ಅಮೆರಿಕಾ ಮತ್ತು ಇರಾನ್ ನಡುವಿನ ಇಸ್ಲಾಮಾಬಾದ್ನಲ್ಲಿ ನಡೆದ ಮಾತುಕತೆಗಳು ವಿಫಲವಾದ ನಂತರ, ರಾಜತಾಂತ್ರಿಕ ಪರಿಹಾರದ ದಾರಿ ಮತ್ತೆ ತೆರೆಯಲ್ಪಟ್ಟಿದ್ದರೂ, ಸೈನಿಕ ಶಕ್ತಿಯ ಬೆದರಿಕೆಯೂ ಸಮಾನವಾಗಿ ಮುಂದುವರಿದಿದೆ.
ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ತಮ್ಮ ದೂತರು ಸೋಮವಾರ ಸಂಜೆ ಎರಡನೇ ಸುತ್ತಿನ ಮಾತುಕತೆಗಾಗಿ ಪಾಕಿಸ್ತಾನದ ಇಸ್ಲಾಮಾಬಾದ್ಗೆ ತೆರಳಲು ಸಿದ್ಧರಾಗಿರುವ ಸಂದರ್ಭದಲ್ಲಿ, ಇರಾನ್ನ ಮೂಲಸೌಕರ್ಯಗಳ ಮೇಲೆ ವ್ಯಾಪಕ ದಾಳಿಗಳನ್ನು ನಡೆಸುವ ಎಚ್ಚರಿಕೆ ನೀಡಿದ್ದಾರೆ.
“ನನ್ನ ಪ್ರತಿನಿಧಿಗಳು ಇಸ್ಲಾಮಾಬಾದ್, ಪಾಕಿಸ್ತಾನಕ್ಕೆ ಹೋಗುತ್ತಿದ್ದಾರೆ. ಅವರು ನಾಳೆ ಸಂಜೆ ಅಲ್ಲಿ ಇರುತ್ತಾರೆ, ಮಾತುಕತೆಗಾಗಿ,” ಎಂದು ಅಮೆರಿಕಾ ಅಧ್ಯಕ್ಷರು ‘ಟ್ರೂತ್ ಸೋಶಿಯಲ್’ನಲ್ಲಿ ಪ್ರಕಟಿಸಿದ ಸಂದೇಶದಲ್ಲಿ ತಿಳಿಸಿದ್ದಾರೆ. ಕಳೆದ ವಾರ ಇಸ್ಲಾಮಾಬಾದ್ನಲ್ಲಿ ನಡೆದ ಮೊದಲ ಸುತ್ತಿನ ಮಾತುಕತೆಗಳು, ಯುರೇನಿಯಂ ಸಂವರ್ಧನೆಗೆ ತಕ್ಷಣದ ಮಿತಿ ವಿಧಿಸುವಂತೆ ಅಮೆರಿಕಾ ಇಟ್ಟಿದ್ದ ಬೇಡಿಕೆಯನ್ನು ಇರಾನ್ ಪ್ರತಿನಿಧಿಗಳು ತಿರಸ್ಕರಿಸಿದ ನಂತರ ಕುಸಿದವು. ಇದರ ನಂತರ, ಅಮೆರಿಕಾ ಹೋರ್ಮುಜ್ ಜಲಸಂಧಿಯಲ್ಲಿ ನೌಕಾ ನಿರ್ಬಂಧವನ್ನು ಜಾರಿಗೊಳಿಸಿತು.
ಇಸ್ಲಾಮಾಬಾದ್ನಲ್ಲಿ ಎರಡನೇ ಸುತ್ತಿನ ಮಾತುಕತೆ ನ್ಯೂಯಾರ್ಕ್ ಪೋಸ್ಟ್ಗೆ ನೀಡಿದ ಸಂದರ್ಶನದಲ್ಲಿ ಟ್ರಂಪ್, ತನ್ನ ವಿಶೇಷ ದೂತರಾದ ಸ್ಟೀವ್ ವಿಟ್ಕಾಫ್ ಮತ್ತು ಜಾರೆಡ್ ಕುಶ್ನರ್ ಮುಂದಿನ ಮಾತುಕತೆ ಸುತ್ತಿಗೆ ಮುನ್ನ ಇಸ್ಲಾಮಾಬಾದ್ಗೆ ಆಗಮಿಸಲಿದ್ದಾರೆ ಎಂದು ದೃಢಪಡಿಸಿದರು. “ಸ್ಟೀವ್ ನಾಳೆ ರಾತ್ರಿ ಅಲ್ಲಿ ಹೋಗಲಿದ್ದಾರೆ,” ಎಂದು ಹೇಳಿರುವ ಟ್ರಂಪ್, ತನ್ನ ದೂತರು ತಲುಪಿದ ತಕ್ಷಣವೇ ಚರ್ಚೆಗಳು ಪುನರಾರಂಭವಾಗುವ ನಿರೀಕ್ಷೆಯಿದೆ ಎಂದು ಸೇರಿಸಿದರು.
ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಪಾಕಿಸ್ತಾನಕ್ಕೆ ಪ್ರಯಾಣಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದರು. ಆದರೆ, ಸಂದೇಶದ ಧಾಟಿ ಬೇಗನೇ ಮಾತುಕತೆಯಿಂದ ಬೆದರಿಕೆ ಧೋರಣೆಗೆ ತಿರುಗಿತು. ತಾನು “ನ್ಯಾಯಸಮ್ಮತ ಮತ್ತು ಯುಕ್ತಿಯುಕ್ತ ಒಪ್ಪಂದ” ಎಂದು ವರ್ಣಿಸಿದ ಪ್ರಸ್ತಾವನೆಯನ್ನು ಇರಾನ್ ತಿರಸ್ಕರಿಸಿದರೆ, ಅದರ ಮೂಲಸೌಕರ್ಯವನ್ನು ಗುರಿಯಾಗಿಸಿಕೊಂಡು ವ್ಯಾಪಕ ಸೈನಿಕ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಟ್ರಂಪ್ ಎಚ್ಚರಿಸಿದ್ದಾರೆ.
ಟ್ರೂತ್ ಸೋಶಿಯಲ್ನಲ್ಲಿ ಮಾಡಿದ ಪೋಸ್ಟ್ನಲ್ಲಿ, ಹೋರ್ಮುಜ್ ಜಲಸಂಧಿಯಲ್ಲಿ ಗುಂಡಿನ ದಾಳಿ ನಡೆಸಿ, ಇರಾನ್ ಒಪ್ಪಂದವನ್ನು ಉಲ್ಲಂಘಿಸಿದೆ ಎಂದು ಅವರು ಆರೋಪಿಸಿದರು. ಅಂತರರಾಷ್ಟ್ರೀಯ ಹಡಗುಗಳನ್ನು ಗುರಿಯಾಗಿಸಲಾಗಿದೆ ಎಂದು ಅವರು ಹೇಳಿದರು. “ಇರಾನ್ ನಿನ್ನೆ ಹೋರ್ಮುಜ್ ಜಲಸಂಧಿಯಲ್ಲಿ ಗುಂಡು ಹಾರಿಸಲು ತೀರ್ಮಾನಿಸಿದೆ — ನಮ್ಮ ಒಪ್ಪಂದದ ಸಂಪೂರ್ಣ ಉಲ್ಲಂಘನೆ! ಅವುಗಳಲ್ಲಿ ಅನೇಕ ಫ್ರೆಂಚ್ ಹಡಗು ಮತ್ತು ಯುನೈಟೆಡ್ ಕಿಂಗ್ಡಮ್ನ ಸರಕು ಹಡಗನ್ನು ಗುರಿಯಾಗಿಸಿದ್ದವು. ಅದು ಒಳ್ಳೆಯದಾಗಲಿಲ್ಲ, ಅಲ್ಲವೇ?” ಎಂದು ಟ್ರಂಪ್ ಬರೆದಿದ್ದಾರೆ.
ಇರಾನ್ನ ಈ ಕ್ರಮಗಳು ಹೋರ್ಮುಜ್ ಜಲಸಂಧಿಯಲ್ಲಿ ಉಂಟಾಗುತ್ತಿರುವ ಅಡಚಣೆಗಳ ಮೂಲಕ ತನ್ನದೇ ಆರ್ಥಿಕತೆಗೆ ಹಾನಿಮಾಡಿಕೊಳ್ಳುತ್ತಿದೆ ಎಂದು ಟ್ರಂಪ್ ವ್ಯಂಗ್ಯವಾಡಿದ್ದಾರೆ. “ಅವರು ನಮಗೆ ತಿಳಿಯದೇ ಸಹಾಯ ಮಾಡುತ್ತಿದ್ದಾರೆ, ಆದರೆ ನಷ್ಟ ಅನುಭವಿಸುವವರು ಅವರೇ; ಈ ಮಾರ್ಗ ಮುಚ್ಚಿದರೆ ದಿನಕ್ಕೆ 500 ಮಿಲಿಯನ್ ಡಾಲರ್ ನಷ್ಟ! ಯುನೈಟೆಡ್ ಸ್ಟೇಟ್ಸ್ಗೆ ಯಾವುದೇ ನಷ್ಟವಿಲ್ಲ,” ಎಂದು ಟ್ರಂಪ್ ಹೇಳಿದರು.
ಅಮೆರಿಕದ ಅಧ್ಯಕ್ಷರು, ಇಂಧನ ಸಾಗಣೆಗಳನ್ನು ಅಮೆರಿಕದ ಬಂದರುಗಳ ಕಡೆಗೆ ಮರುನಿರ್ದೇಶಿಸಲಾಗುತ್ತಿದೆ ಎಂದು ಹೇಳಿ, “ಅನೇಕ ಹಡಗುಗಳು ಈಗಲೇ ಅಮೆರಿಕದ ಟೆಕ್ಸಾಸ್, ಲೂಯಿಸಿಯಾನಾ ಮತ್ತು ಅಲಾಸ್ಕಾಗೆ ಸರಕು ತುಂಬಿಕೊಳ್ಳಲು ಹೊರಟಿವೆ. ಇದು ಸದಾ ‘ಕಠಿಣ ವ್ಯಕ್ತಿ’ ಆಗಿರಲು ಬಯಸುವ ಐಆರ್ಜಿಸಿ ಅವರ ‘ಉಪಕಾರ’ದಿಂದ ಸಾಧ್ಯವಾಗಿದೆ ಎಂದು ಟ್ರಂಪ್ ಹೇಳಿದ್ದಾರೆ.
‘ಇನ್ನು ತಾವು ಮೃದು ಸ್ವಭಾವದ ವ್ಯಕ್ತಿ ಅಲ್ಲ’ ಎಂದು ಸೂಚಿಸಿದ ಟ್ರಂಪ್, ಮಾತುಕತೆಗೆ ಸಿದ್ಧತೆಯನ್ನು ತೋರಿಸಿದರೂ, “ನಾವು ತುಂಬಾ ನ್ಯಾಯಸಮ್ಮತ ಮತ್ತು ಯುಕ್ತಿಯುಕ್ತ ಒಪ್ಪಂದವನ್ನು ನೀಡುತ್ತಿದ್ದೇವೆ, ಅವರು ಅದನ್ನು ಸ್ವೀಕರಿಸುತ್ತಾರೆ ಎಂದು ನಾನು ಆಶಿಸುತ್ತೇನೆ. ಏಕೆಂದರೆ ಅವರು ಒಪ್ಪದಿದ್ದರೆ, ಅಮೆರಿಕ ಸಂಯುಕ್ತ ಸಂಸ್ಥಾನ ಇರಾನ್ನ ಪ್ರತಿಯೊಂದು ವಿದ್ಯುತ್ ಸ್ಥಾವರವನ್ನು, ಪ್ರತಿಯೊಂದು ಸೇತುವೆಯನ್ನು ಧ್ವಂಸ ಮಾಡಲಿದೆ” ಎಂದು ಎಚ್ಚರಿಸಿದರು. “ಇನ್ನು ಮೃದುತನಕ್ಕೆ ಅವಕಾಶ ಇಲ್ಲ! ಅವುಗಳು ಬೇಗ ಕುಸಿಯುತ್ತವೆ, ಸುಲಭವಾಗಿ ಕುಸಿಯುತ್ತವೆ ಎಂದು ಟ್ರಂಪ್ ಎಚ್ಚರಿಕೆ ನೀಡಿದ್ದಾರೆ.
ಇರಾನ್ನ ಕೊಲೆ ಯಂತ್ರಕ್ಕೆ ಅಂತ್ಯವಾಗಬೇಕಾದ ಸಮಯ ಬಂದಿದೆ!” ಎಂದು ಅವರು ಹೇಳಿದ್ದಾರೆ. ಫೆಬ್ರವರಿ 28ರಂದು ಅಮೆರಿಕಾ ಮತ್ತು ಇಸ್ರೇಲ್ ನಡೆಸಿದ ದಾಳಿಗಳ ನಂತರ, ಇರಾನ್ ಬಹುತೇಕ ಎಲ್ಲಾ ಹಡಗುಗಳಿಗೆ ಹಾರ್ಮುಜ್ ಜಲಸಂಧಿಯನ್ನು ಮುಚ್ಚಿ, ತನ್ನದೇ ಹಡಗುಗಳಿಗೆ ಮಾತ್ರ ಪ್ರವೇಶ ನೀಡುತ್ತಿದೆ. ಶುಕ್ರವಾರ ತೇಹ್ರಾನ್ ಜಲಸಂಧಿಯನ್ನು ಮರುತೆರೆಯುವುದಾಗಿ ಘೋಷಿಸಿದರೂ, ವಾಸ್ತವಿಕ ಪರಿಸ್ಥಿತಿ ಇನ್ನೂ ಸ್ಪಷ್ಟವಾಗಿಲ್ಲ. ದಿನದ ಮೊದಲ ಭಾಗದಲ್ಲಿ, ಹಡಗು-ಹಾದಿ ಮೇಲ್ವಿಚಾರಣಾ ಮಾಹಿತಿಯ ಪ್ರಕಾರ, ಎರಡು ದ್ರವೀಕೃತ ಪೆಟ್ರೋಲಿಯಂ ಅನಿಲ ಟ್ಯಾಂಕರ್ಗಳು ಜಲಸಂಧಿಯತ್ತ ಸಾಗುತ್ತಿರುವುದು ಕಂಡುಬಂದಿತು. ಆದರೆ ಇರಾನ್ನ ತಸ್ನೀಂ ಸುದ್ದಿ ಸಂಸ್ಥೆ, ತನ್ನ ಸಶಸ್ತ್ರ ಪಡೆಗಳು ಆ ಹಡಗುಗಳನ್ನು ಹಿಂತಿರುಗಿಸಿದ್ದಾಗಿ ವರದಿ ಮಾಡಿತು.
ಸಮುದ್ರ ಸಂಚಾರ ದಾಖಲೆಗಳು ಮಧ್ಯರಾತ್ರಿಯ ನಂತರ ಬಹಳ ಕಡಿಮೆ ಅಥವಾ ಯಾವುದೇ ಚಲನವಲನವನ್ನು ತೋರಿಸಲಿಲ್ಲ. ಈ ಸಂಘರ್ಷ ಈಗ ಎಂಟನೇ ವಾರಕ್ಕೆ ಕಾಲಿಟ್ಟಿದ್ದು, ಜಾಗತಿಕ ಇಂಧನ ಸರಬರಾಜಿನ ಮೇಲೆ ಅಪೂರ್ವ ಆಘಾತವನ್ನುಂಟುಮಾಡಿದೆ.
ಸಾಮಾನ್ಯವಾಗಿ ವಿಶ್ವದ ಸುಮಾರು ಐದನೇ ಭಾಗದ ಕಚ್ಚಾ ತೈಲ ಸಾಗಣೆಯನ್ನು ಹೊತ್ತೊಯ್ಯುವ ಈ ಜಲಸಂಧಿ ಬಹುತೇಕ ಮುಚ್ಚಿರುವುದರಿಂದ, ತೈಲದ ಬೆಲೆಗಳು ಏರಿಕೆ ಕಂಡಿವೆ. ಏಪ್ರಿಲ್ 22ರ ಯುದ್ಧ ವಿರಾಮ ಗಡುವು ಸಮೀಪಿಸುತ್ತಿರುವುದರಿಂದ ಇರಾನ್ ಮೇಲೆ ಒತ್ತಡ ಹೆಚ್ಚಾಗಿದೆ. ಒಪ್ಪಂದಕ್ಕೆ ಬರದಿದ್ದರೆ, ಅಮೆರಿಕಾ ವ್ಯಾಪಕ ಹೊಸ ನಿರ್ಬಂಧಗಳನ್ನು ವಿಧಿಸುವುದರ ಜೊತೆಗೆ, ಇರಾನ್ನ ಅಣು ಮತ್ತು ಸೈನಿಕ ಕೇಂದ್ರಗಳ ಮೇಲೆ ನೇರ ಸೈನಿಕ ದಾಳಿಗಳನ್ನು ಪರಿಗಣಿಸಬಹುದು ಎಂದು ಎಚ್ಚರಿಸಿದೆ.