ಸ್ಕಾಟ್ಲ್ಯಾಂಡ್: ದಕ್ಷಿಣ ಭಾರತದ ಖ್ಯಾತ ತಾರಾದಂಪತಿ ಸೂರ್ಯ ಮತ್ತು ಜ್ಯೋತಿಕಾ ತಮ್ಮ 20 ವರ್ಷಗಳ ಯಶಸ್ವಿ ದಾಂಪತ್ಯ ಜೀವನದ ಮೈಲಿಗಲ್ಲನ್ನು ಸಂಭ್ರಮಿಸಲು ವಿದೇಶದಲ್ಲಿ ಕ್ರಿಶ್ಚಿಯನ್ ಸಂಪ್ರದಾಯದಂತೆ ಮರು ಮದುವೆಯಾಗಿದ್ದಾರೆ. 2006ರ ಸೆಪ್ಟೆಂಬರ್ 11 ರಂದು ಹಿಂದೂ ಸಂಪ್ರದಾಯದಂತೆ ವಿವಾಹವಾಗಿದ್ದ ಈ ಜೋಡಿ, ಈಗ ಎರಡು ದಶಕಗಳ ಪ್ರೀತಿಯ ನೆನಪಿಗಾಗಿ ಸ್ಕಾಟ್ಲ್ಯಾಂಡ್ನ ಸುಂದರ ಚರ್ಚ್ ಒಂದರಲ್ಲಿ ಪರಸ್ಪರ ಮತ್ತೆ ವಿವಾಹದ ಪ್ರತಿಜ್ಞೆಗಳನ್ನು ವಿನಿಮಯ ಮಾಡಿಕೊಂಡಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:
ಮರು ಮದುವೆಗೆ ಮಕ್ಕಳೇ ಸಾಕ್ಷಿ....
ಈ ಮರು ಮದುವೆಯ ಅತ್ಯಂತ ವಿಶೇಷ ಕ್ಷಣವೆಂದರೆ, ದಂಪತಿಯ ಮಕ್ಕಳಾದ ಮಗಳು ದಿಯಾ ಮತ್ತು ಮಗ ದೇವ್ ತಂದೆ-ತಾಯಿಯ ಮದುವೆಗೆ ಸಾಕ್ಷಿಯಾಗಿರುವುದು. ಹೌದು, ಮಗ ದೇವ್ ತಾಯಿ ಜ್ಯೋತಿಕಾರನ್ನು ಕೈಹಿಡಿದು ಮಂಟಪದತ್ತ ಕರೆತಂದರೆ, ಮಗಳು ದಿಯಾ ತಂದೆಯ ಪಕ್ಕ ನಿಂತು ಸಂಭ್ರಮಿಸಿದ್ದಾಳೆ. ಇನ್ನು, ಈ ಆಪ್ತ ಸಮಾರಂಭದಲ್ಲಿ ಸೂರ್ಯ ಅವರ ಸಹೋದರ, ನಟ ಕಾರ್ತಿ ಹಾಗೂ ತೀರ ಆಪ್ತ ಸ್ನೇಹಿತರು ಮತ್ತು ಕುಟುಂಬಸ್ಥರು ಮಾತ್ರ ಭಾಗವಹಿಸಿದ್ದರು.
ಮುಂದುವರೆದು, ಈ ಸುಂದರ ಕ್ಷಣಗಳ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಜ್ಯೋತಿಕಾ, ಇದನ್ನು ದಿ ಸೀಕ್ವೆಲ್ ಎಂದು ಕರೆದಿದ್ದು, "ಇದು ಪರಿಪೂರ್ಣ ಮದುವೆಯ ಆಚರಣೆಯಲ್ಲ. ಇದು ನಮ್ಮ ಅಪರಿಪೂರ್ಣತೆಗಳು, ಹೊಂದಾಣಿಕೆಗಳು, ತ್ಯಾಗಗಳು ಮತ್ತು ನಿಸ್ವಾರ್ಥ ಪ್ರೀತಿಯ ಆಚರಣೆ. ನನ್ನ ಸೂರ್ಯನಿಗಾಗಿ ನಾನು ಯಾವಾಗಲೂ ಆ ಅಪರಿಪೂರ್ಣ ಪತ್ನಿಯಾಗಿಯೇ ಇರಲು ಬಯಸುತ್ತೇನೆ. ಜಗಳವಾಡಿ, ಮತ್ತೆ ಒಂದಾಗುತ್ತಾ ನಿನ್ನೊಂದಿಗೆ ಇನ್ನಷ್ಟು ಹತ್ತಿರವಾಗುತ್ತೇನೆ. ನಮ್ಮ ಮುಂದಿನ 20 ವರ್ಷಗಳ ಪಯಣಕ್ಕೆ ಶುಭವಾಗಲಿ" ಎಂದು ಬರೆದುಕೊಂಡಿದ್ದಾರೆ.
ಏತನ್ಮಧ್ಯೆ, 1999 ರ ಪೂವೆಲ್ಲಾಂ ಕೇಟ್ಟುಪ್ಪಾರ್ ಚಿತ್ರದ ಮೂಲಕ ಮೊದಲ ಬಾರಿಗೆ ತೆರೆ ಹಂಚಿಕೊಂಡ ಈ ಜೋಡಿ ನಂತರ ಕಾದಲ್, ಕಾಖ ಕಾಖ, ಮಾಯಾವಿ ಮುಂತಾದ ಹಿಟ್ ಚಿತ್ರಗಳಲ್ಲಿ ನಟಿಸಿ 2006 ರಲ್ಲಿ ಹಸೆಮಣೆ ಏರಿತ್ತು. ಇದೀಗ ಇವರ ಈ ನವೀಕೃತ ಪ್ರತಿಜ್ಞೆ ಅಭಿಮಾನಿಗಳ ಮನಗೆದ್ದಿದೆ.
