ನವದೆಹಲಿ: ನಟಿ ಸೋನಾಕ್ಷಿ ಸಿನ್ಹಾ ನಟನೆಯ 'ತು ಹೈ ಮೇರಿ ಕಿರಣ್' ಚಿತ್ರ ಬಿಡುಗಡೆಯಾಗಿ ಆರು ದಿನ ಕಳೆದಿದೆ. ಆದರೆ ಈಗಾಗಲೇ ಬಾಕ್ಸ್ ಆಫೀಸ್‌ನಲ್ಲಿ ಮಕಾಡೆ ಮಲಗಿದೆ. ಆರಂಭದಿಂದಲೂ ಈ ಚಿತ್ರಕ್ಕೆ ಪ್ರೇಕ್ಷಕರಿಂದ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು ಗಳಿಕೆಯಲ್ಲೂ ಗಮನಾರ್ಹ ಏರಿಕೆ ಕಂಡುಬಂದಿಲ್ಲ. ಆರನೇ ದಿನದ ಚಿತ್ರದ ಕಲೆಕ್ಷನ್ ಲಕ್ಷಾಂತರ ರೂಪಾಯಿಗಳಲ್ಲಿಯೇ ಉಳಿದಿದೆ. ಸೋನಾಕ್ಷಿ ಸಿನ್ಹಾ ಪತಿ ಜಹೀರ್ ಇಕ್ಬಾಲ್ ಕೂಡ ಚಿತ್ರದಲ್ಲಿ ನಟಿಸಿದ್ದಾರೆ. ಆದರೆ ಈ ಜೋಡಿ ಚಿತ್ರವನ್ನು ಬಾಕ್ಸ್ ಆಫೀಸ್‌ನಲ್ಲಿ ಮುನ್ನಡೆಸುವಲ್ಲಿ ವಿಫಲವಾಗಿದೆ.
ಸ್ಯಾಕ್‌ನೀಲ್ಕ್ ಪ್ರಕಾರ, ಸೋನಾಕ್ಷಿ ಸಿನ್ಹಾ ಮತ್ತು ಜಹೀರ್ ಇಕ್ಬಾಲ್ ನಟನೆಯ "ತು ಹೈ ಮೇರಿ ಕಿರಣ್" ಚಿತ್ರ ಬಿಡುಗಡೆಯಾದ ಐದನೇ ದಿನದಂದು ಕೇವಲ ₹3 ಲಕ್ಷ ರೂಪಾಯಿಗಳನ್ನು ಗಳಿಸಿದ್ದು, ಭಾರತದ ಒಟ್ಟು ನಿವ್ವಳ ಗಳಿಕೆ ಸುಮಾರು ₹43 ಲಕ್ಷಕ್ಕೆ ತಲುಪಿದೆ. ಈಗ ಅದರ ಒಟ್ಟು ಕಲೆಕ್ಷನ್ 46 ಲಕ್ಷ ರೂಪಾಯಿ ಮಾತ್ರ.
ತು ಹೈ ಮೇರಿ ಕಿರಣ್ ಮೊದಲ ದಿನ 14 ಲಕ್ಷ ಕಲೆಕ್ಷನ್ ಮಾಡಿತ್ತು. ಆದರೆ ನಂತರ ಸ್ಥಿರವಾದ ಕುಸಿತ ಕಂಡಿದೆ. ಈ ಚಿತ್ರವು ಎರಡನೇ ಮತ್ತು ಮೂರನೇ ದಿನಗಳಲ್ಲಿ ತಲಾ 10 ಲಕ್ಷ ಗಳಿಸಿದೆ. ನಾಲ್ಕನೇ, ಐದನೇ ಮತ್ತು ಆರನೇ ದಿನವೂ ತಲಾ 3 ಲಕ್ಷ ರೂಪಾಯಿ ಕಲೆಕ್ಷನ್ ಮಾಡಿದೆ.
2026ರ ಅಕ್ಟೋಬರ್ 23ರಂದು ಬಿಡುಗಡೆಯಾದ 25 ಕೋಟಿ ಬಜೆಟ್ ನ ತು ಹೈ ಮೇರಿ ಕಿರಣ್ ಚಿತ್ರವನ್ನು ಕರಣ್ ರಾವಲ್ ನಿರ್ದೇಶಿಸಿದ್ದು ಇದು ಮಾನಸಿಕ ಥ್ರಿಲ್ಲರ್ ಚಿತ್ರವಾಗಿದೆ. ಸೋನಾಕ್ಷಿ ಸಿನ್ಹಾ ಜಹೀರ್ ಇಕ್ಬಾಲ್ ಮತ್ತು ಅಂಕಿತ್ ಗುಪ್ತಾ ಅವರೊಂದಿಗೆ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
