ನವದೆಹಲಿ: ಮಧ್ಯಪ್ರಾಚ್ಯದಲ್ಲಿ ಹೊತ್ತಿ ಉರಿಯುತ್ತಿರುವ ಯುದ್ಧದ ಕಿಡಿ ಈಗ ಭಾರತದ ಹಿತ್ತಲಾಗಿರುವ ಹಿಂದೂ ಮಹಾಸಾಗರಕ್ಕೂ (Indian Ocean) ವ್ಯಾಪಿಸುವ ಭೀತಿ ಎದುರಾಗಿದೆ.
ಅಮೆರಿಕ ಅಥವಾ ಇಸ್ರೇಲ್ ಮತ್ತೊಮ್ಮೆ ತನ್ನ ಮೇಲೆ ದಾಳಿ ನಡೆಸಿದರೆ, ಯುದ್ಧದ ವ್ಯಾಪ್ತಿಯನ್ನು ಹಿಂದೂ ಮಹಾಸಾಗರಕ್ಕೂ ವಿಸ್ತರಿಸುವುದಾಗಿ ಇರಾನ್ ಎಚ್ಚರಿಕೆ ನೀಡಿದೆ. ಇರಾನ್ನ ಈ ಹೇಳಿಕೆ ಜಾಗತಿಕ ರಾಜಕೀಯದಲ್ಲಿ ಸಂಚಲನ ಮೂಡಿಸಿದ್ದು, ಭಾರತಕ್ಕೆ ಹೊಸ ಆತಂಕವನ್ನು ಹುಟ್ಟುಹಾಕಿದೆ.
ಇಂಧನ ಪೂರೈಕೆ ಮತ್ತು ಸಾಗರ ಮಾರ್ಗದ ವ್ಯಾಪಾರಕ್ಕಾಗಿ ಭಾರತ ಈ ಪ್ರದೇಶವನ್ನು ಹೆಚ್ಚಿನ ಪ್ರಮಾಣದಲ್ಲಿ ಅವಲಂಬಿಸಿರುವುದರಿಂದ ಸಂಘರ್ಷ ಮತ್ತಷ್ಟು ವಿಸ್ತರಿಸಿದರೆ ಅದರ ಪರಿಣಾಮ ಭಾರತದ ಮೇಲೂ ಬೀರುವ ಸಾಧ್ಯತೆಯಿದೆ.
ಇರಾನ್ನ ಪರಮೋಚ್ಚ ನಾಯಕ ಮೊಜ್ತಬಾ ಖಮೇನಿಯ ಸಲಹೆಗಾರ ಯಾಹ್ಯಾ ರಹೀಮ್ ಸಫಾವಿ ಗುರುವಾರ ಈ ಎಚ್ಚರಿಕೆ ನೀಡಿದ್ದಾರೆ.
ಅಮೆರಿಕ ಅಥವಾ ಇಸ್ರೇಲ್ ಮತ್ತಷ್ಟು ದಾಳಿಗಳನ್ನು ನಡೆಸಿದರೆ ಇರಾನ್ ಸಂಘರ್ಷದ ವ್ಯಾಪ್ತಿಯನ್ನು ವಿಸ್ತರಿಸಬಹುದು ಎಂದು ಅವರು ಹೇಳಿದ್ದಾರೆ.
ಇರಾನ್ನ ಫಾರ್ಸ್ ಸುದ್ದಿ ಸಂಸ್ಥೆ ಬಿಡುಗಡೆ ಮಾಡಿರುವ ವಿಡಿಯೊದಲ್ಲಿ ಮಾತನಾಡಿರುವ ಸಫಾವಿ, ಸಂಘರ್ಷವು ಪರ್ಷಿಯನ್ ಕೊಲ್ಲಿ ಮತ್ತು ಹಾರ್ಮುಜ್ ಜಲಸಂಧಿಯಿಂದ ಕೆಂಪು ಸಮುದ್ರದತ್ತ ವಿಸ್ತರಿಸಿರುವ ಹಿನ್ನೆಲೆಯಲ್ಲಿ, ಮತ್ತಷ್ಟು ಯುದ್ಧ ನಡೆದರೆ ಸಂಘರ್ಷದ ವ್ಯಾಪ್ತಿ ಇನ್ನಷ್ಟು ವಿಸ್ತರಿಸಿ ಹಿಂದೂ ಮಹಾಸಾಗರ ಹಾಗೂ ಅದಕ್ಕೂ ಮೀರಿದ ಪ್ರದೇಶಗಳಿಗೂ ತಲುಪುವ ಸಾಧ್ಯತೆಯಿದೆ ಎಂದು ಹೇಳಿದ್ದಾರೆ.
ಸಂಘರ್ಷ ಹಿಂದೂ ಮಹಾಸಾಗರದತ್ತ ವಿಸ್ತರಿಸಿದರೆ ಅದು ಭಾರತಕ್ಕೆ ಇನ್ನಷ್ಟು ಹತ್ತಿರ ತರಲಿದೆ. ಅಲ್ಲದೆ, ಭಾರತವನ್ನು ಮಧ್ಯಪ್ರಾಚ್ಯ, ಯುರೋಪ್ ಮತ್ತು ಆಫ್ರಿಕಾದೊಂದಿಗೆ ಸಂಪರ್ಕಿಸುವ ಪ್ರಮುಖ ಸಾಗರ ಮಾರ್ಗಗಳಲ್ಲಿನ ವಾಣಿಜ್ಯ ಹಡಗು ಸಂಚಾರಕ್ಕೂ ಅಡ್ಡಿಯಾಗುವ ಸಾಧ್ಯತೆಯಿದೆ ಎಂದು ಹೇಳಲಾಗುತ್ತಿದೆ.
ಭಾರತದ ಪಾಲಿಗೆ ಈ ಬೆಳವಣಿಗೆ ಪ್ರಮುಖವಾಗಿರುವುದಕ್ಕೆ ಇಂಧನ ಪೂರೈಕೆಯೂ ಒಂದು ಕಾರಣ. ಭಾರತದ ಕಚ್ಚಾ ತೈಲ ಆಮದಿನ ಗಮನಾರ್ಹ ಭಾಗ ಮಧ್ಯಪ್ರಾಚ್ಯದಿಂದ ಬರುತ್ತದೆ. ಪರ್ಷಿಯನ್ ಕೊಲ್ಲಿ, ಹಾರ್ಮುಜ್ ಜಲಸಂಧಿ ಅಥವಾ ಸುತ್ತಮುತ್ತಲಿನ ಸಮುದ್ರ ಪ್ರದೇಶಗಳಲ್ಲಿ ಹಡಗು ಸಂಚಾರಕ್ಕೆ ಯಾವುದೇ ರೀತಿಯ ಬೆದರಿಕೆ ಎದುರಾದರೆ ಕಚ್ಚಾ ತೈಲದ ಬೆಲೆ, ಸಾಗಣೆ ವೆಚ್ಚ ಹಾಗೂ ಸಾಗರ ವಿಮಾ ಶುಲ್ಕ ಹೆಚ್ಚಾಗುವ ಸಾಧ್ಯತೆಯಿದೆ.
ಜಾಗತಿಕ ಇಂಧನ ಪೂರೈಕೆಯಲ್ಲಿ ಹಾರ್ಮುಜ್ ಜಲಸಂಧಿ ಅತ್ಯಂತ ಮಹತ್ವದ ಮಾರ್ಗವಾಗಿದೆ. ಇದೇ ವೇಳೆ, ಏಷ್ಯಾ ಮತ್ತು ಯುರೋಪ್ ನಡುವಿನ ಹಡಗು ಸಂಚಾರಕ್ಕೆ ಕೆಂಪು ಸಮುದ್ರ ಪ್ರಮುಖ ಮಾರ್ಗವಾಗಿದೆ. ಕೆಂಪು ಸಮುದ್ರದಲ್ಲಿ ಈಗಾಗಲೇ ಉಂಟಾಗಿರುವ ಅಸ್ಥಿರತೆಯಿಂದಾಗಿ ಹಲವು ಹಡಗು ಕಂಪನಿಗಳು ತಮ್ಮ ಹಡಗುಗಳನ್ನು ಕೇಪ್ ಆಫ್ ಗುಡ್ ಹೋಪ್ ಸುತ್ತಲಿನ ಪರ್ಯಾಯ ಮಾರ್ಗದಲ್ಲಿ ಸಂಚರಿಸುವಂತೆ ಮಾಡಿವೆ. ಇದರಿಂದ ಪ್ರಯಾಣದ ಅವಧಿ ಮತ್ತು ಸಾಗಣೆ ವೆಚ್ಚ ಹೆಚ್ಚಾಗಿದೆ.
ಸಂಘರ್ಷ ಮತ್ತಷ್ಟು ಪೂರ್ವದತ್ತ ವಿಸ್ತರಿಸಿದರೆ ಭಾರತದ ಆಮದುದಾರರು ಮತ್ತು ರಫ್ತುದಾರರ ಮೇಲೂ ಹೆಚ್ಚುವರಿ ಒತ್ತಡ ಉಂಟಾಗಬಹುದು. ಭಾರತೀಯ ಧ್ವಜ ಹೊಂದಿರುವ ಹಾಗೂ ಭಾರತಕ್ಕೆ ಆಗಮಿಸುವ ಹಡಗುಗಳ ಸಂಚಾರವೂ ಹೆಚ್ಚು ಸಂಕೀರ್ಣವಾಗುವ ಸಾಧ್ಯತೆಯಿದೆ.
ಇಂತಹ ಪರಿಸ್ಥಿತಿಯಲ್ಲಿ ಭಾರತೀಯ ನೌಕಾಪಡೆಯ ಭದ್ರತಾ ಹೊಣೆಗಾರಿಕೆಯೂ ಹೆಚ್ಚಾಗಬಹುದು. ಹಿಂದೆಯೂ ಭಾರತೀಯ ನೌಕಾಪಡೆ ಹಿಂದೂ ಮಹಾಸಾಗರದ ವಿಶಾಲ ಪ್ರದೇಶದಲ್ಲಿ ವಾಣಿಜ್ಯ ಹಡಗುಗಳ ರಕ್ಷಣೆ ಮತ್ತು ಸಾಗರ ಭದ್ರತಾ ಬೆದರಿಕೆಗಳಿಗೆ ಪ್ರತಿಕ್ರಿಯಿಸಲು ತನ್ನ ಹಡಗುಗಳನ್ನು ನಿಯೋಜಿಸಿತ್ತು.
ಆದರೆ, ಸಫಾವಿ ಅವರ ಹೇಳಿಕೆಯ ತಕ್ಷಣದ ಪರಿಣಾಮದ ಬಗ್ಗೆ ಸದ್ಯಕ್ಕೆ ಸ್ಪಷ್ಟತೆ ಸಿಕ್ಕಿಲ್ಲ. ಸಂಘರ್ಷ ಹಿಂದೂ ಮಹಾಸಾಗರದವರೆಗೂ ವಿಸ್ತರಿಸಬಹುದು ಎಂದು ಸಫಾವಿ ಅವರು ಎಚ್ಚರಿಸಿದ್ದರೂ, ಇರಾನ್ ವಾಣಿಜ್ಯ ಹಡಗುಗಳು, ಸೇನಾ ನೆಲೆಗಳು ಅಥವಾ ನಿರ್ದಿಷ್ಟ ದೇಶಗಳನ್ನು ಗುರಿಯಾಗಿಸಬಹುದೇ ಎಂಬುದನ್ನು ಅವರು ಸ್ಪಷ್ಟಪಡಿಸಿಲ್ಲ.
ಪರ್ಷಿಯನ್ ಕೊಲ್ಲಿಯಿಂದ ಕೆಂಪು ಸಮುದ್ರದವರೆಗೆ ಸಂಘರ್ಷದ ಭೌಗೋಳಿಕ ವ್ಯಾಪ್ತಿ ಈಗಾಗಲೇ ವಿಸ್ತರಿಸಿರುವ ಸಂದರ್ಭದಲ್ಲಿ ಈ ಹೇಳಿಕೆ ಹೊರಬಿದ್ದಿದೆ.
ಸಂಘರ್ಷ ಮತ್ತಷ್ಟು ಉಲ್ಬಣಗೊಂಡರೆ ಅಂತರರಾಷ್ಟ್ರೀಯ ಸಾಗರ ವ್ಯಾಪಾರ ಮತ್ತು ಜಾಗತಿಕ ಇಂಧನ ಪೂರೈಕೆಯ ಪ್ರಮುಖ ಮಾರ್ಗಗಳ ಮೇಲೂ ಅದರ ಪರಿಣಾಮ ಹೆಚ್ಚಾಗುವ ಆತಂಕ ಮೂಡಿದೆ.