ಡಿಮಾನಿಟೈಸೇಷನ್ ಆಗಿ ಆರು ತಿಂಗಳಾಯ್ತು! ಉಪಯೋಗವೇನಾದ್ರು ಆಯ್ತಾ ?

ವ್ಯವಸ್ಥೆ ಶಿಸ್ತುಬದ್ದವಾಗಿದ್ದರೆ ಬದುಕಿನ ಎಲ್ಲಾ ಮಜಲುಗಳ ಅಂಕಿಅಂಶ ನಿಖರವಾಗಿ ಸಿಗುತ್ತದೆ. ವ್ಯವಸ್ಥೆಯ ಜಟಿಲತೆ ನಮ್ಮ ದೇಶದಲ್ಲಿ ಎಷ್ಟಿದೆಯೆಂದರೆ ಆ ಜಟಿಲತೆಯ ನಿಖರ ಲೆಕ್ಕವೂ ಸಿಗದೆ ಹೋಗುತ್ತದೆ. ಒಂದು ಭಾರತ ದೇಶದಲ್ಲಿ ಹಲವು ದೇಶಗಳು ಮಿಳಿತವಾಗಿದೆ. ನಮ್ಮ ದೇಶವನ್ನ ಒಂದು ದೊಡ್ಡ ರೈಲು ಎಂದು ಕೊಂಡರೆ ಆ ರೈಲಿನ ಮೊದಲನೇ ಬೋಗಿ ಪಶ್ಚಿಮದ ದೇಶಗಳಿಗೆ ಸೆಡ್ಡು ಹೊಡೆಯುವಂತಿದ್ದರೆ ಕೊನೆಯ ಬೋಗಿ ಇನ್ನೂ ಶಿಲಾಯುಗದಲ್ಲಿದೆ. ಹೌದು ಇದು ನಮ್ಮ ದೇಶದ ಆರ್ಥಿಕ, ಸಾಮಾಜಿಕ ಜಟಿಲತೆ. ನಾವು ಹೋಗುತ್ತಿರುವ ದಾರಿ ಸರಿಯಿಲ್ಲ ಎಂದ ತಕ್ಷಣ ಬೇರೆ ದಾರಿ ಹಿಡಿಯುವ ಅವಕಾಶ ನಮಗಿಲ್ಲ ಏಕೆಂದರೆ ನಮ್ಮ ದೇಶ ಸಾಗುತ್ತಿರುವುದು ಹಳಿಯ ಮೇಲೆ ರಸ್ತೆಯ ಮೇಲಲ್ಲ!. 

ನವೆಂಬರ್ 8, 2016 ನಮ್ಮ ವ್ಯವಸ್ಥೆಯಲ್ಲಿನ 86 ಪ್ರತಿಶತ ಚಲಾವಣೆಯಲ್ಲಿದ್ದ ಹಣವನ್ನ ಹಿಂಪಡೆಯುವುದು ಹಳಿಯ ಮೇಲೆ ಹೋಗುತ್ತಿದ್ದ ರೈಲನ್ನ ವಿರುದ್ಧ ದಿಕ್ಕಿಗೆ ತಿರುಗಿಸಿದಂತೆಯೇ. ಈ ವಿಷಯಕ್ಕೆ ಆಗಲೇ ಆರು ತಿಂಗಳಾಯ್ತು. ಎಷ್ಟೋ ಜನರಿಗೆ ಹೀಗಾಗಿತ್ತು ಎನ್ನುವುದು ಮರೆತು ಹೋಗಿ ಜೀವನ ಮತ್ತೆ ಹಿಂದಿನಂತೆ ಸಾಗುತ್ತಿದೆ. ಎಷ್ಟೋ ಜನಕ್ಕೆ ಮರಳಿ ತಮ್ಮ ಹಿಂದಿನ ವೈಭವ ಪಡೆಯಲು ಆಗಿಲ್ಲ. ಇನ್ನೂ ಎಷ್ಟೋ ಜನ ಇಂತಹ ಜಟಿಲತೆಯ ಜೀರ್ಣಿಸಿಕೊಳ್ಳಲು ಆಗದೆ ಬದುಕಿನ ಆಟಕ್ಕೆ ಗುಡ್ ಬೈ ಹೇಳಿ ಹೋಗಿರುವ ನಿದರ್ಶನಗಳನ್ನು ಕಂಡಿದ್ದೇನೆ. ಡಿಮಾನಿಟೈಸೇಷನ್ ನಿಂದ ಇಂತಿತಹ ಲಾಭವಾಯ್ತು ಎಂದು ಬರೆದು ಸರಕಾರವನ್ನ ಹೊಗಳಿ ಅಟ್ಟಕ್ಕೆ ಏರಿಸುವರ ಸಂಖ್ಯೆ ಬಹಳವಿದೆ. ಹಾಗೆಯೇ ಮೋದಿ ಸರಕಾರವನ್ನ ಸುಖಾಸುಮ್ಮನೆ ದ್ವೇಷಿಸುವರ, ಡಿಮಾನಿಟೈಸೇಷನ್ ನಿಂದ ದೇಶದ ಆರ್ಥಿಕತೆ ಕೆಟ್ಟು ಹೋಗಿದೆ ಎನ್ನುವರ ಸಂಖ್ಯೆಯೂ ಕಡಿಮೆಯೇನಿಲ್ಲ. ನಮ್ಮ ಬರವಣಿಗೆಯ ಹಾದಿ ಯಾವುದಿದೆ ಎನ್ನುವುದರ ಮೇಲೆ ನಮ್ಮನ್ನ ಇವನು ಇಲ್ಲಿಗೆ ಸೇರಿದವನು ಎಂದು ಪಟ್ಟಿ ಮಾಡುವುದು ಕೂಡ ಇದೆ. ಇವೆಲ್ಲವುಗಳನ್ನು ಮೀರಿ ಸಾಧ್ಯವಾದಷ್ಟು ಸತ್ಯವಾದ ವಸ್ತುನಿಷ್ಠವಾದ ವಿಶ್ಲೇಷಣೆ ಮಾಡುವ ಪ್ರಯತ್ನವಿದು. 

ನಕಲಿ ನೋಟುಗಳ ಹಾವಳಿ ತಪ್ಪುವುದು : ಡಿಮಾನಿಟೈಸೇಷನ್ ನಿಂದ ನಕಲಿ ನೋಟುಗಳ ಹಾವಳಿ ತಪ್ಪುವುದು ನಮ್ಮ ವ್ಯವಸ್ಥೆಯಲ್ಲಿ ಸಾಕಷ್ಟು ನಕಲಿ ನೋಟುಗಳಿವೆ. ಬ್ಯಾಂಕಿಗೆ ಕೂಡ ನಕಲಿ ಮತ್ತು ಅಸಲಿಯ ವ್ಯತ್ಯಾಸ ತಿಳಿಯುವುದು ಕಷ್ಟ ಅಷ್ಟರ ಮಟ್ಟಿಗೆ ನಮ್ಮ ನೆರೆಯ ದೇಶ ನಮ್ಮ ಹಣವನ್ನ ಮುದ್ರಿಸುವುದರಲ್ಲಿ ಪರಿಣಿತಿ ಪಡೆದಿದೆ. ಹೀಗೆಲ್ಲಾ ಹೇಳಲಾಯ್ತು. ನಕಲಿ ನೋಟು ತಡೆಯಲು ಡಿಮಾನಿಟೈಸೇಷನ್ ನಿಂದ ಸಾಧ್ಯವಿಲ್ಲ ಎನ್ನುವುದು ಇವತ್ತು ಎಲ್ಲರಿಗೂ ಅರಿವಾಗಿರುವ ವಿಷಯ. ಚೀನಾ, ಪಾಕಿಸ್ತಾನ ನಮ್ಮ ಹೊಸ ನೋಟುಗಳನ್ನ ಲೀಲಾಜಾಲವಾಗಿ ಮುದ್ರಿಸುವ ತಾಕತ್ತು ಹೊಂದಿವೆ ಎನ್ನುವುದನ್ನ ಸಾಬೀತು ಪಡಿಸಿವೆ. 

ಭಯೋದ್ಪಾದನೆ  ತಪ್ಪುವುದು:  ಡಿಮೋನಿಟೈಸೇಷನ್ನಿಂದ ಭಯೋದ್ಪಾದಕರಿಗೆ ಹಣದ ಹರಿವು ಕಡಿಮೆಯಾಗುತ್ತದೆ. ಹೀಗಾಗಿ ಭಯೋದ್ಪಾದನೆ ಕಡಿಮೆಯಾಗುತ್ತದೆ ಎನ್ನುವ ಒಂದು ಕಾರಣವನ್ನ ಕೂಡ ಕಟ್ಟಿ ಕೊಡಲಾಯಿತು. ನವೆಂಬರ್ ನಂತರ ಜಗತ್ತಿನ ಹಲವು ಭಾಗಗಲ್ಲಿ ಟೆರರಿಸಂ ನಿರಾತಂಕವಾಗಿ ನೆಡೆದಿದೆ. ಅಲ್ಲಿ ದಾಳಿ ನೆಡೆಸಲು ಅವರಿಗೆ ಹಣ ಎಲ್ಲಿಂದ ಬಂತು? ನಾಳೆ ಭಾರತದ ಮೇಲೆ ದಾಳಿ ನೆಡೆಸಲು ಆ ದಾರಿಯಲ್ಲೇ ಅವರಿಗೆ ಹಣ ಸಿಗುವುದಿಲ್ಲ ಎನ್ನುವುದಕ್ಕೆ ಏನಿದೆ ಗ್ಯಾರಂಟಿ? ಈ ವಿಷಯಗಳು ಭಾರತ ನೋಟು ಬ್ಯಾನ್ ಮಾಡಿದ್ದು ಭಯೋತ್ಪಾದನೆ ಮೇಲೆ ಯಾವುದೇ ಪರಿಣಾಮ ಬೀರಿಲ್ಲ ಎನ್ನುವುದ ಖಚಿತ ಪಡಿಸಿದೆ. 

ಭ್ರಷ್ಟಾಚಾರ ಕಡಿಮೆಯಾಗುತ್ತೆ: ನೀವು ಯಾವುದೇ ನೊಂದಣಾಧಿಕಾರಿ ಕಚೇರಿಗೆ ಹೋಗಿ, ಅಷ್ಟೇಕೆ ಯಾವುದೇ ಸರಕಾರಿ ಕಚೇರಿಗೆ ಹೋಗಿ ಹಣ ಕೊಡದೆ ನಿಮ್ಮ ಕೆಲಸ ಮಾಡಿಸಿಕೊಂಡು ಬಂದು ಭ್ರಷ್ಟಾಚಾರ ಕಡಿಮೆಯಾಗಿದೆ ಎಂದು ಹೇಳಿ ನೋಡೋಣ. ಕಡಿಮೆ ಮೌಲ್ಯಕ್ಕೆ ನೋಂದಾವಣಿ ಮಾಡಿಸುವುದು ಉಳಿದ ಹಣವನ್ನ 'ಕ್ಯಾಶ್ ' ನೀಡುವುದು ನೆಡೆಯುತ್ತಲೇ ಇದೆ. ಕಡಿಮೆಯಾಗಿರುವುದು ಕೊಳ್ಳುವಿಕೆಯಲ್ಲಿ ಮಾತ್ರ. 

ರಿಯಲ್ ಎಸ್ಟೇಟ್ ವ್ಯಾಪಾರದ ಕಥೆಯೇನು ? ಡಿಮಾನಿಟೈಸೇಷನ್ ಗೆ ಮುಂಚೆಯೆ ಕಟ್ಟಿದ ಕಟ್ಟಡಗಳು ಮಾರಾಟವಾಗದೆ ಉಳಿದಿದ್ದವು ಅವುಗಳ ನಿಖರ ಅಂಕಿಅಂಶ ತೆರೆದಿಟ್ಟರೆ ಬೆಚ್ಚಿಬೀಳಿಸುತ್ತದೆ. ಡಿಮಾನಿಟೈಸೇಷನ್ ನಂತರ ಸಾಮಾನ್ಯ ಜನತೆ ಹೆದರಿಬಿಟ್ಟಿತು. ಏನಾಗುತ್ತೋ ಎನ್ನುವ ಆತಂಕ ಅವರದು, ಹೇಗಾದ್ರು ಆಗಲಿ ಸ್ವಲ್ಪ ಕಾದು ನೋಡೋಣ ಎನ್ನುವ ಇರಾದೆ ಇನ್ನಷ್ಟು ಜನರದ್ದು. ಹೀಗಾಗಿ ಮನೆ ಅಪಾರ್ಟ್ಮೆಂಟ್, ಹೊಸ ಮನೆ ಕಟ್ಟಿಸುವುದು ಇವೆಲ್ಲ ಸಾಕಷ್ಟು ಕುಸಿದಿದೆ. ಹಾಗಂತ ಮಾರಾಟದ ಬೆಲೆ ಕಡಿಮೆಯಾಗಿಲ್ಲ. ಇವೆಲ್ಲವುಗಳ ಹೊಡೆತ ಬೀಳುವುದು ನಮ್ಮ ಬ್ಯಾಂಕ್ಗಳ ಮೇಲೆ. ಸಾಲ ತೆಗೆದುಕೊಂಡು ದೊಡ್ಡ ದೊಡ್ಡ ವಸತಿ ಸಮುಚ್ಚಯ ಕಟ್ಟಿದ ಬಿಲ್ಡರ್ಗಳು ಸಾಲದ ಮೇಲಿನ ಕಂತು ಕಟ್ಟಲಾಗದೆ ಕೂರುತ್ತಿದ್ದಾರೆ. ಬ್ಯಾಂಕ್ಗಳ ಅಂಕಿಅಂಶ ನೀವು ಗಮನಿಸುವರಾಗಿದ್ದರೆ ಹೆಚ್ಚುತ್ತಿರುವ ನಾನ್ ಪರ್ಫಾರ್ಮಿಂಗ್ ಅಸೆಟ್ ಮೊತ್ತ ನಿಮ್ಮ ನಿದ್ರೆ ಕದಿಯದೆ ಇರದು. 

ಹಿಗ್ಗಿದ ಟ್ಯಾಕ್ಸ್ ವೆಬ್: ಭಾರತದಂತ ದೇಶದಲ್ಲಿ ತೆರಿಗೆ ಪಾವತಿ ಮಾಡುವ ಸಂಖ್ಯೆ ನೋಡಿ ಎಂತವರು ನಗದೆ ಇರರು. ಈ ನಿಟ್ಟಿನಲ್ಲಿ ಡಿಮಾನಿಟೈಸೇಷನ್ ಚನ್ನಾಗಿ ಕೆಲಸ ಮಾಡಿದೆ ಎನ್ನಬಹುದು. ಹೆಚೆಚ್ಚು ಜನ ಈಗ ತೆರಿಗೆಯ ಬಲೆಯಲ್ಲಿ ಬಂದಿರುವುದಂತೂ ನಿಜ. ಇದು ಜನ ಸಾಮಾನ್ಯನ ಕತೆ. ಸುಮ್ಮನೆ ನಿಮ್ಮ ಮನಸ್ಸಿನಲ್ಲಿ ನಮ್ಮ ದೇಶದ ನಿಮಗನಿಸುವ ಮಹಾನ್ ಭ್ರಷ್ಟ ರಾಜಕಾರಿಣಿಗಳನ್ನ ನೆನಸಿಕೊಳ್ಳಿ. ಜ್ಞಾಪಕ ಬರದಿದ್ದರೆ ಎಂಟು ಅಥವಾ ಹತ್ತು ವರ್ಷದ ಮಗುವ ಕೇಳಿ. ಅವರ ಬದುಕಿನಲ್ಲಿ ಯಾವುದೇ ಬದಲಾವಣೆಯಿಲ್ಲ. ಒಂದೇ ಒಂದು ದೊಡ್ಡ ಹೆಸರು ಡಿಮಾನಿಟೈಸೇಷನ್ ನಿಂದ ಜೈಲು ಸೇರಿದ ಉದಾಹರಣೆ ನಮ್ಮ ಮುಂದಿಲ್ಲ. ಕಾನೂನು ಲಾಗೂ ಆಗುವುದು ಕೇವಲ ಜನ ಸಾಮಾನ್ಯನಿಗೆ ಎನ್ನುವುದು ಮತ್ತೆ ಸಿದ್ಧವಾಗಿದೆ. 

ಕಡಿಮೆಯಾದ ಹಣದ ಹರಿವು: ನವೆಂಬರ್ 8, 2016 ವ್ಯವಸ್ಥೆಯಲ್ಲಿನ 86 ಪ್ರತಿಶತ ಹಣವನ್ನ ವಾಪಸ್ಸು ಪಡೆಯಲಾಯಿತು . ಹಂತ ಹಂತವಾಗಿ ಮರಳಿ ಹಣವನ್ನ ವ್ಯವಸ್ಥೆಗೆ ಬಿಡಲಾಯಿತು. ನಮ್ಮ ರಿಸರ್ವ್ ಬ್ಯಾಂಕ್ ಹೇಳುವ ಪ್ರಕಾರ ಹಿಂಪಡೆದ ಪೂರ್ಣ ಹಣವನ್ನ ಮತ್ತೆ ವ್ಯವಸ್ಥೆಗೆ ಮರಳಿ ಬಿಡುವ ಇರಾದೆಯೇ ಇಲ್ಲ ಎನ್ನುವುದು. ಸಾಕಷ್ಟು ಜನ ಡಿಜಿಟಲ್ ಟ್ರಾನ್ಸಾಕ್ಷನ್ ಗೆ ಹೊಂದಿಕೊಂಡಿದ್ದಾರೆ ಹೀಗಾಗಿ ಪೂರ್ಣ ಹಣವನ್ನ ಮತ್ತೆ ಚಲಾವಣೆಗೆ ಬಿಡುವುದರಲ್ಲಿ ಅರ್ಥವೂ ಇಲ್ಲ. ಡಿಜಿಟಲ್ ಟ್ರಾನ್ಸಾಕ್ಷನ್ ಹೆಚ್ಚಿದಷ್ಟು ಸಮಾಜಕ್ಕೆ ಒಳ್ಳೆಯದು. ಹೀಗೆ ಡಿಜಿಟಲ್ ಟ್ರಾನ್ಸಾಕ್ಷನ್ ಪ್ರೋತ್ಸಹಿಸಲು ಡಿಮಾನಿಟೈಸೇಷನ್ ಮಾಡುವ ಅವಶ್ಯಕತೆ ಇರಲಿಲ್ಲ. 

ಹೀಗೆ ಒಂದಲ್ಲ ಬದುಕಿನ ಎಲ್ಲಾ ಸ್ಥರಗಳಲ್ಲೂ ಡಿಮಾನಿಟೈಸೇಷನ್ ನಿಂದ ವೇಗಕ್ಕೆ ಬ್ರೇಕ್ ಬಿದ್ದದ್ದು ಸುಳ್ಳಲ್ಲ. ಹಲವು ಮತ್ತೆ ನಿರಾತಂಕವಾಗಿ ಹಿಂದಿನಂತೆ ಸಾಗುತ್ತಿವೆ. ಹಲವು ಗತವೈಭವ ನೆನೆದು ರೋಧಿಸುತ್ತಿವೆ. ಹಲವು ಮರಳಿ ಬದುಕ ಕಟ್ಟಿಕೊಳ್ಳಲು ಪ್ರಯತ್ನಿಸುತ್ತಿದೆ . ವ್ಯವಸ್ಥೆಯಲ್ಲಿ ಯಾವುದೇ ಬದಲಾವಣೆಯಾಗಲಿ ಅದರ ಹೆಚ್ಚು ನೋವು , ಪೆಟ್ಟು ಬೀಳುವುದು ಜನ ಸಾಮಾನ್ಯನಿಗೆ ಎನ್ನುವುದು ಮಾತ್ರ ನಿಜ. ಕಪ್ಪು ಬಿಳಿ ಮಾಡುವ ಹೊಸ ದಂಧೆ ಶುರುವಾಗಿರುವುದು ಕೂಡ ಅಷ್ಟೇ ಸತ್ಯ. 

ಮೊದಲೇ ಹೇಳಿದಂತೆ ನಮ್ಮದು ವ್ಯವಸ್ಥಿತ ಸಮಾಜವಲ್ಲ ಹೀಗಾಗಿ ಯಾವುದೇ ವಿಷಯದ ನಿಖರತೆ ತಿಳಿಯುವುದೇ ಇಲ್ಲ. ಆರು ತಿಂಗಳು, ಆರು ವರ್ಷ ಇವೆಲ್ಲಾ ಸಂಖ್ಯೆಯಷ್ಟೇ. ನಮ್ಮ ಸ್ಟಾಟಿಸ್ಟಿಕ್ಸ್ ಪ್ರತಿ ಹಂತದಲ್ಲೂ ಪೊಳ್ಳು. ಅದು ಕೇವಲ ಅಂದಾಜು ಅಷ್ಟೇ. ಸರಕಾರ ಡಿಮಾನಿಟೈಸೇಷನ್ ಮಾಡಲು ಏನು ಮುಖ್ಯ ಕಾರಣ ಕೊಟ್ಟಿತ್ತೋ ಅವುಗಳಲ್ಲಿ ಮುಕ್ಕಾಲು ಪಾಲು ತಮ್ಮ ಕಾರಣವನ್ನ ಸಮರ್ಥಿಸಿಕೊಳ್ಳುವಲ್ಲಿ ವಿಫಲವಾಗಿವೆ. ಇಷ್ಟು ದೊಡ್ಡ ದೇಶದಲ್ಲಿ ರಾತ್ರೋರಾತ್ರಿ ಇಷ್ಟು ದೊಡ್ಡ ಬದಲಾವಣೆಯನ್ನ ಮಾಡಿ ದೇಶದಲ್ಲಿ ದಂಗೆ, ರಕ್ತಪಾತ ಆಗಿಲ್ಲ ಎನ್ನುವುದಷ್ಟೆ ಸಮಾಧಾನ ಪಡುವ ವಿಷಯ. ದೇಶದ ಒಳಿತಿಗಾಗಿ ಎಂದು ಹೇಳಿ ವಿಷ ಕೊಟ್ಟರೊ ನಗುತ್ತಾ ನಾವು ಕುಡಿಯಬಲ್ಲೆವು ಮತ್ತು ಹೇಗೋ ಬದುಕಬಲ್ಲೆವು ಎನ್ನುವುದನ್ನ ಭಾರತೀಯರು ಜಗತ್ತಿಗೆ ತೋರಿಸಿದ್ದಾರೆ. ಡಿಮಾನಿಟೈಸೇಷನ್ ಏನೇನೂ ಒಳಿತು ಮಾಡಿತು ಎನ್ನುವ ಪಟ್ಟಿ ಮಾಡುವುದಕ್ಕಿಂತ ಇಡೀ ದೇಶವನ್ನ ದೇಶ ಭಕ್ತಿಯ ಹೆಸರಲ್ಲಿ ಒಗ್ಗೊಡಿಸಬಹುದು ಎನ್ನುವ ವಿಷಯವನ್ನ ತೋರಿಸಿಕೊಟ್ಟಿದೆ. ಅಹ್ ಈ ವಿಷಯದಲ್ಲಿ ನಮ್ಮ ಸ್ಟಾಟಿಸ್ಟಿಕ್ , ಅಂಕಿಅಂಶದಲ್ಲಿ ನಿಖರತೆಯಿದೆ.!