ಮರ್ಮೇಡ್ ಅಥವಾ ಮತ್ಸ್ಯಕನ್ಯೆ ಮತ್ತೊಂದು ಜನಪ್ರಿಯ ಪೌರಾಣಿಕ ಹಾಗೂ ಜಾನಪದ ಪಾತ್ರ. ಬಹುತೇಕ ಜಗತ್ತಿನ ಸಂಸ್ಕೃತಿಗಳ ಮಾನಸ ಸಮುದ್ರದಲ್ಲಿ ಇವಳು ಈಜಾಡಿದವಳೇ. ದೇಹದ ಸೊಂಟದ ಮೇಲಿನ ಭಾಗ ಮನುಷ್ಯಳದ್ದೂ ಹಾಗೂ ಸೊಂಟದ ಕೆಳಗಿನ ಭಾಗ ಮೀನಿನದ್ದು.
ಮುತ್ತಿನಂತೆ ಹೊಳೆಯುವ ಬೆಳ್ಳನೆಯ ದೇಹ. ಯಾರಾದರೂ ಮೋಹಿಸಬಹುದಾದ ಸುಂದರ ಸೌಷ್ಟವ, ಮುಖ. ದಟ್ಟ, ಉದ್ದನೆಯ ಕಪ್ಪು ಮೇಘದಂತಹ ಹೊಳೆಯುವ ಉದ್ದನೆಯ ಕೇಶರಾಶಿಯನ್ನು ಒಣಗಿಸುತ್ತಾ ಸಮುದ್ರದ ತಟದಲ್ಲಿಯ ಬಂಡೆಗಲ್ಲಿನ ಮೇಲೆ ಕೂತಿರುವ ಮರ್ಮೇಡ್‌ಗಳನ್ನು ನೋಡಿದ್ದಾಗಿ ಆಗಿನ ಅನೇಕ ನಾವಿಕರು ಕಥೆಗಳನ್ನು ಹೇಳುತ್ತಿದ್ದರು.
ದಾರಿ ತಪ್ಪಿದ ನಾವಿಕರಿಗೆ ಮಾರ್ಗದರ್ಶನ ಮಾಡಿದ್ದ ಮರ್ಮೇಡ್‌ಗಳ ಬಗ್ಗೆಯೂ ಕಥೆಗಳಿವೆ. ಅವಳ ಸೌಂದರ್ಯಕ್ಕೆ ಮಾರು ಹೋದ ನಾವಿಕರು ಅವಳನ್ನು ಮೋಹಿಸಿ ಅವಳ ಹಿಂದೆಯೇ ಹೋದವರು ತಿರುಗಿ ಊರು ಸೇರುತ್ತಿರಲಿಲ್ಲವಂತೆ.
ಮರ್ಮೇಡ್‌ಳಿಗೆ ಹೋಪಾಹೆ ಎನ್ನುತ್ತಾರೆ. ಜಪಾನೀಯರ ಸಮುದ್ರದೇವತೆ ಬೆಂಟೆನ್ ಕೂಡಾ ಒಂದು ರೀತಿ ಮರ್ಮೇಡ್. ಅವಳಿಗೆ ಎಂಟು ಕೈಗಳು. ಅವಳು ಡ್ರ್ಯಾಗನ್ ರಾಜನ ಮಗಳು. ಸಾಮಾನ್ಯವಾಗಿ ಅವಳು ಒಂದು ಸಮುದ್ರ ಸರ್ಪದ ಮೇಲೋ ಅಥವಾ ಡ್ರ್ಯಾಗನ್ ಮೇಲೋ ಸವಾರಿ ಮಾಡುತ್ತಾಳೆ. ಅವಳನ್ನು ಪ್ರೇಮ ದೇವತೆಯನ್ನಾಗಿಯೂ ಮಕ್ಕಳ ಹಾಗೂ ನಾವಿಕರ ರಕ್ಷಕಿಯನ್ನಾಗಿಯೂ ಚಿತ್ರಿಸಲಾಗಿದೆ.
- ಎಚ್.ಜಿ.ಮಳಗಿ
