ವಾಣೀಪತಿಯ ಪಕ್ಕದಲ್ಲಿ ಶ್ವೇತ ದುಕೂಲ ಧಾರಿಣಿ ಸರಸ್ವತಿ . ಋಕ್ , ಯಜುಸ್ , ಸಾಮ , ಅಥರ್ವಣ ವೇದಗಳೂ , ಶಿಕ್ಷಾ , ಕಲ್ಪ , ನಿರುಕ್ತ , ಜ್ಯೋತಿಷ , ವ್ಯಾಕರಣ , ಛಂದಸ್ಸು , ಎಂಬ ಷಟ್ಶಾಸ್ತ್ರಗಳೂ , ಪುರಾಣಗಳು , ಸ್ಮೃತಿಗಳು , ಅರ್ಥ , ನ್ಯಾಯ , ಗಜ , ಅಶ್ವ .... ಇತ್ಯಾದಿ ವಿದ್ಯೆಗಳೂ , ಅನೇಕಾನೇಕ ಸಂಗೀತ ಕಲಾ ಪ್ರಾಕಾರಗಳೂ , ಪ್ರಪಂಚದೆಲ್ಲ ಬಗೆಯ ನೃತ್ಯ ವೈವಿಧ್ಯಗಳೂ , ವಿಙ್ಞಾನದ ವಿಶೇಷ ಆವಿಷ್ಕಾರಗಳ ಮೂಲ ರಹಸ್ಯಗಳೂ , ನೆಲ , ಜಲ , ಗಗನದ ಪಶು , ಪಕ್ಷಿ , ಪ್ರಾಣಿಗಳ ಸಂಕೇತಗಳೂ , ಮನುಷ್ಯ ಭಾಷೆಗಳೂ , ಎಲ್ಲ ಬಗೆಯ , ಎಲ್ಲ ರೀತಿಯ ವಿದ್ಯೆಗಳೂ , ಪಾಂಡಿತ್ಯ , ಪ್ರತಿಭೆ , ಪ್ರಙ್ಞೆ , ವಾಗ್ಮಿತೆ , ಪ್ರಾಸ , ಯತಿ , ಪದ್ಯ - ಗದ್ಯ - ವ್ಯಾಖ್ಯಾನ - ಪ್ರಬಂಧ - ನಾಟಕ - ಕಾವ್ಯ - ಮಹಾಕಾವ್ಯಗಳೂ .... ಒಟ್ಟಿನಲ್ಲಿ ಎಲ್ಲ ವಿಧದ ಅರಿವಿನ , ಙ್ಞಾನದ , ಪ್ರಙ್ಞಾನದ ಪ್ರಾಕಾರಗಳೆಲ್ಲ ಮೂರ್ತಿವೆತ್ತಾಗಿ ಶಾರದೆಯ ಸೇವೆಯಲ್ಲಿ ನಿರತವಾಗಿವೆ . ತೊಡೆಗಳ ಮೇಲೆ ಮಲಗಿರುವ ವೀಣೆ ದಿವ್ಯ ಕಚ್ಛಪಿ . ಅದರಿಂದ ಹೊರಬರುತ್ತಿರುವ ನಾದ ಮಾಧುರ್ಯ ಇಡೀ ಸತ್ಯಲೋಕವನ್ನೇ ತುಂಬಿದೆ .
