ಮುಂಬೈ: ಪುರುಷರು ತಮ್ಮ ಭಾವನೆಗಳ ವಿಷಯದಲ್ಲಿ ಮುಕ್ತವಾಗಿರಬೇಕು ಮತ್ತು ತಮ್ಮ ಸೂಕ್ಷ್ಮ ಸ್ವಭಾವವನ್ನು ಒಪ್ಪಿಕೊಳ್ಳಬೇಕು; ಸೂಕ್ಷ್ಮತೆಯು ಕೇವಲ ಮಹಿಳೆಯರಿಗೆ ಮಾತ್ರ ಸೀಮಿತವಾದುದಲ್ಲ ಎಂದು ಬಾಲಿವುಡ್ ನಟಿ ಕರೀನಾ ಕಪೂರ್ ಖಾನ್ ಅಭಿಪ್ರಾಯಪಟ್ಟಿದ್ದಾರೆ.
ಮುಂಬೈನಲ್ಲಿ ತಮ್ಮ ಮುಂಬರುವ ಚಿತ್ರ 'ದಾಯ್ರಾ'ದ (Daayra) ಟ್ರೇಲರ್ ಬಿಡುಗಡೆ ಸಮಾರಂಭದಲ್ಲಿ ಮಾತನಾಡಿದ ಕರೀನಾ, ಸಾಮಾನ್ಯವಾಗಿ ಮಹಿಳೆಯರನ್ನು ಹೆಚ್ಚು ಸೂಕ್ಷ್ಮ ಸ್ವಭಾವದವರೆಂದು ಪರಿಗಣಿಸಲಾಗುತ್ತದೆಯಾದರೂ, ಪುರುಷರು ಮತ್ತು ಹುಡುಗರು ಕೂಡ ತಮ್ಮ ಭಾವನೆಗಳನ್ನು ವ್ಯಕ್ತಪಡಿಸಲು ಹಾಗೂ ಜೀವನದಲ್ಲಿ ಎದುರಾಗುವ ಸವಾಲುಗಳನ್ನು ಎದುರಿಸಲು ಮುಕ್ತ ಮನಸ್ಥಿತಿಯನ್ನು ಹೊಂದಿರಬೇಕು ಎಂದು ಹೇಳಿದರು.
ತಮ್ಮ ಇಬ್ಬರು ಗಂಡುಮಕ್ಕಳಿಗೆ ತಮ್ಮ ಭಾವನೆಗಳನ್ನು ಮುಕ್ತವಾಗಿ ಸ್ವೀಕರಿಸುವಂತೆ ಹೇಗೆ ಪ್ರೋತ್ಸಾಹಿಸುತ್ತೇನೆ ಎಂಬುದನ್ನು ನಟಿ ವಿವರಿಸಿದರು; ಅವರಿಗೆ ಅಳಬೇಕೆನಿಸಿದಾಗ ಅಳುವುದು ಸಂಪೂರ್ಣವಾಗಿ ಸಹಜ ಮತ್ತು ಸರಿಯಾದ ವಿಷಯ ಎಂದರು.
'ಅಂತಿಮವಾಗಿ, ನಾನು ಇಬ್ಬರು ಗಂಡುಮಕ್ಕಳ ತಾಯಿ. ಸಹಜವಾಗಿಯೇ ನನಗೆ ಭಯವಿರುತ್ತದೆ, ಏಕೆಂದರೆ ಒಬ್ಬ ತಾಯಿಯಾಗಿ ನಾನು ಅವರಿಗೆ ಅತ್ಯುತ್ತಮವಾದುದನ್ನೇ ನೀಡಲು ಮತ್ತು ಅವರನ್ನು ರಕ್ಷಿಸಲು ಬಯಸುತ್ತೇನೆ; ಅದೇ ಸಮಯದಲ್ಲಿ, ಅವರು ಜವಾಬ್ದಾರಿಯುತ ವ್ಯಕ್ತಿಗಳಾಗುವಂತೆ ನೋಡಿಕೊಳ್ಳಲೂ ಬಯಸುತ್ತೇನೆ. ಹೀಗಾಗಿ, ನಾನು ಸದಾ ಪ್ರಾರ್ಥಿಸುವುದು ಕೇವಲ ದಯೆ ಮತ್ತು ಮೃದು ಸ್ವಭಾವಕ್ಕಾಗಿ ಮಾತ್ರ. ಪುರುಷರು ಹೆಚ್ಚು ದಯಾಳುಗಳಾಗಿರಬೇಕು, ಹುಡುಗರು ಹೆಚ್ಚು ದಯಾಳುಗಳಾಗಿ ಬೆಳೆಯಬೇಕು' ಎಂದು ಅವರು ಒತ್ತಿ ಹೇಳಿದರು.
'ಯೇ ಸೋಚ್ ಹಮೇಶಾ ಹೈ ಕೆ ಲಡ್ಕಿ ಹಮೇಶಾ ಬಹೂತ್ ಸೆನ್ಸಿಟಿವ್ ಹೋತಿ ಹೈ (ಹುಡುಗಿಯರು ಯಾವಾಗಲೂ ತುಂಬಾ ಸೂಕ್ಷ್ಮವಾಗಿರುತ್ತಾರೆ ಎಂಬ ಆಲೋಚನೆ ಯಾವಾಗಲೂ ಇರುತ್ತದೆ), ಆದರೆ ಅದು ನಿಜವಲ್ಲ. ಇಂದಿನ ಪುರುಷರು ಮತ್ತು ಹುಡುಗರಿಗೆ ಸೂಕ್ಷ್ಮವಾಗಿರಲು, ಹುಡುಗಿಯ ಮುಂದೆ ಅಳಲು ಅಥವಾ ತಾಯಿಯ ಮುಂದೆ ಅಳಲು ಭಯವಿಲ್ಲ ಎಂದು ನಾನು ಭಾವಿಸುತ್ತೇನೆ. ನಾನು ಯಾವಾಗಲೂ ನನ್ನ ಮಗನಿಗೆ ಹೇಳುತ್ತೇನೆ, ನಿಮಗೆ ಅಳಬೇಕು ಎನಿಸಿದರೆ ಅತ್ತುಬಿಡಿ ಎಂದು. ಏಕೆಂದರೆ ಅವರು ಅದನ್ನು ಅನುಭವಿಸಬೇಕು ಮತ್ತು ಅವರು ತಿಳಿದುಕೊಳ್ಳಬೇಕು' ಎಂದು ಕರೀನಾ ಹೇಳಿದರು.
ಮಕ್ಕಳು ತಮ್ಮ ಭಾವನೆಗಳನ್ನು ಅನುಭವಿಸಲು ಮತ್ತು ವ್ಯಕ್ತಪಡಿಸಲು ಅವಕಾಶ ನೀಡುವುದು ಅವರ ಬೆಳವಣಿಗೆಗೆ ಮುಖ್ಯ. ಅದೇ ವೇಳೆ ಬಾಲಕರು ಹಾಗೂ ಪುರುಷರಲ್ಲಿ ಹೆಚ್ಚಿನ ದಯಾಭಾವದ ಅಗತ್ಯವನ್ನೂ ಪುನರುಚ್ಚರಿಸಿದರು.
ಕರೀನಾ ಅವರ 'ದಾಯ್ರಾ' ಚಿತ್ರವು ಸೆಪ್ಟೆಂಬರ್ 18 ರಂದು ಬಿಡುಗಡೆಯಾಗಲಿದೆ. ಬಾಲಾಪರಾಧದ ಕತ್ತಲ ಮತ್ತು ಸಂಕೀರ್ಣ ಜಗತ್ತಿನಲ್ಲಿ ಮುಖಾಮುಖಿಯಾಗುವ ಪೊಲೀಸ್ ಅಧಿಕಾರಿಗಳ ಪಾತ್ರಗಳಲ್ಲಿ ಕರೀನಾ ಮತ್ತು ಪೃಥ್ವಿರಾಜ್ ಸುಕುಮಾರನ್ ನಟಿಸಿದ್ದಾರೆ.
ಚಿತ್ರತಂಡದ ಪ್ರಕಾರ, ಈ ಚಿತ್ರವು 'ನೈಜ ಘಟನೆಗಳಿಂದ ಪ್ರೇರಿತವಾಗಿದೆ'.
