ನವದೆಹಲಿ: ಮಹಾತ್ಮಾ ಗಾಂಧಿ ಭಾವಚಿತ್ರವಿರುವ ಆರ್ ಸರಣಿಯ ಹೊಸ 500 ರೂಪಾಯಿ ನೋಟುಗಳನ್ನು ಬಿಡುಗಡೆ ಮಾಡಲಾಗುವುದು ಎಂದು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಹೇಳಿದೆ.
ರಿಸರ್ವ್ ಬ್ಯಾಂಕ್ ಈಗಾಗಲೇ ಮಹಾತ್ಮಾ ಗಾಂಧಿ ಭಾವಚಿತ್ರವಿರುವ ಹೊಸ 500 ರೂಪಾಯಿ ನೋಟುಗಳನ್ನು ಚಲಾವಣೆಗೆ ಬಿಟ್ಟಿದೆ. ಇದೀಗ ಸಂಖ್ಯೆಯ ಎರಡೂ ಬದಿಗಳಲ್ಲಿ ಆರ್ ಸರಣಿಯ ಅದರಲ್ಲಿ ಗವರ್ನರ್ ಡಾ.ಉರ್ಜಿತ್ ಆರ್ ಪಟೇಲ್ ಅವರ ಸಹಿಯಿರುವ ನೋಟುಗಳನ್ನು ಮತ್ತು ನೋಟಿನ ಹಿಂದೆ 2016ನೇ ವರ್ಷದಲ್ಲಿ ಮುದ್ರಣವಾಗಿದೆ ಎಂದು ನಮೂದಿಸಿರುವ ನೋಟುಗಳನ್ನು ಬಿಡುಗಡೆ ಮಾಡಲಿದೆ ಎಂದು ಅಧಿಸೂಚನೆಯಲ್ಲಿ ತಿಳಿಸಿದೆ.
ಇದರ ಜೊತೆಗೆ ಸದ್ಯದಲ್ಲಿಯೇ ಮಹಾತ್ಮಾ ಗಾಂಧಿ ಸರಣಿ-2005ರ 50 ರೂ ಮುಖಬೆಲೆಯ ಆರ್ ಮತ್ತು ಎಲ್ ಸರಣಿಯ ನೋಟುಗಳನ್ನು ಕೂಡ ಬಿಡುಗಡೆ ಮಾಡಲಾಗುವುದು ಎಂದು ಕೇಂದ್ರೀಯ ಬ್ಯಾಂಕ್ ತಿಳಿಸಿದೆ.
ಈ ಮಧ್ಯೆ ಇದೇ 30ರವರೆಗೆ ಒಂದು ದಿನ ಮಾತ್ರ 5,000ಕ್ಕಿಂತ ಹೆಚ್ಚು, 50,000ಕ್ಕಿಂತ ಕಡಿಮೆ ಮೊತ್ತ ಜಮೆ ಮಾಡಬಹುದು ಎಂಬ ಷರತ್ತುಗಳಿಗೆ ಕಟ್ಟುನಿಟ್ಟಿನ ಷರತ್ತನ್ನು ಆರ್ ಬಿಐ ವಿಧಿಸಿದೆ.
