ಶೀಘ್ರವೇ ಸಂಜಯ್ ಗಾಂಧಿ ಜೀವನ ಚರಿತ್ರೆ ಆಧಾರಿತ ಚಿತ್ರ ನಿರ್ಮಾಣ: ಹನ್ಸಲ್ ಮೆಹ್ತಾ

ಮುಂಬಯಿ: ರಾಜಕಾರಣಿ ಹಾಗೂ ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಅವರ ಪುತ್ರ ಸಂಜಯ ಗಾಂಧಿ ಅವರ ಜೀವನ ಚರಿತ್ರೆ ಆಧಾರಿತ ಸಿನಿಮಾ ಶೀಘ್ರವೇ ಸೆಟ್ಟೇರಲಿದೆ ಎಂದು ರಾಷ್ಟ್ರ ಪ್ರಶಸ್ತಿ ವಿಜೇತ ನಿರ್ಮಾಪಕ ಹನ್ಸಲ್ ಮೆಹ್ತಾ ಹೇಳಿದ್ದಾರೆ.

ಲೇಖಕ ವಿನೋದ್ ಮೆಹ್ತಾ , ತುರ್ತು ಪರಿಸ್ಥಿತಿ ಸಂದರ್ಭದಲ್ಲಿ ಬರೆದಿರುವ  'ದಿ ಸಂಜಯ್ ಸ್ಟೋರಿ ' ಪುಸ್ತಕ ಆಧರಿಸಿ ಚಿತ್ರ ನಿರ್ಮಾಣವಾಗಲಿದೆ. ಅತಿ ಚಿಕ್ಕ ವಯಸ್ಸಿನಲ್ಲೇ ದುರಂತ ಸಾವಿಗೀಡಾದ ಸಂಜಯ್ ಗಾಂಧಿ ಜೀವನದ ಸಂಪೂರ್ಣ ವಿವರ ಈ ಪುಸ್ತಕದಲ್ಲಿದೆ.

ಸಂಜಯ ಗಾಂಧಿ ಜೀವನದ ಬಗ್ಗೆ ಆಳವಾಗಿ ಸಂಶೋಧನೆ ನಡೆಸಿ ಬರೆದಿರುವ ಈ ಪುಸ್ತಕ ಅದ್ಭುತವಾಗಿದೆ. ಸಂಜಯ್ ಗಾಂಧಿ ಸಾವಿನ ರಹಸ್ಯ ಇನ್ನೂ ನಿಗೂಢವಾಗಿಯೇ ಉಳಿದಿದ್ದು, ತನ್ನ ತಾಯಿ ಹಾಗೂ ಉಕ್ಕಿನ ಮಹಿಳೆ ಇಂದಿರಾ ಗಾಂಧಿ ಜೊತೆಯೇ ಸಂಜಯ ಗಾಂಧಿ ಸಂಬಂಧ ಹೊಂದಿದ್ದರು ಎಂಬ ವಿಷಯವನ್ನು ಈ ಪುಸ್ತಕದಲ್ಲಿ ಪ್ರಕಟಿಸಲಾಗಿದೆ. ಈ ಎರಡು ಪಾತ್ರಗಳು ಚಿತ್ರದಲ್ಲಿ ಸವಾಲಿನ ಪಾತ್ರಗಳಾಗಿವೆ ಎಂದು ಹಸ್ನ ಲ್ ಮೆಹ್ತಾ ಹೇಳಿದ್ದಾರೆ.

ಇನ್ನು ಹೆಸರಿಡದ ಈ ಚಿತ್ರದ ಚಿತ್ರೀಕರಣ ಮುಂದಿನ ವರ್ಷ ಆರಂಭವಾಗಲಿದೆ.  ಸದ್ಯ ಕಂಗನಾ ರಾಣವತ್ ಅಭಿನಯದ ಸಿಮ್ರಾನ್ ಚಿತ್ರದಲ್ಲಿ ಹನ್ಸಲ್ ಬ್ಯುಸಿಯಾಗಿದ್ದಾರೆ, ತಮ್ಮ ಮತ್ತೊಂದು ಮಹತ್ವಕಾಂಕ್ಷೆಯ ಅಲಿಗರ್ ಚಿತ್ರ ಬಿಡುಗಡೆಗಾಗಿ ಕಾಯುತ್ತಿದ್ದಾರೆ.