ಇತಿಹಾಸದಲ್ಲೇ ದೊಡ್ಡ ವಿಲೀನ; ಹೆಸರು ಉಳಿಸಿಕೊಂಡ ಡೆಲ್ ಸಂಸ್ಥೆ

ಲಾಸ್ ವೇಗಾಸ್: ಇತಿಹಾಸದಲ್ಲೇ ಅತಿ ದೊಡ್ಡ ವಿಲೀನ ಎನ್ನಲಾದ ಒಪ್ಪಂದದಲ್ಲಿ ಹೊಸ ಸಂಸ್ಥೆಯ ಹೆಸರು ಡೆಲ್ ಟೆಕ್ನಾಲಜೀಸ್ ಆಗಲಿದೆ ಎಂದು ಮೈಕೆಲ್ ಡೆಲ್ ಅವರು ಘೋಷಿಸಿದ್ದಾರೆ.

"ಇದರ ಶಬ್ದ ಬಹಳ ಚೆನ್ನಾಗಿದೆ" ಎಂದು ಡೆಲ್ ಸಂಸ್ಥೆಯ ಮುಖ್ಯಸ್ಥ ಮತ್ತು ಸಿ ಇ ಒ ಡೆಲ್ ಹೇಳಿದ್ದಾರೆ. ಕಳೆದ ವರ್ಷ ಮತ್ತೊಂದು ತಂತ್ರಜ್ಞಾನ ದೈತ್ಯ ಇ ಎಂ ಸಿ ಸಂಸ್ಥೆಯ ಜೊತೆಗೆ ೭೦ ಬಿಲಿಯನ್ ಡಾಲರ್ ಮೌಲ್ಯದ ವಿಲೀನವನ್ನು ಘೋಷಿಸಲಾಗಿತ್ತು.

"ಡೆಲ್ ಕಂಪ್ಯೂಟರ್ ಗಳ ಬ್ರಾಂಡ್ ಮೌಲ್ಯವನ್ನು ಬದಲಾಯಿಸುವುದು ಕಷ್ಟ" ಎಂದಿರುವ ಅವರು ತಮ್ಮ ಕೌಟುಂಬಿಕ ವ್ಯವಹಾರದ ಹೆಸರಿಗೆ ಪಕ್ಷಪಾತಿಯೂ ಎಂದು ಒಪ್ಪಿಕೊಂಡಿದ್ದಾರೆ. ಈಗ ಡೆಲ್ ಟೆಕ್ನಾಲಜಿಸ್ ಇ ಎಂ ಸಿ, ವಿ ಎಂ ವೇರ್, ಪಿವೋಟಲ್, ಸೆಕ್ಯೂರ್ ನೆಟ್ವರ್ಕ್ಸ್, ಆರ್ ಎಸ್ ಎ ಮತ್ತು ವರ್ಚ್ಯೂಸ್ಟ್ರೀಮ್ ಸಂಸ್ಥೆಗಳನ್ನು ಒಳಗೊಳ್ಳಲಿದೆ.

ಜಾಗತಿಕವಾಗಿ ಈ ವಿಲೀನಗೊಂಡಿರುವ ಸಂಸ್ಥೆ ಡೆಲ್-ಇ ಎಂ ಸಿ ಹೆಸರಿನಲ್ಲಿ ಚಾಲನೆಯಲ್ಲಿರಲಿದೆ ಮತ್ತು ಈ ವಿಲೀನಕ್ಕೆ ಅಮೇರಿಕಾ ಮತ್ತು ಚೈನಾ ಅಧಿಕಾರಿಗಳಿಂದ ಒಪ್ಪಿಗೆಗಾಗಿಯೂ ಕಾಯಲಾಗುತ್ತಿದೆ.

ಹಲವಾರು ದೇಶಗಳು ಈ ವಿಲೀನಕ್ಕೆ ಈಗಾಗಲೇ ಒಪ್ಪಿಗೆ ನೀಡಿದ್ದು ಮುಂದಿನ ಕೆಲವು ತಿಂಗಳುಗಳಲ್ಲಿ ಈ ವಿಲೀನ ಪ್ರಕ್ರಿಯೆ ಪೂರ್ಣಗೊಳ್ಳುವ ಸಾಧ್ಯತೆಯಿದೆ.

ಇ ಎಂ ಸಿ ಸಂಸ್ಥೆಯ ವಾರ್ಷಿಕ ಕಾರ್ಯಕ್ರಮದಲ್ಲಿ ಡೆಲ್ ಮಾತನಾಡುತ್ತಿದ್ದರು. ಇದೆ ಸಮಯದಲ್ಲಿ ಇ ಎಂ ಸಿ ಸಂಸ್ಥೆಯ ಮುಖ್ಯಸ್ಥ ಮತ್ತು ಸಿ ಇ ಒ ಜೋ ತುಸ್ಸಿ ಇದು ಇ ಎಂ ಸಿ ಯ ಕೊನೆಯ ವಾರ್ಷಿಕ ಸಭೆಯಾಗಲಿದೆ ಎಂದು ಘೋಷಿಸಿದ್ದಾರೆ.