ಆಗಸ್ಟ್ ನಲ್ಲಿ 90,669 ಕೋಟಿ ಜಿಎಸ್ ಟಿ ಸಂಗ್ರಹ: ಕೇಂದ್ರ ಸರ್ಕಾರ

ನವದೆಹಲಿ: ಆಗಸ್ಟ್ ತಿಂಗಳಲ್ಲಿ 90,669 ಕೋಟಿ ರೂಪಾಯಿ ಜಿಎಸ್ ಟಿ ಸಂಗ್ರಹವಾಗಿದೆ ಎಂದು ಕೇಂದ್ರ ಸರ್ಕಾರ ಹೇಳಿದೆ. 

ಜಿಎಸ್ ಟಿ ಜಾರಿಯಾದ ಎರಡನೇ ತಿಂಗಳ ತೆರಿಗೆ ಸಂಗ್ರಹದ ಬಗ್ಗೆ ಮಾಹಿತಿ ನೀಡಿರುವ ಕೇಂದ್ರ ಸರ್ಕಾರ, ಈ ಮೊತ್ತ ಪರಿಹಾರ ಯೋಜನೆಯಡಿ ಆಯ್ಕೆ ಮಾಡಿಕೊಂಡ ಮೌಲ್ಯಮಾಪಕರಿಂದ ಪಾವತಿಯಾದ ಜಿಎಸ್ ಟಿ ಮೊತ್ತ 10.24 ಲಕ್ಷಕ್ಕಿಂತ ಹೊರತಾದದ್ದು ಎಂದು ತಿಳಿಸಿದೆ. 

90, 669 ರೂಪಾಯಿಗಳ ಪೈಕಿ ಸೆಂಟ್ರಲ್ ಜಿಎಸ್ ಟಿ(ಸಿಜಿಎಸ್ ಟಿ)ಯಿಂದ 14, 402 ಕೋಟಿ ರೂಪಾಯಿ, ಸ್ಟೇಟ್ ಜಿಎಸ್ ಟಿ ಯಿಂದ 21,067 ಕೋಟಿ ರೂಪಾಯಿ, ಇಂಟಿಗ್ರೇಟೆಡ್ ಜಿಎಸ್ ಟಿ(ಐಜಿಎಸ್ ಟಿ) ಯಿಂದ 47,377 ಕೋಟಿ ರೂಪಾಯಿ ಹಾಗೂ ಐಷಾರಾಮಿ ವಸ್ತುಗಳ ಮೇಲೆ ವಿಧಿಸಲಾಗುವ ಪರಿಹಾರ ಸೆಸ್ ನಿಂದ 7,823 ಕೋಟಿ ರೂಪಾಯಿಯಷ್ಟು ಮೊತ್ತ ಸಂಗ್ರಹವಾಗಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ. 

ಇನ್ನೂ ಕೆಲವರು ಜುಲೈ-ಆಗಸ್ಟ್ ವರೆಗಿನ ತೆರಿಗೆ ಮಾಹಿತಿಯನ್ನು ಸಲ್ಲಿಕೆ ಮಾಡಿಲ್ಲ. ಒಮ್ಮೆ ಅವರು ತೆರಿಗೆ ಮಾಹಿತಿ ಸಲ್ಲಿಕೆ ಮಾಡಿದರೆ ಜಿಎಸ್ ಟಿ ಸಂಗ್ರಹ ಮೊತ್ತ ಇನ್ನೂ ಹೆಚ್ಚಾಗಲಿದೆ ಎಂದು ಸರ್ಕಾರ ಹೇಳಿದೆ.