ಕಲೆಕ್ಷನ್‌ನಲ್ಲಿ ಸೋತ 'ಲಿಂಗಾ': ರಜನಿ ಮೊರೆಹೋದ ವಿತರಕರು

ಚೆನ್ನೈ: ಸೂಪರ್ ಸ್ಟಾರ್ ರಜನಿಕಾಂತ್ ಅಭಿನಯದ ಭಾರಿ ಬಜೆಟ್‌ನಲ್ಲಿ ನಿರ್ಮಾಣವಾದ ಲಿಂಗಾ ಚಿತ್ರ ಎರಡನೇ ವಾರ ಕಳೆಯುತ್ತಿದ್ದಂತೆ ಬಾಕ್ಸ್ ಆಫೀಸ್ ಕಲೆಕ್ಷನ್ ಕಡಿಮೆಯಾಗಿದೆ.

ಈ ವರ್ಷದ ರಜನಿಕಾಂತರ ಬಹುನಿರೀಕ್ಷಿತ ಲಿಂಗಾ ಚಿತ್ರದ ಬಾಕ್ಸ್ ಆಫೀಸ್‌ ರಿಪೋರ್ಟ್ ತಲೆಕೆಳಗಾಗಿದೆ. ಸಾಧಾರಣ ಕಥೆ ಇರುವ ಈ ಚಿತ್ರದ ಬಗ್ಗೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಇದೇ ವೇಳೆ ಸಾಕಷ್ಟು ಇತರ ಹೀರೋಗಳ ಚಿತ್ರಗಳು ತೆರೆಗೆ ಬಂದಿದ್ದು ಬಾಕ್ಸ್ ಆಫೀಸ್ ಕಲೆಕ್ಷನ್ ಕಡಿಮೆಯಾಗಲು ಕಾರಣ ಎನ್ನಲಾಗುತ್ತಿದೆ.

ಲಿಂಗಾ ಚಿತ್ರ ಸುಮಾರು 100 ಕೋಟಿ ಬಜೆಟ್‌ನಲ್ಲಿ ನಿರ್ಮಿಸಲಾಗಿತ್ತು. ಬಿಡುಗಡೆ ದಿನ ಉತ್ತಮ ಪ್ರತಿಕ್ರಿಯೆ ಸಿಕ್ಕದ್ದ ಚಿತ್ರ ಇದೀಗ ಕಲೆಕ್ಷನ್ ಡಲ್ ಹೊಡೆಯುತ್ತಿದೆ. ತಮಿಳುನಾಡಿನಲ್ಲೇ ರು. 38 ಕೋಟಿ ಇದುವರೆಗಿನ ಗಳಿಕೆಯಾಗಿದೆ.

ಉಳಿದಂತೆ ಚಿತ್ರದ ಗಳಿಕೆ ನಿರಾಶಾದಾಯಕವಾಗಿದೆ ಅಂತ ವಿತರಕರು ಹಾಗೂ ಚಿತ್ರಮಂದಿರದ ಮಾಲೀಕರು ನಿರ್ಮಾಪಕ ವಿರುದ್ಧ ತಿರುಗಿ ಬಿದ್ದಿದ್ದಾರೆ.

ಲಿಂಗ ಚಿತ್ರ ಗಳಿಕೆ ನಿರಾಶಾದಾಯಕವಾಗಿರುವುದರಿಂದ ನಮ್ಮ ಪರಿಸ್ಥಿತಿಯನ್ನು ತಿಳಿದು ರಜನಿಕಾಂತ ಅವರೇ ಮಧ್ಯಪ್ರವೇಶಿಸಿ ವಿತರಕರಿಗೆ ಪರಿಹಾರ ನೀಡಬೇಕಾಗಿ ಮನವಿ ಮಾಡುವುದಾಗಿ ವಿತರಕರು ತೀರ್ಮಾನಿಸಿದ್ದಾರೆ.