ಅಮೆರಿಕ ಮತ್ತು ಇರಾನ್ ನಡುವಿನ ಉದ್ವಿಗ್ನತೆ ತೀವ್ರಗೊಂಡಿದ್ದು, ಇರಾನ್ ವಿರುದ್ಧದ ಮುಂದಿನ ಕಠಿಣ ಕ್ರಮಗಳ ಕುರಿತು ಅಮೆರಿಕ ಈಗ "ಅಂತಿಮ ನಿರ್ಧಾರ ಕೈಗೊಳ್ಳುವ ಹಂತದಲ್ಲಿದೆ" ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶನಿವಾರ ಘೋಷಿಸಿದ್ದಾರೆ.
ಶ್ವೇತಭವನದ ಹೊರಗೆ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಈ ಬಿಕ್ಕಟ್ಟು "ಸುಲಭದ ದಾರಿ ಅಥವಾ ಕಠಿಣ ದಾರಿಯ" ಮೂಲಕ ಬಗೆಹರಿಯಲಿದೆ ಎಂದು ಇರಾನ್‌ಗೆ ನೇರ ಎಚ್ಚರಿಕೆ ನೀಡಿದ್ದಾರೆ.
ಕಳೆದ ಏಳು ತಿಂಗಳ ನಿರಂತರ ಸಂಘರ್ಷದಿಂದಾಗಿ ಇರಾನ್ ಆರ್ಥಿಕವಾಗಿ ಮತ್ತು ಮಿಲಿಟರಿ ಪರವಾಗಿ ಸಂಪೂರ್ಣವಾಗಿ "ಧ್ವಂಸಗೊಂಡಿದೆ" ಎಂದು ಪ್ರತಿಪಾದಿಸಿದ್ದಾರೆ.
“ಇರಾನ್ ಕುರಿತು ನಾನು ನಿರ್ಧಾರ ಕೈಗೊಳ್ಳಬೇಕಿದೆ. ಇರಾನ್ ನಾಶವಾಗಿದೆ. ಹಾಗಾಗಿ ಈಗಿರುವ ಏಕೈಕ ಪ್ರಶ್ನೆಯೆಂದರೆ, ಅದು ಸುಲಭ ಮಾರ್ಗವಾಗಿರುತ್ತದೆಯೇ ಅಥವಾ ಕಠಿಣ ಮಾರ್ಗವಾಗಿರುತ್ತದೆಯೇ ಎಂಬುದು. ನಾವು ಸುಲಭ ಮಾರ್ಗ ಅಥವಾ ಕಠಿಣ ಮಾರ್ಗವನ್ನು ಆಯ್ಕೆ ಮಾಡುತ್ತೇವೆ. ಇರಾನ್ ಅಣ್ವಸ್ತ್ರ ಹೊಂದುವ ಯಾವುದೇ ಯೋಜನೆಯನ್ನು ಬಹುತೇಕ ಕೈಬಿಟ್ಟಿದೆ. ಇರಾನ್ ‘ನಾಶವಾಗಿದೆ’ ಎಂದು ಬಣ್ಣಿಸಿದ್ದಾರೆ.
ಟ್ರಂಪ್ ಅವರ ಈ ಹೇಳಿಕೆ ಬೆನ್ನಲ್ಲೇ, ಅಮೆರಿಕ ಮತ್ತೆ ದೊಡ್ಡ ಪ್ರಮಾಣದ ದಾಳಿ ನಡೆಸಿದರೆ ಇರಾನ್ ಸೇನಾ ಪ್ರತಿಕ್ರಿಯೆಗೆ ಸಿದ್ಧತೆ ನಡೆಸುತ್ತಿದೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.
ಮತ್ತೆ ಅಮೆರಿಕ ಸೇನಾ ಕಾರ್ಯಾಚರಣೆ ಆರಂಭವಾದರೆ, ಈ ಹಿಂದೆ ನೀಡಿದ್ದ ಪ್ರತಿಕ್ರಿಯೆಗಿಂತಲೂ ಬಲವಾದ ಪ್ರತಿಕ್ರಿಯೆ ನೀಡಬೇಕಾಗುತ್ತದೆ ಎಂಬ ನಿಲುವಿನಲ್ಲಿ ಇರಾನ್ ನಾಯಕತ್ವವಿದೆ ಎಂದು ವರದಿ ತಿಳಿಸಿದೆ.
ಇರಾನ್‌ನ ಹಿರಿಯ ಸೇನಾ ಕಮಾಂಡರ್‌ಗಳು ಸಂಭಾವ್ಯ ಗುರಿಗಳ ವ್ಯಾಪ್ತಿಯನ್ನು ವಿಸ್ತರಿಸುವ ಯೋಜನೆಗಳನ್ನು ಪರಿಶೀಲಿಸುತ್ತಿದ್ದಾರೆ. ಅಮೆರಿಕಕ್ಕೆ ಸಂಬಂಧಿಸಿದ ನೆಲೆಗಳಷ್ಟೇ ಅಲ್ಲದೆ, ಅಮೆರಿಕದ ಸೇನಾ ಕಾರ್ಯಾಚರಣೆಗಳಿಗೆ ಬೆಂಬಲ ನೀಡುವ ದೇಶಗಳು ಹಾಗೂ ಮಧ್ಯಪ್ರಾಚ್ಯದ ಹೊರಗಿನ ಕೆಲವು ಸ್ಥಳಗಳನ್ನೂ ಗುರಿಯಾಗಿಸುವ ಸಾಧ್ಯತೆಯನ್ನು ಪರಿಶೀಲಿಸಲಾಗುತ್ತಿದೆ ಎಂದು ಚರ್ಚೆಗಳ ಕುರಿತು ಮಾಹಿತಿ ಹೊಂದಿರುವ ಮೂವರು ಹಿರಿಯ ಇರಾನಿನ ಅಧಿಕಾರಿಗಳು ಹಾಗೂ ಮತ್ತೊಬ್ಬರು ರಾಯಿಟರ್ಸ್‌ಗೆ ತಿಳಿಸಿದ್ದಾರೆ.
ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ನ್ಯೂಯಾರ್ಕ್‌ನಿಂದ ಮರಳಿದ ಬಳಿಕ, ವಾಷಿಂಗ್ಟನ್ ಹೊಸ ದಾಳಿ ನಡೆಸಿದರೆ ಪ್ರತಿಕ್ರಿಯೆಯ ವ್ಯಾಪ್ತಿ ಮತ್ತು ಸಮಯದ ಬಗ್ಗೆ ಸೇನಾ ಕಮಾಂಡರ್‌ಗಳು ಹಾಗೂ ಹಿರಿಯ ಅಧಿಕಾರಿಗಳು ಚರ್ಚೆ ನಡೆಸುತ್ತಿದ್ದಾರೆ.
ಯಾವುದೇ ಅಂತಿಮ ನಿರ್ಧಾರ ಕೈಗೊಳ್ಳಲಾಗಿಲ್ಲ. ಆದರೆ, ಎರಡೂ ಕಡೆಯಿಂದ ರಾಜಿ ಮಾಡಿಕೊಳ್ಳುವ ಮನಸ್ಸು ಕಾಣದ ಹಿನ್ನೆಲೆಯಲ್ಲಿ ಸೇನಾ ಸಿದ್ಧತೆ ಮತ್ತು ಯೋಜನೆಗಳು ತೀವ್ರಗೊಂಡಿವೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.
ಫೆಬ್ರವರಿ 28ರಂದು ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ದಾಳಿಗಳಿಂದ ಆರಂಭವಾದ ಏಳು ತಿಂಗಳ ಸಂಘರ್ಷದ ಹಿನ್ನೆಲೆಯಲ್ಲಿ ಈ ಬೆಳವಣಿಗೆ ನಡೆದಿದೆ. ಏಪ್ರಿಲ್ 8ರಂದು ಕದನ ವಿರಾಮದ ಮೂಲಕ 40 ದಿನಗಳ ಯುದ್ಧ ಅಂತ್ಯಗೊಂಡಿದ್ದರೂ, ಆ ಬಳಿಕವೂ ಆಗಾಗ್ಗೆ ಸಂಘರ್ಷ ಮುಂದುವರಿದಿದೆ.
ಇಂಟರ್‌ನ್ಯಾಷನಲ್ ಕ್ರೈಸಿಸ್ ಗ್ರೂಪ್‌ನ ಹಿರಿಯ ಇರಾನ್ ವಿಶ್ಲೇಷಕ ಹಮೀದ್ರೆಝಾ ಅಝೀಝಿ ಅವರು ರಾಯಿಟರ್ಸ್ ಜೊತೆಗೆ ಮಾತನಾಡಿ, ಟ್ರಂಪ್ ಮತ್ತೊಂದು ದೊಡ್ಡ ಪ್ರಮಾಣದ ಸೇನಾ ಕಾರ್ಯಾಚರಣೆ ನಡೆಸಲಿದ್ದಾರೆಯೇ ಅಥವಾ ಅಣುಸ್ಥಾವರಗಳ ಮೇಲಿನ ದಾಳಿ ಸೇರಿದಂತೆ ಸೀಮಿತ ದಾಳಿಗಳಿಗೆ ಮುಂದಾಗಲಿದ್ದಾರೆಯೇ ಎಂಬ ಬಗ್ಗೆ ಟೆಹ್ರಾನ್‌ಗೆ ಇನ್ನೂ ಸ್ಪಷ್ಟತೆ ಇಲ್ಲ ಎಂದು ಹೇಳಿದ್ದಾರೆ.
“ಆದರೆ, ಸಾಂಕೇತಿಕ ಕ್ರಮಕ್ಕೆ ಸಾಂಕೇತಿಕ ಪ್ರತಿಕ್ರಿಯೆ ನೀಡದೇ, ತಡೆ ಸಾಮರ್ಥ್ಯವನ್ನು ಮರುಸ್ಥಾಪಿಸುವ ಉದ್ದೇಶದಿಂದ ಸಂಘರ್ಷವನ್ನು ಮತ್ತಷ್ಟು ತೀವ್ರಗೊಳಿಸಲು ಅವರು ನಿರ್ಧರಿಸಿದಂತೆ ಕಾಣುತ್ತದೆ” ಎಂದು ಅಝೀಝಿ ಹೇಳಿದ್ದಾರೆ.
ಅಮೆರಿಕ ಮತ್ತೆ ದೊಡ್ಡ ಪ್ರಮಾಣದ ಸೇನಾ ಕಾರ್ಯಾಚರಣೆ ನಡೆಸಿದರೆ ಇರಾನ್‌ಗೆ ಬೆಂಬಲ ನೀಡಲು ಸಿದ್ಧವಾಗಿರುವಂತೆ ಲೆಬನಾನ್, ಯೆಮೆನ್ ಮತ್ತು ಇರಾಕ್‌ನಲ್ಲಿರುವ ತನ್ನ ಮಿತ್ರ ಗುಂಪುಗಳಿಗೆ ಟೆಹ್ರಾನ್ ಸೂಚನೆ ನೀಡಿದೆ ಎಂದು ಇಬ್ಬರು ಇರಾನಿನ ಅಧಿಕಾರಿಗಳು ರಾಯಿಟರ್ಸ್‌ಗೆ ತಿಳಿಸಿದ್ದಾರೆ.
“ಹೋರ್ಮುಜ್ ಜಲಸಂಧಿಯಿಂದ ಹಿಡಿದು ಈ ಪ್ರದೇಶದಲ್ಲಿನ ಅಮೆರಿಕದ ಹಿತಾಸಕ್ತಿಗಳು ಹಾಗೂ ಮಧ್ಯಪ್ರಾಚ್ಯದ ಹೊರಗಿನ ಅಮೆರಿಕದ ಹಿತಾಸಕ್ತಿಗಳವರೆಗೆ” ವ್ಯಾಪಿಸುವ ಸಮನ್ವಯಿತ ಪ್ರತಿಕ್ರಿಯೆಗೆ ಸಿದ್ಧರಾಗುವಂತೆ ಸೂಚಿಸಲಾಗಿದೆ ಎಂದು ಅವರು ಹೇಳಿದ್ದಾರೆ.
ಇದೇ ವೇಳೆ, ಅಮೆರಿಕದೊಂದಿಗೆ ರಾಜತಾಂತ್ರಿಕ ಸಂಪರ್ಕದ ಬಾಗಿಲನ್ನು ಟೆಹ್ರಾನ್ ತೆರೆದಿಟ್ಟಿದೆ. ಆದರೆ, ಮಾತುಕತೆಯಲ್ಲಿ ಮಹತ್ವದ ಪ್ರಗತಿ ಸಾಧಿಸುವ ಸಾಧ್ಯತೆ ಕಡಿಮೆ ಎಂದು ಇರಾನಿನ ಅಧಿಕಾರಿಗಳು ಖಾಸಗಿಯಾಗಿ ಅಭಿಪ್ರಾಯಪಟ್ಟಿದ್ದಾರೆ.
ರಾಯಿಟರ್ಸ್ ವರದಿ ಪ್ರಕಾರ, ನ್ಯೂಯಾರ್ಕ್‌ನಲ್ಲಿ ನಡೆದ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ ಸಂದರ್ಭದಲ್ಲಿ ಕತಾರ್ ಮಧ್ಯಸ್ಥಿಕೆಯ ಮೂಲಕ ಇರಾನ್ ವಾಷಿಂಗ್ಟನ್‌ಗೆ ಪ್ರಸ್ತಾವನೆಯೊಂದನ್ನು ಸಲ್ಲಿಸಿತ್ತು.
ಕದನವನ್ನು ನಿಲ್ಲಿಸುವುದು, ಇರಾನ್ ಬಂದರುಗಳ ಮೇಲಿನ ಅಮೆರಿಕದ ದಿಗ್ಬಂಧನ ತೆರವುಗೊಳಿಸುವುದು, ಸ್ಥಗಿತಗೊಳಿಸಿರುವ ಕನಿಷ್ಠ 12 ಬಿಲಿಯನ್ ಡಾಲರ್ ಮೌಲ್ಯದ ಇರಾನಿನ ಹಣವನ್ನು ಬಿಡುಗಡೆ ಮಾಡುವುದು ಮತ್ತು ತೈಲ ನಿರ್ಬಂಧದಿಂದ ವಿನಾಯಿತಿ ನೀಡುವುದು ಈ ಪ್ರಸ್ತಾವನೆಯ ಪ್ರಮುಖ ಅಂಶಗಳಾಗಿವೆ.
ಈ ವ್ಯವಸ್ಥೆಗೆ ಒಪ್ಪಿಗೆ ದೊರೆತರೆ ಏಳು ದಿನಗಳೊಳಗೆ ಹೋರ್ಮುಜ್ ಜಲಸಂಧಿಯನ್ನು ಮತ್ತೆ ತೆರೆಯಬಹುದು ಮತ್ತು ಇಡೀ ಪ್ರದೇಶದಲ್ಲಿನ ಸಂಘರ್ಷವನ್ನು ನಿಲ್ಲಿಸಬಹುದು ಎಂದು ಇರಾನ್ ತಿಳಿಸಿದೆ.