ಮಧ್ಯಂತರ ಚುನಾವಣೆಯಲ್ಲಿ ತೀವ್ರ ಹಿನ್ನಡೆ ಎದುರಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅಮೆರಿಕದ ನಾಗರಿಕರಿಗೆ ತಮ್ಮ ಬಗ್ಗೆ ಬೇಸರ ಮೂಡಿದರೆ, ತಾವು ಇಸ್ರೇಲ್‌ಗೆ ತೆರಳಿ ಅಲ್ಲಿನ ಪ್ರಧಾನ ಮಂತ್ರಿಯಾಗುವುದಾಗಿ ಹೇಳಿದರು.
'ಫಾಕ್ಸ್ ನ್ಯೂಸ್'ನ 'ಫಾಕ್ಸ್ ಅಂಡ್ ಫ್ರೆಂಡ್ಸ್' ಕಾರ್ಯಕ್ರಮದಲ್ಲಿ ಮಾತನಾಡುತ್ತಿದ್ದ ಟ್ರಂಪ್ ಈ ಅಭಿಪ್ರಾಯ ವ್ಯಕ್ತಪಡಿಸಿದರು. "ಇಸ್ರೇಲ್‌ನಲ್ಲಿ ನನ್ನ ಜನಪ್ರಿಯತೆ (ಅಪ್ರೂವಲ್ ರೇಟಿಂಗ್) ಶೇಕಡಾ 99ರಷ್ಟಿದೆ. ಅಮೆರಿಕದ ಜನರಿಗೆ ನನ್ನ ಬಗ್ಗೆ ಬೇಸರ ಬಂದರೆ, ನಾನು ಇಸ್ರೇಲ್‌ಗೆ ಹೋಗಿ ಅಲ್ಲಿನ ಪ್ರಧಾನ ಮಂತ್ರಿಯಾಗುತ್ತೇನೆ," ಎಂದು ಹೇಳಿದರು.
ಅದೇ ಸಂದರ್ಶನದಲ್ಲಿ, ಇಸ್ರೇಲ್‌ನ ಪ್ರಸ್ತುತ ಪ್ರಧಾನ ಮಂತ್ರಿ ಬೆಂಜಮಿನ್ ನೆತನ್ಯಾಹು ಅವರೊಂದಿಗೆ ತಾವು ಒಂದು ಒಪ್ಪಂದ ಮಾಡಿಕೊಂಡಿರುವುದಾಗಿ ಟ್ರಂಪ್ ಬಹಿರಂಗಪಡಿಸಿದರು. ಈ ಒಪ್ಪಂದದ ಪ್ರಕಾರ, ಈ ವರ್ಷದ ಅಂತ್ಯದ ನಂತರ ವಾಷಿಂಗ್ಟನ್ (ಅಮೆರಿಕ) ಇಸ್ರೇಲ್‌ಗೆ ನೀಡುತ್ತಿರುವ 4 ಬಿಲಿಯನ್ ಡಾಲರ್ ಸಹಾಯಧನವನ್ನು ನಿಲ್ಲಿಸಲಿದೆ.
ಟ್ರಂಪ್ ಅವರ ಪ್ರಕಾರ, ಇಸ್ರೇಲ್‌ಗೆ ನ್ನು ಮುಂದೆ ಈ ಸಹಾಯಧನದ ಅಗತ್ಯವಿಲ್ಲ. ಅಲ್ಲದೆ, ಕೆಲವು ಡೆಮಾಕ್ರಟಿಕ್ ಪಕ್ಷದವರು ಮತ್ತು ಎಡಪಂಥೀಯ ರಾಜಕಾರಣಿಗಳು, ಇಸ್ರೇಲ್‌ಗೆ ನೀಡಲಾಗುವ ಈ ಹಣಕಾಸಿನ ನೆರವನ್ನು ರಿಪಬ್ಲಿಕನ್ ಪಕ್ಷವನ್ನು ಟೀಕಿಸಲು ಬಳಸಿಕೊಳ್ಳುತ್ತಿದ್ದರು.
"ಇಸ್ರೇಲ್‌ಗೆ ಹಣ ನೀಡುವ ವಿಷಯಕ್ಕೆ ಬಂದರೆ, ಬಿಬಿ ನೆತನ್ಯಾಹು ಮತ್ತು ನಾನು ಒಂದು ಒಪ್ಪಂದ ಮಾಡಿಕೊಂಡಿದ್ದೇವೆ. ನಾವು ಇಸ್ರೇಲ್‌ಗೆ ವರ್ಷಕ್ಕೆ 4 ಬಿಲಿಯನ್ ಡಾಲರ್ ನೀಡುತ್ತಿದ್ದೆವು, ಆದರೆ ಅದನ್ನು ನಿಲ್ಲಿಸಲು ನಾವು ತಿಂಗಳುಗಳ ಹಿಂದೆಯೇ ಒಪ್ಪಂದ ಮಾಡಿಕೊಂಡಿದ್ದೇವೆ," ಎಂದು ಟ್ರಂಪ್ ತಿಳಿಸಿದರು.
"ಈ ವರ್ಷದ ಅಂತ್ಯದ ವೇಳೆಗೆ ನಾವು ಇಸ್ರೇಲ್‌ಗೆ ಹಣ ನೀಡುವುದನ್ನು ನಿಲ್ಲಿಸುತ್ತೇವೆ ಎಂದು ಈಗಾಗಲೇ ಒಪ್ಪಿಕೊಂಡಿದ್ದೇವೆ. ಆದರೆ, ಮುಂದಿನ ದಿನಗಳಲ್ಲಿ ಇಸ್ರೇಲ್‌ಗೆ ಅಗತ್ಯವಿದ್ದರೆ ನಾವು ಖಂಡಿತವಾಗಿಯೂ ಸಹಾಯ ಮಾಡುತ್ತೇವೆ," ಎಂದು ಅವರು ಹೇಳಿದ್ದಾರೆ.
ಅಮೆರಿಕದ ಮಧ್ಯಂತರ ಚುನಾವಣೆಯಲ್ಲಿ ಡೆಮಾಕ್ರಾಟ್ ಪಕ್ಷದ ಅಭ್ಯರ್ಥಿಗಳು ಪ್ರಾಬಲ್ಯ ಸಾಧಿಸಿದ್ದು ಆಡಳಿತಾರೂಢ ರಿಪಬ್ಲಿಕನ್ನರಿಗೆ ತೀವ್ರ ಹಿನ್ನಡೆಯುಂಟಾಗಿದೆ.