ವಾಷಿಂಗ್ಟನ್: ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ಲೆಬನಾನ್ ರಾಜಧಾನಿ ಬೈರುತ್ ಮೇಲೆ ನಡೆಸಿದ ವೈಮಾನಿಕ ದಾಳಿಯಿಂದ ಇರಾನ್ ಶಾಂತಿ ಒಪ್ಪಂದ ಬಹುತೇಕ 'ಹಳಿತಪ್ಪಿದೆ'. ಇದು ವಾಷಿಂಗ್ಟನ್ ಮತ್ತು ಟೆಹ್ರಾನ್ ನಡುವಿನ ಒಪ್ಪಂದವನ್ನು ವಿಳಂಬಗೊಳಿಸಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ.
ನೆತನ್ಯಾಹು ಅವರನ್ನು 'ತುಂಬಾ ಕಠಿಣ ವ್ಯಕ್ತಿ' ಎಂದು ಕರೆದ ಟ್ರಂಪ್, ಇರಾನ್ ಪರಮಾಣು ಶಸ್ತ್ರಾಸ್ತ್ರ ಹೊಂದುವುದನ್ನು ತಡೆಯಲು ಶಾಂತಿ ಒಪ್ಪಂದದ ಮಾತುಕತೆ ನಡೆಸಿದ್ದಕ್ಕಾಗಿ ಇಸ್ರೇಲ್ ಅಮೆರಿಕಕ್ಕೆ 'ತುಂಬಾ ಕೃತಜ್ಞರಾಗಿರಬೇಕು' ಎಂದಿದ್ದಾರೆ.
ದಿ ನ್ಯೂಯಾರ್ಕ್ ಟೈಮ್ಸ್ಗೆ ನೀಡಿದ ಫೋನ್ ಸಂದರ್ಶನದಲ್ಲಿ, ನೆತನ್ಯಾಹು 'ತುಂಬಾ ಕಠಿಣ ವ್ಯಕ್ತಿ' ಮತ್ತು ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ನಾವು ಶಾಂತಿ ಒಪ್ಪಂದಕ್ಕೆ ತಂದಿರುವುದಕ್ಕಾಗಿ ಅವರು ನಮಗೆ ತುಂಬಾ ಕೃತಜ್ಞರಾಗಿರಬೇಕು. ಏಕೆಂದರೆ, ಇರಾನ್ ಪರಮಾಣು ಶಸ್ತ್ರಾಸ್ತ್ರವನ್ನು ಹೊಂದಿದ್ದರೆ, ಇಸ್ರೇಲ್ ಎರಡು ಗಂಟೆಗಳ ಕಾಲಲೂ ಉಳಿಯುತ್ತಿರಲಿಲ್ಲ' ಎಂದು ಅವರು ಹೇಳಿದರು.
ಲೆಬನಾನ್ ಸೇರಿದಂತೆ ಎಲ್ಲ ರಂಗಗಳಲ್ಲಿನ ಮಿಲಿಟರಿ ಕಾರ್ಯಾಚರಣೆಗಳಿಗೆ 'ತಕ್ಷಣ ಮತ್ತು ಶಾಶ್ವತ' ಅಂತ್ಯ ಇದಾಗಿದೆ. ಈ ಒಪ್ಪಂದಕ್ಕೆ ಜೂನ್ 19 ರಂದು ಸ್ವಿಟ್ಜರ್ಲೆಂಡ್ನಲ್ಲಿ ಸಹಿ ಹಾಕಲಾಗುವುದು ಮತ್ತು ಹಾರ್ಮುಜ್ ಜಲಸಂಧಿಯ ಮೂಲಕ ವಾಣಿಜ್ಯ ಹಡಗು ಮಾರ್ಗವನ್ನು ತೆರೆಯಲು ಮತ್ತು ಇರಾನ್ನ ಪರಮಾಣು ಕಾರ್ಯಕ್ರಮದ ಭವಿಷ್ಯಕ್ಕೆ ಮಾರ್ಗಸೂಚಿಗಳನ್ನು ರೂಪಿಸುತ್ತದೆ ಎಂದು ಅಮೆರಿಕ ಮತ್ತು ಇರಾನ್ ಹೇಳಿವೆ.
ಆದರೆ, ಇಸ್ರೇಲ್ಗೆ ಅದನ್ನು ಒಪ್ಪಿಕೊಳ್ಳುವುದು ಕಷ್ಟವಾಗಬಹುದು. ಅಮೆರಿಕ-ಇರಾನ್ ಒಪ್ಪಂದದ ಕುರಿತಾದ ಒಪ್ಪಂದದ ಸುದ್ದಿಗಳಿಗೆ ತಕ್ಷಣ ಪ್ರತಿಕ್ರಿಯಿಸಿಲ್ಲ.
ಇರಾನ್ ಮತ್ತು ಲೆಬನಾನ್ನಲ್ಲಿರುವ ಹೆಜ್ಬೊಲ್ಲಾ ಸೇರಿದಂತೆ ಅದರ ಪ್ರಾಕ್ಸಿಗಳೊಂದಿಗಿನ ಸಂಘರ್ಷವನ್ನು ಮುಂದುವರಿಸಲು ಇಸ್ರೇಲ್ ಪ್ರಧಾನಿ ನೆತನ್ಯಾಹು ಅವರಿಗೆ ದೇಶೀಯ ರಾಜಕೀಯ ಕಾರಣಗಳಿವೆ ಎಂದು ವರದಿಯಾಗಿದೆ.
ಶಾಂತಿ ಒಪ್ಪಂದದ ನಿಯಮಗಳಲ್ಲಿ ನಿಗದಿಪಡಿಸಿದ ಗಡುವಿನೊಳಗೆ ಇರಾನ್ ಅಮೆರಿಕದೊಂದಿಗೆ ಅಂತಿಮ ಪರಮಾಣು ಒಪ್ಪಂದ ಮಾಡಿಕೊಳ್ಳುವಲ್ಲಿ ಟೆಹ್ರಾನ್ನ ನಾಯಕತ್ವ ವಿಫಲವಾದರೆ, ಅಮೆರಿಕ ಇರಾನ್ ವಿರುದ್ಧ ಮಿಲಿಟರಿ ದಾಳಿಗಳನ್ನು ಪುನರಾರಂಭಿಸಬಹುದು ಅಥವಾ ಅಮೆರಿಕವು 'ಮಧ್ಯಪ್ರಾಚ್ಯದ ರಕ್ಷಕ'ನಾಗಿ ಕಾರ್ಯನಿರ್ವಹಿಸಬಹುದು ಎಂದು ಟ್ರಂಪ್ ನ್ಯೂಯಾರ್ಕ್ ಟೈಮ್ಸ್ಗೆ ತಿಳಿಸಿದ್ದಾರೆ.
ಇರಾನ್ ಜೊತೆ ಮಾಡಿಕೊಂಡ ಒಪ್ಪಂದವು ಅಂತಿಮವಾಗಿ ಹಾರ್ಮುಜ್ ಜಲಸಂಧಿಯ ಮೂಲಕ ಸಾಗುವ ಹಡಗು ಮಾರ್ಗವು 'ಶಾಶ್ವತವಾಗಿ ಟೋಲ್-ಮುಕ್ತ'ವಾಗಿರುವುದನ್ನು ಖಚಿತಪಡಿಸುತ್ತದೆ ಎಂದು ಟ್ರಂಪ್ ಹೇಳಿದ್ದಾರೆ.
ಸೌದಿ ಅರೇಬಿಯಾ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ನಂತಹ ಗಲ್ಫ್ನಲ್ಲಿರುವ ಅಮೆರಿಕದ ಮಿತ್ರರಾಷ್ಟ್ರಗಳು, ಅಗತ್ಯ ಬಿದ್ದರೆ ಅಮೆರಿಕವು ಮಧ್ಯಪ್ರಾಚ್ಯಕ್ಕೆ ಪೇಯ್ಡ್ ಭದ್ರತಾ ಪಡೆ ಆಗಿ ಕಾರ್ಯನಿರ್ವಹಿಸಬಹುದು ಎಂಬ ಅವರ ಕಲ್ಪನೆಯನ್ನು ಒಪ್ಪಿಕೊಂಡಿವೆಯೇ ಎಂದು ವರದಿಗಾರರೊಬ್ಬರು ಕೇಳಿದಾಗ, ಟ್ರಂಪ್ ಅದರಿಂದ ನುಣುಚಿಕೊಂಡರು ಮತ್ತು ಈ ವಿಚಾರದ ಕುರಿತು ಚರ್ಚೆಗಳು ಇತ್ತೀಚೆಗೆ ಪ್ರಾರಂಭವಾಗಿವೆ. ಇರಾನ್ ಎದುರಾಳಿಯಾಗಿ ಉಳಿದರೆ ಮಾತ್ರ ಅದು ಸಂಭವಿಸುತ್ತದೆ ಎಂದು ಹೇಳಿದರು.
ಹೊಸ ಸರ್ವೋಚ್ಚ ನಾಯಕ ಅಯತೊಲ್ಲಾ ಮೊಜ್ತಬಾ ಖಮೇನಿ ಸೇರಿದಂತೆ ಇರಾನ್ನ ಸದ್ಯದ ನಾಯಕತ್ವವನ್ನು ವಾಸ್ತವ ಮತ್ತು ವ್ಯಾವಹಾರಿಕವಾದಿಗಳು ಎಂದು ಟ್ರಂಪ್ ಕರೆದರು.