ಬೆಂಗಳೂರು: ಬುದ್ಧನ ಜೀವನಚರಿತ್ರೆಗೆ ಸಂಬಂಧಿಸಿದ ನಾಟಕಗಳು ವಿರಳವೇನಲ್ಲ ಆದರೆ ಪ್ರಸಾದನ ಕಲಾವಿದ ಕೃಷ್ಣ ಹೇಳಿಕೊಳ್ಳುವಂತೆ 'ಬುದ್ಧ ಜೀವನ ಚರಿತ್ರೆ - ಕತ್ತಲೆಯಿಂದ ಬೆಳಕಿನೆಡೆಗೆ' ಇದೆ ಮೊದಲ ಬಾರಿಗೆ ಕನ್ನಡದಲ್ಲಿ ಮೂಡಿಬರುತ್ತಿದೆಯಂತೆ. ಮೇಕಪ್ ಕೃಷ್ಣ ಎಂದೇ ಹೆಸರಾಗಿರುವ ಇವರು ಈ ನಾಟಕವನ್ನು ನಿರ್ದೇಶಿಸಿದ್ದಾರೆ.
೨೦ ದಿನಗಳ ಕಾಲ ಬೋಧ್ ಗಯಾದಲ್ಲಿ ತಂಗಿದ್ದ ಕೃಷ್ಣ ಅವರಿಗೆ ಗುರುಗಳೊಬ್ಬರು ಬುದ್ಧನ ಜಾತಕವನ್ನು ನಿರೂಪಿಸಿದಾಗ ಈ ನಾಟಕ ನಿರ್ದೇಶಿಸುವ ಸ್ಫೂರ್ತಿ ಸಿಕ್ಕಿತಂತೆ.
೫೮ ವರ್ಷದ ಕೃಷ್ಣ ಕಳೆದ ೪೨ ವರ್ಷಗಳಿಂದ ಕನ್ನಡ ಚಿತ್ರರಂಗದಲ್ಲಿ ತೊಡಗಿಸಿಕೊಂಡಿರುವವರು. "ಈ ಆಸಕ್ತಿದಾಯಕ ವಿಷಯವನ್ನು ಕನ್ನಡ ರಂಗಭೂಮಿಯಲ್ಲಿ ಇಲ್ಲಿಯವರೆಗೂ ಏಕೆ ಎತ್ತಿಕೊಳ್ಳಲಿಲ್ಲವೋ ತಿಳಿಯದು. ನಾನು ಬುದ್ಧನ ಬಗ್ಗೆ ಸಾಕಷ್ಟು ಪುಸ್ತಕಗಳನ್ನು ಓದಿದ್ದೇನೆ ಮತ್ತು ಈಗ ಬುದ್ಧನ ಬೋಧನೆಯನ್ನು ಜನರೊಂದಿಗೆ ಹಂಚಿಕೊಳ್ಳುತ್ತಿರುವುದಕ್ಕೆ ಸಂತಸವಾಗುತ್ತಿದೆ" ಎನ್ನುತ್ತಾರೆ.
ಈ ಎರಡು ಘಂಟೆಗಳ ನಾಟಕದಲ್ಲಿ ೨೫ ಜನರ ತಂಡ ಭಾಗವಹಿಸಲಿದೆಯಂತೆ. ಈಗಾಗಲೇ ಹಲವು ಕಡೆ ಪ್ರದರ್ಶನ ಕಂಡು ಪ್ರಶಂಸೆ ಗಳಿಸಿರುವ ಈ ನಾಟಕ ಮತ್ತೆ ಜುಲೈ ೪ ಮತ್ತು ಜುಲೈ ೬ ರಂದು, ಕಲಾಗ್ರಾಮ ಮಲ್ಲತ್ತಹಳ್ಳಿಯಲ್ಲಿ ಸಂಜೆ ೬:೩೦ ಕ್ಕೆ ಪ್ರದರ್ಶನಗೊಳ್ಳಲಿದೆ.
