ಮಾಸ್ಕೋ: ಪಶ್ಚಿಮ ದೇಶಗಳ 'ಅನ್ಯಾಯ' ಒತ್ತಡದ ನಡುವೆಯೂ ರಷ್ಯಾ ವಿಶ್ವದ ಪ್ರಮುಖ ತೈಲ ಉತ್ಪಾದಕ ರಾಷ್ಟ್ರಗಳಲ್ಲಿ ಒಂದಾಗಿ ಉಳಿದಿದೆ ಎಂದು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಹೇಳಿದ್ದಾರೆ.

ಮಾಸ್ಕೋದಲ್ಲಿ ರಷ್ಯಾದ ಇಂಧನದ ಕುರಿತಾದ ಸಮ್ಮೇಳನದಲ್ಲಿ ಮಾತನಾಡಿದ ಪುಟಿನ್, ಪ್ರಸ್ತುತ "ಜಾಗತಿಕ ಉತ್ಪಾದನೆಯ ಸರಿಸುಮಾರು ಶೇಕಡಾ 10 ರಷ್ಟು ರಷ್ಯಾದ ಉತ್ಪಾದನೆ ಇದೆ" ಎಂದು ಹೇಳಿದರು. ವರ್ಷದ ಅಂತ್ಯದ ವೇಳೆಗೆ ದೇಶ 510 ಮಿಲಿಯನ್ ಟನ್ ತೈಲವನ್ನು ಉತ್ಪಾದಿಸುತ್ತದೆ ಎಂದು ಅವರು ಅಂದಾಜಿಸಿದರು.

ರಷ್ಯಾದ ಅನಿಲ ಖರೀದಿಯನ್ನು ಕಡಿತಗೊಳಿಸಿದ್ದಕ್ಕಾಗಿ ಪುಟಿನ್ ಯುರೋಪಿಯನ್ ದೇಶಗಳನ್ನು ಈ ಕಾರ್ಯಕ್ರಮದಲ್ಲಿ ಟೀಕಿಸಿದ್ದಾರೆ. ಯುರೋಪ್ ದೇಶಗಳ ಈ ಕ್ರಮವು ಅವರ ಇಂಧನ ಭದ್ರತೆ ಮತ್ತು ಆರ್ಥಿಕ ಸ್ಥಿರತೆಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿದೆ ಎಂದು ಅವರು ಹೇಳಿದ್ದಾರೆ.

ಇದಲ್ಲದೆ, ರಷ್ಯಾಕ್ಕೆ ಇಂಧನ-ಸಂಬಂಧಿತ ಉಪಕರಣಗಳನ್ನು ರಫ್ತು ಮಾಡುವ ಮೇಲಿನ ಪಾಶ್ಚಿಮಾತ್ಯ ನಿರ್ಬಂಧಗಳನ್ನು ರಷ್ಯಾದ ನಾಯಕ ಟೀಕಿಸಿದ್ದಾರೆ. ಈ ಕ್ರಮಗಳು ರಷ್ಯಾದ ಇಂಧನ ಉದ್ಯಮವನ್ನು ತಡೆಯುವ ಗುರಿಯನ್ನು ಹೊಂದಿರುವ ವಿಶಾಲವಾದ "ಅನ್ಯಾಯಯುತ" ಸ್ಪರ್ಧಾತ್ಮಕ ವಿರೋಧಿ ಯೋಜನೆಯ ಭಾಗವಾಗಿದೆ ಎಂದು ಪುಟಿನ್ ಹೇಳಿದ್ದಾರೆ.

ರಷ್ಯಾದಿಂದ ತೈಲ ಖರೀದಿ ಮಾಡುತ್ತಿರುವ ಪ್ರಮುಖ ರಾಷ್ಟ್ರಗಳಾದ ಭಾರತ, ಚೀನಾಗಳ ಮೇಲೆ, ಅಲ್ಲಿಂದ ತೈಲ ಖರೀದಿಸದಂತೆ ಅಮೆರಿಕ ಒತ್ತಡ ಹೇರುತ್ತಿರುವ ಹೊತ್ತಿನಲ್ಲಿ ಪುತಿನ್ ಹೇಳಿಕೆ ಮಹತ್ವ ಪಡೆದುಕೊಂಡಿದೆ.

ರಷ್ಯಾ ತನ್ನ ಖಜಾನೆಯನ್ನು ತುಂಬಿಸಲು ತೈಲ ಮತ್ತು ಅನಿಲ ಮಾರಾಟವನ್ನು ಹೆಚ್ಚು ಅವಲಂಬಿಸಿದೆ. ಇದನ್ನೇ ಉಲ್ಲೇಖಿಸಿದ್ದ ಡೊನಾಲ್ಡ್ ಟ್ರಂಪ್, ಭಾರತ- ಚೀನಾಗಳು ರಷ್ಯಾಗೆ ಯುದ್ಧಕ್ಕೆ ಸಹಾಯ ಮಾಡುತ್ತಿವೆ ಎಂದು ಆರೋಪಿಸಿದ್ದರು.

ಭಾರತದ ಪ್ರಧಾನಿ ನರೇಂದ್ರ ಮೋದಿ ನವದೆಹಲಿ ರಷ್ಯಾದ ತೈಲ ಖರೀದಿಯನ್ನು ನಿಲ್ಲಿಸುವುದಾಗಿ ಭರವಸೆ ನೀಡಿದ್ದಾರೆ ಎಂದು ಟ್ರಂಪ್ ಬುಧವಾರ ಹೇಳಿಕೊಂಡಿದ್ದಾರೆ. ಭಾರತ ರಷ್ಯಾದಿಂದ ತೈಲ ಖರೀದಿಸುವ ತನ್ನ ನಡೆಯನ್ನು ಸಮರ್ಥಿಸಿಕೊಂಡಿದೆ.

ಈ ಬೆನ್ನಲ್ಲೇ ಚೀನಾ ಕೂಡಾ ರಷ್ಯಾದಿಂದ ತೈಲ ಖರೀದಿಯನ್ನು ಸಾರ್ವಜನಿಕವಾಗಿ ಸಮರ್ಥಿಸಿಕೊಂಡಿದೆ. ಅವುಗಳನ್ನು "ಕಾನೂನುಬದ್ಧ" ಎಂದು ಹೇಳಿದೆ. ಬೀಜಿಂಗ್ ತನ್ನ ವ್ಯಾಪಾರ ನಿರ್ಧಾರಗಳ ಮೇಲೆ ಪ್ರಭಾವ ಬೀರುವ ವಾಷಿಂಗ್ಟನ್‌ನ ಪ್ರಯತ್ನಗಳನ್ನು ತೀವ್ರವಾಗಿ ಟೀಕಿಸಿದ್ದು, ಅಮೆರಿಕದ ಕ್ರಮಗಳನ್ನು "ಏಕಪಕ್ಷೀಯ ಬೆದರಿಸುವಿಕೆ" ಎಂದು ಖಂಡಿಸಿದೆ.