ವಿದೇಶಿ ಬಂಡವಾಳ ಹರಿವು ಏರಿಕೆ: ಅಮಿತಾಭ್ ಕಾಂತ್

ಬೆಂಗಳೂರು: ಜಗತ್ತಿನಲ್ಲಿ ವಿದೇಶ ಬಂಡವಾಳ ಹೂಡಿಕೆ ಪ್ರಮಾಣ ಶೇ.16ರಷ್ಟು ಕುಸಿದಿರುವ ಸಂದರ್ಭದಲ್ಲಿಯೇ ಭಾರತದಲ್ಲಿ ಶೇ.35ರಷ್ಟು ಪ್ರಗತಿ ಕಂಡಿದೆ ಎಂದು ಕೇಂದ್ರ  ಕೈಗಾರಿಕೆ ಇಲಾಖೆ ಕಾರ್ಯದರ್ಶಿ ಅಮಿತಾಬ್ ಕಾಂತ್ ತಿಳಿಸಿದ್ದಾರೆ.

ಭಾರತೀಯ ಕೈಗಾರಿಕೆಗಳ ಒಕ್ಕೂಟ ಮಂಗಳವಾರ ಹಮ್ಮಿಕೊಂಡ ಸಮ್ಮೇಳನದ  ಸಂದರ್ಭದಲ್ಲಿ ಸುದ್ದಿಗಾರೊಂದಿಗೆ ಮಾತನಾಡಿದ ಅವರು, ರಕ್ಷಣಾ ಕ್ಷೇತ್ರದಲ್ಲಿ ಶೇ.49ರಷ್ಟು, ರೈಲ್ವೆ,  ವೈದ್ಯಕೀಯ, ಮೂಲ ಸೌಕರ್ಯ ಸೇರಿದಂತೆ 15 ಕ್ಷೇತ್ರಗಳಿಗೆ  ವಿದೇಶಿ ನೇರ ಬಂಡವಾಳ  ಹೂಡಿಕೆಯಾಗಿದೆ ಎಂದು ಅಂಕಿಅಂಶದೊಂದಿಗೆ ವಿವರಿಸಿದರು.

ಕಳೆದ ಸೆಪ್ಟೆಂಬರ್‍ನಲ್ಲಿ ಮೇಕ್‍ಇನ್ ಇಂಡಿಯಾ ಪರಿಕಲ್ಪನೆಗೆ ಪ್ರಧಾನಿ ಚಾಲನೆ ನೀಡಿದರು.  ಆದುದರಿಂದ ಕಳೆದ ಆರ್ಥಿಕ ವರ್ಷದಲ್ಲಿ ಶೇ.40ರಷ್ಟು ವಿದೇಶಿ ನೇರ ಬಂಡವಾಳ ಹೂಡಿಕೆ   ಏರಿಕೆಯಾಗಿದೆ ಎಂದು ಅಧ್ಯಯನ ವರದಿಯನ್ನು ಪ್ರಸ್ತಾಪಿಸಿದರು.  ಮೇಕ್‍ಇನ್ ಇಂಡಿಯಾ ಪರಿಕಲ್ಪನೆ ಮೂಲಕ  ಸ್ಟಾರ್ಟ್‍ಅಪ್‍ಗೆ ಹೆಚ್ಚು ಒತ್ತು ನೀಡಲಾಗುತ್ತಿದೆ. ಭಾರತ ಉದ್ಯೋಗ  ಸೃಷ್ಟಿಸುವ ದೇಶವಾಗಬೇಕು, ಉದ್ಯೋಗವನ್ನು ಬಯಸುವ ದೇಶವಾಗಬಾರದು. ಹೀಗಾಗಿಯೇ   ಸ್ಟಾರ್ಟ್‍ಅಪ್ ಆಂದೋಲನಕ್ಕೆ ಪ್ರಧಾನಿ ಯೋಜನೆ ರೂಪಿಸಿದ್ದು, ಭಾರತ ಸಶಕ್ತವಾಗುವ ವಿಶ್ವಾಸವಿದೆ ಎಂದು ಕಾಂತ್ ಅಭಿಪ್ರಾಯಪಟ್ಟರು.

ದೇಶದ ಪ್ರಗತಿಯನ್ನು ಈ ಬಾರಿ 340 ಅಂಶಗಳ ಮೇಲೆ ಅಳೆಯಲಾಗುತ್ತಿದೆ. ಇದರಲ್ಲಿ  ಕರ್ನಾಟಕ ಮೊದಲ ಮೂರರೊಳಗೆ ಸ್ಥಾನ ಪಡೆಯುವ ಅವಕಾಶವಿದೆ ಎಂದರು. ಕಳೆದ ವರ್ಷ  ನೂರು ಅಂಶಗಳ  ಮೇಲೆ ರ್ಯಾಂಕ್ ನೀಡಲಾಗಿತ್ತು ಎಂದು ತಿಳಿಸಿದರು.