'ದಿ ವಿಲನ್' ಚಿತ್ರದ ಸುಮಾರು ಎಂಟು ವರ್ಷಗಳ ನಂತರ ನಿರ್ದೇಶಕ ಪ್ರೇಮ್ ಮತ್ತು ಕಿಚ್ಚ ಸುದೀಪ್ ಮತ್ತೆ ಒಂದಾಗುತ್ತಿದ್ದಾರೆ. ಆದರೆ ಈ ಬಾರಿ, ಈ ಜೋಡಿಯು ಕುಟುಂಬ ಮತ್ತು ಇಂದಿನ ಪೀಳಿಗೆಯನ್ನು ಕೇಂದ್ರವಾಗಿರಿಸಿಕೊಂಡ ಕಥೆಯನ್ನು ಆಯ್ಕೆ ಮಾಡಿಕೊಂಡು ಸಿನಿಮಾ ಮಾಡಲು ಮುಂದಾಗಿದೆ.
ಸುದೀಪ್ ಅವರ ಹುಟ್ಟುಹಬ್ಬದಂದು ಚಿತ್ರದ ಘೋಷಣೆಯಾಗಿದ್ದು, ಪ್ರೇಮ್ ಅವರ ನಿರ್ದೇಶನದ 10ನೇ ಚಿತ್ರದಲ್ಲಿ ಸುದೀಪ್ ಮುಖ್ಯ ಭೂಮಿಕೆಯಲ್ಲಿ ನಟಿಸಲಿದ್ದಾರೆ ಎಂಬುದು ಖಚಿತವಾಗಿದೆ. ಚಿತ್ರದ ಶೀರ್ಷಿಕೆ ಹಾಗೂ ಉಳಿದ ತಾರಾಗಣ ಮತ್ತು ತಾಂತ್ರಿಕ ವರ್ಗದ ವಿವರಗಳನ್ನು ಇನ್ನೂ ಬಹಿರಂಗಪಡಿಸಬೇಕಿದೆ. ಆದಾಗ್ಯೂ, ಚಿತ್ರದ 'ಫಸ್ಟ್ ಲುಕ್' ಬಲವಾದ ಮ್ಯೂಸಿಕ್ ಸ್ಪರ್ಶದೊಂದಿಗೆ, 'ಈ ಬಾರಿ, ನಿಜಕ್ಕೂ ಇದು ಕೌಟುಂಬಿಕ ವಿಷಯ' (This time, seriously, it’s a family matter) ಎಂಬ ಟ್ಯಾಗ್ಲೈನ್ನೊಂದಿಗೆ ಬಿಡುಗಡೆಯಾಗಿದೆ.
2018ರಲ್ಲಿ ಬಿಡುಗಡೆಯಾದ 'ದಿ ವಿಲನ್' ಚಿತ್ರದಲ್ಲಿ ಸುದೀಪ್ ಮತ್ತು ಶಿವರಾಜ್ಕುಮಾರ್ ನಟಿಸಿದ್ದರು. ಇದೀಗ ಸುದೀಪ್ ಜೊತೆಗೆ ಪ್ರೇಮ್ ಮತ್ತೊಮ್ಮೆ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳುತ್ತಿದ್ದಾರೆ. 'ಎಕ್ಸ್ಕ್ಯೂಸ್ ಮಿ' ಮತ್ತು 'ಜೋಗಿ'ಯಿಂದ ಹಿಡಿದು 'ದಿ ವಿಲನ್'ವರೆಗಿನ ಅವರ ಚಿತ್ರಗಳಲ್ಲಿ ಸಂಗೀತವು ಪ್ರಮುಖ ಪಾತ್ರ ವಹಿಸುತ್ತಾ ಬಂದಿದೆ. ಹೀಗಾಗಿ, ಸುದೀಪ್ ಅವರೊಂದಿಗಿನ ಈ ಮರುಸಂಗಮವು ವ್ಯಾಪಕ ನಿರೀಕ್ಷೆ ಮೂಡಿಸಿದೆ.
ಹೊಸ ಚಿತ್ರವು ಇಂದಿನ ಪೀಳಿಗೆಗೆ ಸಂಬಂಧಿಸಿದ ಕೌಟುಂಬಿಕ ಬಾಂಧವ್ಯಗಳು ಹಾಗೂ ಭಾವನೆಗಳನ್ನು ಒಳಗೊಂಡಿದೆ ಎಂದು ಪ್ರೇಮ್ ತಿಳಿಸಿದ್ದು, ಕಥಾವಸ್ತುವಿನ ಬಗ್ಗೆ ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸದಿರಲು ನಿರ್ಧರಿಸಿದ್ದಾರೆ. ಆದರೆ, ಚಿತ್ರವು ವರ್ಣರಂಜಿತ ನಿರೂಪಣೆಯನ್ನು ಹೊಂದಿರುತ್ತದೆ ಎಂದು ಭರವಸೆ ನೀಡಿದ್ದಾರೆ. ಅಕ್ಟೋಬರ್ 20 ರಂದು ನಡೆಯಲಿರುವ ಚಿತ್ರದ ಮುಹೂರ್ತದೊಂದಿಗೆ ಈ ಯೋಜನೆ ಅಧಿಕೃತವಾಗಿ ಆರಂಭವಾಗಲಿದೆ.
ಇದರ ಜೊತೆಗೆ, ಅನೂಪ್ ಭಂಡಾರಿ ನಿರ್ದೇಶನದ ಬಹುನಿರೀಕ್ಷಿತ ಸುದೀಪ್ ಅವರ 'ಬಿಲ್ಲಾ ರಂಗ ಭಾಷಾ' ಚಿತ್ರದ ನಿರ್ಮಾಣ ಕಾರ್ಯ ಸದ್ಯ ನಡೆಯುತ್ತಿದೆ. ಅವರು ಐತಿಹಾಸಿಕ ಚಿತ್ರವೊಂದಕ್ಕಾಗಿ 'ಪೀಪಲ್ ಮೀಡಿಯಾ ಫ್ಯಾಕ್ಟರಿ'ಯೊಂದಿಗೆ ಕೈಜೋಡಿಸಿದ್ದು, 'ದೇವರಾಯ' ಎಂಬ ಆ ಚಿತ್ರದ ಕೆಲಸಗಳು ನಡೆಯುತ್ತಿವೆ; ಅಲ್ಲದೆ, ಇನ್ನೂ ಕೆಲವು ಯೋಜನೆಗಳು ಚರ್ಚೆಯ ಹಂತದಲ್ಲಿವೆ.
