ಐಎಫ್ಎಫ್ಎಂ ಅತ್ಯುತ್ತಮ ನಟ ಪ್ರಶಸ್ತಿಗಾಗಿ ಅಮಿತಾಭ್, ಆಮೀರ್ ಮಧ್ಯ ತೀವ್ರ ಸ್ಪರ್ಧೆ

ನವದೆಹಲಿ: ಇದೇ ಮೊದಲ ಬಾರಿಗೆ ‘ಥಗ್ಸ್‌ ಆಫ್‌ ಹಿಂದೂಸ್ತಾನ್‌’ಚಿತ್ರದಲ್ಲಿ ಜೊತೆಯಾಗಿ ನಟಿಸುತ್ತಿರುವ ಬಾಲಿವುಡ್ ಸೂಪರ್ ಸ್ಟಾರ್ ಗಳಾದ ಅಮಿತಾಭ್ ಬಚ್ಚನ್ ಹಾಗೂ ಆಮೀರ್ ಖಾನ್ ಅವರು 2017ನೇ ಸಾಲಿನ ಮೆಲ್ಬೋರ್ನ್ ಭಾರತೀಯ ಚಲನ ಚಿತ್ರೋತ್ಸವದ(ಐಎಫ್ಎಫ್ಎಂ) ಅತ್ಯುತ್ತಮ ನಟ ಪ್ರಶಸ್ತಿಗೆ ನಾಮ ನಿರ್ದೇಶನಗೊಂಡಿದ್ದಾರೆ.

ಮಂಗಳವಾರ ಪ್ರಕಟಣೆಯ ಮೂಲಕ ಅತ್ಯುತ್ತಮ ನಟ ಪ್ರಶಸ್ತಿಯ ನಾಮಿನಿಗಳನ್ನು ಘೋಷಿಸಲಾಗಿದೆ.

ಪಿಂಕ್ ಚಿತ್ರದಲ್ಲಿನ ಅಭಿನಯಕ್ಕಾಗಿ ಅಮಿತಾಭ್ ಬಚ್ಚನ್ ಹಾಗೂ ಬ್ಲಾಕ್ ಬಸ್ಟರ್ ದಂಗಲ್ ಚಿತ್ರದಲ್ಲಿನ ಅಭಿನಯಕ್ಕಾಗಿ ಆಮೀರ್ ಖಾನ್ ಅವರು ನಾಮಿನೇಟ್ ಆಗಿದ್ದಾರೆ. ಅಲ್ಲದೆ ಟ್ರಾಪಡ್ ಚಿತ್ರದಲ್ಲಿನ ಅಭಿನಯಕ್ಕಾಗಿ ರಾಜಕುಮಾರ್ ರಾವ್, ಎಂಎಸ್ ಧೋನಿ ಚಿತ್ರದಲ್ಲಿನ ಅಭಿನಯಕ್ಕಾಗಿ ಸುಶಾಂತ್ ಸಿಂಗ್ ರಜಪುತ್ ಹಾಗೂ ಮುಕ್ತಿ ಭವನ್ ಚಿತ್ರದ ಅಭಿನಯಕ್ಕಾಗಿ ಲಲಿತ್ ಭೆಲ್ ನಾಮಿನೇಟ್ ಆಗಿದ್ದಾರೆ.

ಇನ್ನು ಅತ್ಯುತ್ತಮ ನಟಿ ಪ್ರಶಸ್ತಿಗಾಗಿ ಡೀಯರ್ ಜಿಂದಗಿ ಚಿತ್ರದಲ್ಲಿನ ಅಭಿನಯಕ್ಕಾಗಿ ಆಲಿಯಾ ಭಟ್, ಕಹಾನಿ 2 ಚಿತ್ರದಲ್ಲಿನ ಅಭಿನಯಕ್ಕಾಗಿ ವಿದ್ಯಾ ಬಾಲನ್, ಡಾ.ರಖ್ಮಾಬಾಯಿ ಚಿತ್ರದ ಅಭಿನಯಕ್ಕಾಗಿ ತನಿಷ್ಠಾ ಚಟರ್ಜಿ, ಲಿಫ್ಟಿಂಕ್ ಅಂಡರ್ ಮೈ ಬುರ್ಖಾ ಚಿತ್ರದಲ್ಲಿನ ಅಭಿನಯಕ್ಕಾಗಿ ಕೊಂಕಣ ಸೇನ್ ಹಾಗೂ ಪಿನ್ನೆಯಮ್ ಚಿತ್ರದಲ್ಲಿನ ಅಭಿನಯಕ್ಕಾಗಿ ಕಾವ್ಯಾ ಮಾಧವನ್ ಅವರು ನಾಮಿನೇಟ್ ಆಗಿದ್ದಾರೆ.