'ರೈಡರ್' ಚಿತ್ರದಲ್ಲಿ ಪಾತ್ರ ನನಗೆ ಹೇಳಿ ಮಾಡಿಸಿದಂತಿದೆ: ನಿಖಿಲ್ ಕುಮಾರಸ್ವಾಮಿ

ತಮ್ಮ ಬಹುನಿರೀಕ್ಷಿತ ರೈಡರ್ ಚಿತ್ರದ ಶೂಟಿಂಗ್ ಮುಗಿಸಿರುವ ನಿಖಿಲ್ ಕುಮಾರಸ್ವಾಮಿ ಅದರ ಡಬ್ಬಿಂಗ್ ಕೆಲಸದಲ್ಲಿ ತೊಡಗಿದ್ದಾರೆ. ಚಿತ್ರದ ಹಾಡೊಂದರ ಶೂಟಿಂಗ್ ಮಾತ್ರ ಬಾಕಿಯಿದೆ. ವಿಜಯ್ ಕುಮಾರ್ ಕೊಂಡ ನಿರ್ದೇಶನದ ರೈಡರ್ ಚಿತ್ರ ಕನ್ನಡ ಮತ್ತು ತೆಲುಗಿನಲ್ಲಿ ತಯಾರಾಗುತ್ತಿದೆ.

ಕೋವಿಡ್ ಮಧ್ಯೆ ರೈಡರ್ ಚಿತ್ರೀಕರಣದಲ್ಲಿ ಪಾಲ್ಗೊಂಡ ಅನುಭವವನ್ನು ಹಂಚಿಕೊಂಡ ನಿಖಿಲ್ ಕುಮಾರಸ್ವಾಮಿ, ಚಿತ್ರದ ಪಾತ್ರ ನನಗೆ ಹೇಳಿ ಮಾಡಿಸಿದಂತಿದೆ. ಸೀತಾರಾಮ ಕಲ್ಯಾಣ ಚಿತ್ರದ ಕೊನೆಯ ಹಂತದ ಚಿತ್ರೀಕರಣವಾಗುತ್ತಿರುವಾಗ ಈ ಕಥೆ ನನ್ನ ಬಳಿಗೆ ಬಂತು. ನಾನು ನನ್ನ ಐಡಿಯಾಗಳನ್ನು ಕೂಡ ನಿರ್ದೇಶಕರಿಗೆ ನೀಡಿದೆ. ಅವರು ಅದನ್ನು ಒಪ್ಪಿಕೊಂಡು ಚರ್ಚೆ, ವಿಮರ್ಶೆ ಮಾಡಿ ಒಂದು ಸುಂದರವಾದ ಕಥೆ ತಯಾರಿಸಿದೆವು, ಚಿತ್ರ ಚೆನ್ನಾಗಿ ಮೂಡಿಬಂದಿದೆ ಎಂದರು.

ಉತ್ತಮವಾದ ಪ್ರೇಮಕಥೆಯುಳ್ಳ ಈ ಚಿತ್ರವು ಕ್ರೀಡಾ ಹಿನ್ನೆಲೆಯನ್ನು ಹೊಂದಿದೆ. ಚಿಕ್ಕಣ್ಣ, ಮಂಜು ಪಾವಗಡ ಮತ್ತು ಸಂತು ಅವರ ಪಾತ್ರಗಳಲ್ಲಿ ಸಾಕಷ್ಟು ಮನರಂಜನಾ ಅಂಶಗಳಿವೆ. ಅಚ್ಯುತ್ ಕುಮಾರ್ ಮತ್ತು ನನ್ನ ನಡುವಿನ ತಂದೆ-ಮಗನ ಬಾಂಧವ್ಯ ಕೂಡ ಚಿತ್ರದ ಪ್ರಮುಖ ಅಂಶಗಳಲ್ಲಿ ಒಂದಾಗಿದೆ. ಚಿತ್ರದ ನಾಯಕಿ ಕಾಶ್ಮೀರಾ ಪರದೇಸಿ ಅವರ ಅಭಿನಯ ನಮ್ಮೆಲ್ಲರನ್ನೂ ಅಚ್ಚರಿಗೊಳಿಸಿತು. ಚಿತ್ರದಲ್ಲಿ ಅವರ ಪಾತ್ರವು ಪ್ಲಸ್ ಪಾಯಿಂಟ್ ಆಗಿದೆ ಎಂದರು. 

ನಿಖಿಲ್ ಕುಮಾರಸ್ವಾಮಿ ಮತ್ತು ಚಿತ್ರದ ನಿರ್ದೇಶಕ ವಿಜಯ್ ಒಟ್ಟಾಗಿ ಕೆಲಸ ಮಾಡುತ್ತಿರುವುದು ಇದೇ ಮೊದಲು. ನಿರ್ದೇಶಕರೊಂದಿಗೆ ಉತ್ತಮ ಬಾಂಧವ್ಯ ಬೆಳೆಸಿಕೊಂಡು ಹೋಗಲು ಬಹಳ ಪೂರಕ ಉತ್ತಮ ವಾತಾವರಣವಿತ್ತು. ಅಂತಿಮವಾಗಿ ನಟ ಮತ್ತು ನಿರ್ದೇಶಕರ ಹೊಂದಾಣಿಕೆ, ಬಾಂಧವ್ಯ ಪ್ರೇಕ್ಷಕರ ಮುಂದೆ ಒಂದು ಒಳ್ಳೆಯ ಚಿತ್ರವನ್ನು ಹೊರತರುವಲ್ಲಿ ಸಹಾಯ ಮಾಡುತ್ತದೆ. ರೈಡರ್ ಪ್ರೇಕ್ಷಕರಿಗೆ ಇಷ್ಟವಾಗುತ್ತದೆ ಎಂಬ ವಿಶ್ವಾಸವಿದೆ ಎಂದರು.

ನಿಖಿಲ್ ಹಿಂದೆ ತಮ್ಮ ಎರಡು ಚಿತ್ರಗಳ ನಿರ್ಮಾಣ ಜವಾಬ್ದಾರಿಯನ್ನು ಹೊತ್ತುಕೊಂಡಿದ್ದರು. ರೈಡರ್ ಚಿತ್ರದಲ್ಲಿ ಕೂಡ ಅವರು ನಿರ್ಮಾಪಕ ಚಂದ್ರು ಮನೋಹರನ್ ಜೊತೆ ಸಹಕರಿಸಿದ್ದಾರೆ. ಚಿತ್ರದ ನಿರ್ಮಾಣವು ಭರದಿಂದ ಸಾಗುತ್ತಿದ್ದು, ಚಿತ್ರವನ್ನು ಆದಷ್ಟು ಬೇಗ ಬಿಡುಗಡೆ ಮಾಡುವ ಯೋಜನೆಯನ್ನು ಚಿತ್ರತಂಡ ಹೊಂದಿದೆ.

ನಿಖಿಲ್ ಕುಮಾರಸ್ವಾಮಿ ಮುಂದಿನ ಚಿತ್ರ ಮಂಜು ಅಥರ್ವ ಜೊತೆಗೆ ಕೆವಿಎನ್ ಪ್ರೊಡಕ್ಷನ್ ನಿರ್ಮಿಸುತ್ತಿದೆ. ಅದು ಅಕ್ಟೋಬರ್ ನಲ್ಲಿ ಶೂಟಿಂಗ್ ಆರಂಭವಾಗಲಿದೆ.