ಮುಂಬೈ : ಬಾಲಿವುಡ್ ನಟ ಸಂಜಯ್ ದತ್ ಬರೆಯುತ್ತಿರುವ ಆತ್ಮಚರಿತ್ರೆ ಮುಂದಿನ ವರ್ಷ ಬಿಡುಗಡೆಯಾಗಲಿದೆ. ಈ ಹಿಂದೆ ಏಲ್ಲಿಯೂ ಹೇಳದ ಅನೇಕ ಕುತೂಹಲಕಾರಿ ವಿಷಯಗಳನ್ನು ಈ ಪುಸ್ತಕದಲ್ಲಿ ಸಂಜಯ್ ದತ್ ಹೇಳುತ್ತಿದ್ದಾರೆ.
ಸಂಜಯ್ ದತ್ ಅವರ 60 ಹುಟ್ಟುಹಬ್ಬದ ಕೊಡುಗೆಯಾಗಿ ಜುಲೈ 29, 2019ರಂದು ಈ ಪುಸ್ತಕವನ್ನು ಹರ್ಪರ್ ಕೊಲ್ಲಿನ್ಸ್ ಪ್ರಕಾಶಕ ಸಂಸ್ಥೆ ಬಿಡುಗಡೆ ಮಾಡಲಿದೆ.
ಈ ಪುಸ್ತಕದೊಂದಿಗೆ ಸಂಜಯ್ ದತ್ ಅವರ ಮನದಾಳದ ಮಾತುಗಳನ್ನು ಕೇಳುವ ತವಕದಲ್ಲಿ ಓದುಗರಿದ್ದಾರೆ. ಸಂಜಯ್ ದತ್ ಯೌವ್ವನ, 80 ಹಾಗೂ 90 ರ ದಶಕದಲ್ಲಿ ಬಾಲಿವುಡ್ ನಲ್ಲಿನ ಅವರ ವೈಭವಯುತ ಜೀವನ, ಹಾಗೂ ಕಾರಾಗೃಹದಲ್ಲಿನ ಅನುಭವಗಳನ್ನು ಸಂಜಯ್ ದತ್ ಹಂಚಿಕೊಳ್ಳಲಿದ್ದಾರೆ ಎಂದು ಪ್ರಕಾಶಕ ಸಂಸ್ಥೆ ತಿಳಿಸಿದೆ.
ವಿವಾದಾತ್ಮಕ ನಟನ ಕುರಿತ ಸಂಜು ಬಯೋಪಿಕ್ ಈಗಾಗಲೇ ಬಿಡುಗಡೆಯಾಗಿದೆ. ರಣಬೀರ್ ಕಪೂರ್ ಹಾಗೂ ದತ್ ಅಭಿಯನದ ಈ ಚಿತ್ರ ಬಾಕ್ಸ್ ಅಫೀಸ್ ನಲ್ಲಿ 250 ಕೋಟಿ ರೂಪಾಯಿಗಳನ್ನು ಬಾಚಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ.
ಈ ಹಿಂದೆ ಎಲ್ಲಿಯೂ ಹೇಳದ ಅನೇಕ ಸಂಗತಿಗಳು, ಕಷ್ಟ , ಸುಖಗಳನ್ನು ಈ ಪುಸ್ತಕದಲ್ಲಿ ಹಂಚಿಕೊಂಡಿದ್ದು, ಪುಸ್ತಕ ಬಿಡುಗಡೆಗಾಗಿ ಕಾಯುತ್ತಿರುವುದಾಗಿ ಸಂಜಯ್ ದತ್ ಹೇಳಿದ್ದಾರೆ.
