ನವದೆಹಲಿ: ಸರಕು ಮತ್ತು ಸೇವಾ ತೆರಿಗೆ (GST)ಗೆ ಸಂಬಂಧಿಸಿದ ಪ್ರಕರಣದಲ್ಲಿ ಬಲವಾದ ಪುರಾವೆಗಳನ್ನು ಉಲ್ಲೇಖಿಸಿ, ಐಟಿ ದಿಗ್ಗಜ ಇನ್ಫೋಸಿಸ್ ವಿರುದ್ಧದ 32,000 ಕೋಟಿ ರೂಪಾಯಿಗಳ ತೆರಿಗೆ ಬೇಡಿಕೆಯನ್ನು ಭಾರತ ಸರ್ಕಾರ ಹಿಂತೆಗೆದುಕೊಳ್ಳುವುದಿಲ್ಲ ಎಂದು ಹಿರಿಯ ಅಧಿಕಾರಿಯೊಬ್ಬರು ಖಚಿತಪಡಿಸಿದ್ದಾರೆ.
ಸರ್ಕಾರ ತನ್ನ ನಿರ್ಧಾರದಲ್ಲಿ ದೃಢವಾಗಿದೆ. ಕಾನೂನು ತನ್ನದೇ ಆದ ಕ್ರಮ ತೆಗೆದುಕೊಳ್ಳುತ್ತದೆ. ಬೇಡಿಕೆ ಇದ್ದರೆ, ಕಂಪನಿಯು ಅದನ್ನು ಇತ್ಯರ್ಥಪಡಿಸಬೇಕು. ಹೆಚ್ಚುವರಿಯಾಗಿ, ವಿದೇಶಿ ಶಾಖೆಗಳನ್ನು ಹೊಂದಿರುವ ಇತರ ಕಂಪನಿಗಳು ಸಹ ಇದೇ ರೀತಿಯ ತೆರಿಗೆ ಬೇಡಿಕೆಗಳನ್ನು ಎದುರಿಸಬಹುದು ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ಇತ್ತೀಚೆಗೆ, ಇನ್ಫೋಸಿಸ್ ತನ್ನ ವಿದೇಶಿ ಅಂಗಸಂಸ್ಥೆಗಳು ಒದಗಿಸುವ ಉಚಿತ ಸೇವೆಗಳಿಗೆ ಸಂಬಂಧಿಸಿದ ತೆರಿಗೆ ವಂಚನೆಯ ಆರೋಪಗಳಿಗೆ ಸಂಬಂಧಿಸಿದಂತೆ ಜಿಎಸ್ಟಿ ಗುಪ್ತಚರ ನಿರ್ದೇಶನಾಲಯದಿಂದ (DGGI) ಭಾಗಶಃ ಪರಿಹಾರವನ್ನು ಪಡೆದುಕೊಂಡಿದೆ. ಆದಾಗ್ಯೂ, ತೆರಿಗೆ ಬೇಡಿಕೆಯು ಐದು ವರ್ಷಗಳ ಮಿತಿಯನ್ನು ಮೀರುವಂತಿಲ್ಲವಾದ್ದರಿಂದ ತಾಂತ್ರಿಕ ಆಧಾರದ ಮೇಲೆ ಈ ಪರಿಹಾರವನ್ನು ನೀಡಲಾಗಿದೆ.
32,000 ಕೋಟಿಗೂ ಅಧಿಕ ತೆರಿಗೆ ವಂಚನೆಯಾಗಿದೆ ಎಂದು ಜುಲೈ 31ರಂದು ಡಿಜಿಜಿಐ ಈ ಬೇಡಿಕೆಯನ್ನು ಹೊರಡಿಸಿತ್ತು. ಇದರ ನಂತರ, ಕರ್ನಾಟಕದ ಅಧಿಕಾರಿಗಳು ಅದೇ ದಿನ ನೀಡಲಾದ ಪೂರ್ವಭಾವಿ ಸೂಚನೆಯನ್ನು ಹಿಂಪಡೆದಿದ್ದಾರೆ ಮತ್ತು ಡಿಜಿಜಿಐಯ ಪರಿಶೀಲನೆಗಾಗಿ ಕಂಪನಿಯಿಂದ ಹೆಚ್ಚುವರಿ ಮಾಹಿತಿಯನ್ನು ಕೇಳಿದ್ದಾರೆ ಎಂದು ಎಂದು ಇನ್ಫೋಸಿಸ್ ತಿಳಿಸಿತ್ತು.
ಇನ್ಫೋಸಿಸ್ ತನ್ನ ಎಲ್ಲಾ ಜಿಎಸ್ ಟಿ ಪಾವತಿಗಳನ್ನು ಇತ್ಯರ್ಥಗೊಳಿಸಿದೆ ಮತ್ತು ಡಿಜಿಜಿಯ ಹಕ್ಕುಗಳು ಅದರ ಕಾನೂನುಬದ್ಧ ವೆಚ್ಚಗಳಿಗೆ ಸಂಬಂಧಿಸಿಲ್ಲ ಎಂದು ವಾದಿಸಿದೆ. ಕಂಪನಿಯು ಜುಲೈ 31 ರಂದು ಸಲ್ಲಿಸಿದ ಎಲ್ಲಾ ಅನ್ವಯವಾಗುವ ಕೇಂದ್ರ ಮತ್ತು ರಾಜ್ಯ ನಿಯಮಗಳ ಅನುಸರಣೆಗೆ ಒತ್ತು ನೀಡಿದೆ.
