ಬೀಜಿಂಗ್: ಆಪಲ್ ಸಂಸ್ಥೆ ಚೀನಾದಲ್ಲಿ ಎರಡನೇ ಸಂಶೋಧನಾ ಮತ್ತು ಅಭಿವೃದ್ಧಿ ಕೇಂದ್ರವನ್ನು ಪ್ರಾರಂಭಿಸುವುದಾಗಿ ಘೋಷಿಸಿದೆ.
ಹಾರ್ಡ್ ವೇರ್ ಉತ್ಪಾದನಾ ಕೇಂದ್ರವಾಗಿರುವ ಚೀನಾದ ಷೆನ್ಜೆನ್ ನಗರದಲ್ಲಿ ಆಪಲ್ ಸಂಸ್ಥೆಯ 2 ನೇ ಸಂಶೋಧನಾ ಮತ್ತು ಅಭಿವೃದ್ಧಿ ಕೇಂದ್ರ 2017 ಕ್ಕೆ ಪ್ರಾರಂಭವಾಗಲಿದೆ. ಮುಂದಿನ ವರ್ಷ ಸಂಸ್ಥೆಯ ಎರಡನೇ ಸಂಶೋಧನಾ ಹಾಗು ಅಭಿವೃದ್ಧಿ ಕೇಂದ್ರ ಪ್ರಾರಂಭವಾಗಲಿದ್ದು ನಮ್ಮ ಇಂಜಿನಿಯರ್ ಗಳು ಇಲ್ಲಿನ ಸ್ಥಳೀಯ ಉತ್ಪಾದಕ ಪಾಲುದಾರರೊಂದಿಗೆ ಮತ್ತಷ್ಟು ನಿಕಟವಾಗಿ ಕಾರ್ಯನಿರ್ವಹಿಸಬಹುದು ಎಂದು ಆಪಲ್ ವಕ್ತಾರರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಹೊಸ ಸಂಶೋಧನಾ ಮತ್ತು ಅಭಿವೃದ್ಧಿ ಕೇಂದ್ರ ಪ್ರಾರಂಭವಾಗುವುದನ್ನು ಘೋಷಿಸುವುದಕ್ಕೂ ಮುನ್ನ ಆಪಲ್ ಸಂಸ್ಥೆಯ ಸಿಇಒ, ಚೀನಾ ಸರ್ಕಾರಿ ಅಧಿಕಾರಿಗಳನ್ನು ಭೇಟಿ ಮಾಡಿ ಮಾತುಕತೆ ನಡೆಸಿದ್ದಾರೆ. ಚೀನಾದಲ್ಲಿರುವ ಆಪಲ್ ಉತ್ಪಾದನಾ ಘಟಕದಲ್ಲಿ ಈಗ 100,000 ನೌಕರರಿದ್ದು ಉತ್ಪಾದನೆ ಕ್ಷೇತ್ರದಲ್ಲಿ ಷೆನ್ಜೆನ್ ಪ್ರಮುಖ ನಗರವಾಗಿರಲಿದೆ ಎಂದು ಟಿಮ್ ಕುಕ್ ಹೇಳಿದ್ದಾರೆ. ಹೊಸ ಸಂಶೋಧನಾ ಮತ್ತು ಅಭಿವೃದ್ಧಿ ಕೇಂದ್ರದಲ್ಲಿ ವಿಶ್ವವಿದ್ಯಾನಿಲಯಗಳನ್ನು ಒಳಗೊಂಡ ಸಂಶೋಧನೆ ಮತ್ತು ಅಭಿವೃದ್ಧಿ ಕೆಲಸಗಳು ನಡೆಯಲಿದ್ದು 500 ನೌಕರರು ಇರಲಿದ್ದಾರೆ ಎಂದು ಅಂದಾಜಿಸಲಾಗಿದೆ.
