ರಮಣಶೀಲತೆಯನ್ನು ಉತ್ತೇಜಿಸುತ್ತದೆ.
ಹಮಾಸ್ ಆಳ್ವಿಕೆಯಲ್ಲಿರುವ ಗಾಜಾ ಶಾಂತಿಗೆ ಯಾವುದೇ ಮಾರ್ಗವನ್ನು ನೀಡುವುದಿಲ್ಲ, ಪ್ಯಾಲೆಸ್ಟೀನಿಯನ್ನರು ಮತ್ತು ಇಸ್ರೇಲಿಗಳಿಗೆ ಸಂಘರ್ಷ, ನೋವು ಮತ್ತು ಅಸ್ಥಿರತೆಯ ಮುಂದುವರಿಕೆ ಮಾತ್ರ ಎಂಬುದನ್ನು ಅಂತರರಾಷ್ಟ್ರೀಯ ಸಮುದಾಯ ಗುರುತಿಸಬೇಕು. ಹಮಾಸ್ ಅನ್ನು ತೊಡೆದುಹಾಕುವುದು ಕೇವಲ ಇಸ್ರೇಲಿ ಹಿತಾಸಕ್ತಿಯಲ್ಲ; ಇದು ಪ್ರಾದೇಶಿಕ ಅವಶ್ಯಕತೆಯಾಗಿದೆ. ಹಮಾಸ್ ಇಲ್ಲದೆ, ಗಾಜಾವನ್ನು ಪುನರ್ನಿರ್ಮಿಸಬಹುದು. ಹಮಾಸ್ ಇಲ್ಲದೆ, ಗಾಜಾ ಜನರು ಮತ್ತು ಇಸ್ರೇಲಿಗಳು ಶಾಶ್ವತ ಸಂಘರ್ಷದಿಂದ ಮುಕ್ತವಾದ ಭವಿಷ್ಯವನ್ನು ಕಲ್ಪಿಸಿಕೊಳ್ಳಲು ಪ್ರಾರಂಭಿಸಬಹುದು.
ಜಾಗತಿಕ ಸಮುದಾಯವು ನಿರ್ಣಾಯಕವಾಗಿ ಕಾರ್ಯನಿರ್ವಹಿಸಬೇಕು ಮತ್ತು ಹಮಾಸ್ನ ಅಧಿಕಾರ ರಚನೆಯನ್ನು ಕೆಡವುವ ಪ್ರಯತ್ನಗಳನ್ನು ಕಡ್ಡಾಯವಾಗಿ ಬೆಂಬಲಿಸಬೇಕು. ಹಮಾಸ್ನ ನಿರಂತರ ಆಡಳಿತವು ಗಾಜಾದವರಿಗೆ ಹತಾಶೆ, ಇಸ್ರೇಲಿಗಳಿಗೆ ಶಾಶ್ವತ ಭಯ ಮತ್ತು ಆ ಪ್ರದೇಶಕ್ಕೆ ನಿರಂತರ ಅಸ್ಥಿರತೆಯನ್ನು ಮಾತ್ರ ಖಾತರಿಪಡಿಸುತ್ತದೆ. ಜಗತ್ತು ಸುಮ್ಮನೆ ನಿಲ್ಲಬಾರದು. ಮಧ್ಯಪ್ರಾಚ್ಯದ ಮೇಲೆ ಇನ್ಮುಂದೆ ಹಮಾಸ್ನ ನೆರಳು ಬೀಳದಂತಹ ಭವಿಷ್ಯವನ್ನು ಕಲ್ಪಿಸಿಕೊಳ್ಳುವ ಮತ್ತು ಆ ನಿಟ್ಟಿನಲ್ಲಿ ಕೆಲಸ ಮಾಡುವ ಸಮಯ ಇದಾಗಿದೆ.