ಮಕ್ಕಳಲ್ಲಿ ಕ್ವಾಶಿಯೋರ್ಕೋರ್ ಅಪೌಷ್ಟಿಕತೆ ಸಮಸ್ಯೆ (ಕುಶಲವೇ ಕ್ಷೇಮವೇ)

ಮಕ್ಕಳಲ್ಲಿ ಅಪೌಷ್ಟಿಕತೆಯು ಸಾರ್ವಜನಿಕ ಆರೋಗ್ಯದ ಪ್ರಮುಖ ಸಮಸ್ಯೆಗಳಲ್ಲಿ ಒಂದಾಗಿದೆ. ಈ ಸಮಸ್ಯೆಯು ಪ್ರಪಂಚದಾದ್ಯಂತ ಲಕ್ಷಾಂತರ ಮಕ್ಕಳ ಮೇಲೆ ಪರಿಣಾಮ ಬೀರಿದೆ. ತೀವ್ರ ಅಪೌಷ್ಟಿಕತೆಯು ಹಲವಾರು ಸಮಸ್ಯೆಗಳನ್ನು ಉಂಟುಮಾಡುತ್ತದೆ. ಆ ಸಮಸ್ಯೆಗಳಲ್ಲಿ ಕ್ವಾಶಿಯೋರ್ಕೋರ್ ಕೂಡ ಒಂದಾಗಿದೆ.

"ಕ್ವಾಶಿಯೋರ್ಕೋರ್" ಎಂಬ ಪದ ಘಾನಾದಲ್ಲಿ (ಪಶ್ಚಿಮ ಆಫ್ರಿಕಾದ ಒಂದು ದೇಶ) ಮಾತನಾಡುವ ಭಾಷೆಯಿಂದ ಬಂದಿದೆ. ಇದನ್ನು ಮೊದಲು 1930ರ ದಶಕದಲ್ಲಿ ಬ್ರಿಟಿಷ್-ಘಾನಾದ ವೈದ್ಯೆ ಡಾ. ಸಿಸಿಲಿ ವಿಲಿಯಮ್ಸ್ ಬಳಸಿದರು. ಇದರರ್ಥ “ಎರಡನೇ ಮಗು ಜನಿಸಿದಾಗ ಮೊದಲ ಮಗುವಿಗೆ ಉಂಟಾಗುವ ಅನಾರೋಗ್ಯ". ಆಫ್ರಿಕಾದ ಬಡದೇಶಗಳಲ್ಲಿ ಒಂದಾದ ಮೇಲೆ ಬೇಗನೇ ಎರಡು ಮಕ್ಕಳಾದರೆ ಮೊದಲ ಮಗುವಿಗೆ ಹಾಲು ಬಿಡಿಸಿ ಎರಡನೇ ಮಗುವಿಗೆ ಹಾಲೂಡಿಸಲಾಗುತ್ತದೆ. ಈ ಹಠಾತ್ ಬದಲಾವಣೆಯಿಂದ ಮೊದಲ ಮಗುವಿನಲ್ಲಿ ಪ್ರೋಟಿನ್ ಕೊರತೆ ಉಂಟಾಗಿ ಕ್ವಾಶಿಯೋರ್ಕೋರ್ ರೋಗ ಬರಲು ಕಾರಣವಾಗುತ್ತದೆ.

ಕ್ವಾಶಿಯೋರ್ಕೋರ್ ಸಮಸ್ಯೆಯ ಲಕ್ಷಣಗಳು

ಕ್ವಾಶಿಯೋರ್ಕೋರ್ ಸಾಮಾನ್ಯವಾಗಿ 6 ತಿಂಗಳಿಂದ 5 ವರ್ಷ ವಯಸ್ಸಿನ ಮಕ್ಕಳಲ್ಲಿ ಕಂಡುಬರುತ್ತದೆ. ಮಕ್ಕಳಲ್ಲಿ ಪ್ರೋಟೀನ್ ಮತ್ತು ಸೂಕ್ಷ್ಮ ಪೋಷಕಾಂಶಗಳ ಕೊರತೆಯಿಂದ ಈ ರೋಗದ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ಇದರಿಂದ ಮಕ್ಕಳಲ್ಲಿ ರೋಗನಿರೋಧಕ ಶಕ್ತಿ ಕಡಿಮೆಯಾಗುತ್ತದೆ ಮತ್ತು ಕರುಳಿನಲ್ಲಿ ಸಮಸ್ಯೆಗಳು ಕಂಡುಬರುತ್ತವೆ. ನ್ಯುಮೋನಿಯಾ, ಅತಿಸಾರದಂತಹ ಸೋಂಕುಗಳಿಗೆ ಗುರಿಯಾಗುವಂತೆ ಮಾಡುತ್ತದೆ. ಇವೆಲ್ಲಾ ಅವರ ಸಾಮಾನ್ಯ ಬೆಳವಣಿಗೆಯ ಮೇಲೆ ಪರಿಣಾಮ ಬೀರುತ್ತವೆ.

ಕ್ವಾಶಿಯೋರ್ಕೋರ್‌ನ ಮೂಲ ಕಾರಣ ತೀವ್ರವಾದ ಪ್ರೋಟೀನ್ ಕೊರತೆಯಾಗಿದ್ದರೂ ಅಗತ್ಯ ಜೀವಸತ್ವಗಳು ಮತ್ತು ಖನಿಜಗಳ ಕೊರತೆಯು ಈ ರೋಗಕ್ಕೆ ದಾರಿ ಮಾಡಿಕೊಡುತ್ತದೆ. ಕ್ವಾಶಿಯೋರ್ಕೋರ್ ಇರುವ ಮಕ್ಕಳು ಹೆಚ್ಚಾಗಿ ವಿಟಮಿನ್ ಎ, ಸತು, ಕಬ್ಬಿಣ, ಸೆಲೆನಿಯಮ್ ಮತ್ತು ಫೋಲೇಟ್ ಕೊರತೆಯಿಂದ ಬಳಲುತ್ತಾರೆ. ಈ ಸೂಕ್ಷ್ಮ ಪೋಷಕಾಂಶಗಳು ರೋಗನಿರೋಧಕ ಕಾರ್ಯ, ದೈಹಿಕ ಬೆಳವಣಿಗೆ, ಗಾಯ ಗುಣವಾಗುವುದು ಮತ್ತು ಚರ್ಮ ಆರೋಗ್ಯಕರವಾಗಿ ಬೆಳೆಯಲು ಅತ್ಯಗತ್ಯ. ಇಲ್ಲದಿದ್ದರೆ ವಿಟಮಿನ್ ಎ ಕೊರತೆಯು ಚರ್ಮದ ಗಾಯಗಳನ್ನು ಇನ್ನಷ್ಟು ಹದಗೆಡಿಸಬಹುದು ಮತ್ತು ಸೋಂಕುಗಳ ಅಪಾಯವನ್ನು ಹೆಚ್ಚಿಸಬಹುದು. ಜೀವಕೋಶಗಳ ದುರಸ್ತಿ ಮತ್ತು ರೋಗನಿರೋಧಕ ರಕ್ಷಣೆಗೆ ಸತುವು ನಿರ್ಣಾಯಕವಾಗಿದೆ ಮತ್ತು ಇದರ ಕೊರತೆಯು ಗಾಯದ ಗುಣಪಡಿಸುವಿಕೆಯನ್ನು ದುರ್ಬಲಗೊಳಿಸುತ್ತದೆ ಮತ್ತು ಅತಿಸಾರ ಮತ್ತು ಉಸಿರಾಟದ ಸೋಂಕುಗಳಿಗೆ ಗುರಿಯಾಗುವ ಸಾಧ್ಯತೆಯನ್ನು ಹೆಚ್ಚಿಸುತ್ತದೆ. ಕಬ್ಬಿಣದ ಕೊರತೆಯು ರಕ್ತಹೀನತೆ, ಆಯಾಸ ಮತ್ತು ಕುಂಠಿತ ಬೆಳವಣಿಗೆಗೆ ಕಾರಣವಾಗುತ್ತದೆ.

ಕ್ವಾಶಿಯೋರ್ಕೋರ್ ರೋಗದ ಲಕ್ಷಣಗಳು ಸಾಕಷ್ಟು ವಿಶಿಷ್ಟವಾಗಿವೆ. ಅವುಗಳೆಂದರೆ:

ಊತ (ಎಡಿಮಾ): ಇದು ಅತ್ಯಂತ ಗಮನಾರ್ಹ ಲಕ್ಷಣ. ರಕ್ತದಲ್ಲಿ ಪ್ರೋಟೀನ್ ಕಡಿಮೆಯಾದಾಗ ಉಂಟಾಗುವ ದ್ರವದ ಶೇಖರಣೆಯಿಂದಾಗಿ ಮುಖ, ಕಾಲುಗಳು ಮತ್ತು ಪಾದಗಳು ಊದಿಕೊಳ್ಳುತ್ತವೆ.

ಕೂದಲು ಸಮಸ್ಯೆ: ಕೂದಲು ತೆಳುವಾಗುವುದು, ಒಣಗುವುದು ಮತ್ತು ಬಣ್ಣವನ್ನು ಕಳೆದುಕೊಳ್ಳಬಹುದು ಅಥವಾ ಉದುರಬಹುದು.

ಚರ್ಮದ ಬದಲಾವಣೆಗಳು: ಚರ್ಮವು ಬಿರುಕು ಬಿಡಬಹುದು, ಮತ್ತು ಕಪ್ಪು ಕಲೆಗಳು ಅಥವಾ ಹುಣ್ಣುಗಳು ಬೆಳೆಯಬಹುದು.

ಆಯಾಸ ಮತ್ತು ಕಿರಿಕಿರಿ: ಮಗು ದಣಿದಂತೆ, ನಿದ್ರಾಹೀನತೆ ಮತ್ತು ಸುಲಭವಾಗಿ ಅಸಮಾಧಾನಗೊಂಡAತೆ ಕಾಣಿಸಬಹುದು.

ಕುಂಠಿತ ಬೆಳವಣಿಗೆ: ಮಗುವಿನ ಎತ್ತರ ಮತ್ತು ತೂಕವು ಅವರ ವಯಸ್ಸಿಗೆ ಸಾಮಾನ್ಯಕ್ಕಿಂತ ಕಡಿಮೆಯಿರಬಹುದು.

ಹಿಗ್ಗಿದ ಯಕೃತ್ತು: ಕೊಬ್ಬಿನ ಹೆಚ್ಚು ಶೇಖರಣೆಯಿಂದಾಗಿ ಯಕೃತ್ತು ಊದಿಕೊಳ್ಳುತ್ತದೆ.

ಸ್ನಾಯು ನಷ್ಟ: ತೋಳುಗಳು ಮತ್ತು ಕಾಲುಗಳು ತೆಳ್ಳಗೆ ಮತ್ತು ನಿಷ್ಪ್ರಯೋಜಕವಾಗಿ ಕಾಣಿಸಬಹುದು.

ದುರ್ಬಲಗೊಂಡ ರೋಗನಿರೋಧಕ ವ್ಯವಸ್ಥೆ: ಮಗು ಸೋಂಕುಗಳಿಗೆ ಹೆಚ್ಚು ಒಳಗಾಗುತ್ತದೆ.

ಅತಿಸಾರ: ಮಕ್ಕಳಿಗೆ ಆಗಾಗ ಬೇಧಿ ಮತ್ತು ಅತಿಸಾರ ಸಾಮಾನ್ಯ.

ಹಸಿವು ಕಡಿಮೆಯಾಗುವುದು: ಮಗು ಆಹಾರ ಸೇವಿಸಲು ಆಸಕ್ತಿ ತೋರಿಸದಿರಬಹುದು. ಆಗ ಮಗುವಿಗೆ ಶಕ್ತಿ ಕಡಿಮೆಯಾಗಿ ದುರ್ಬಲತೆ ಉಂಟಾಗುತ್ತದೆ.

ಕ್ವಾಶಿಯೋರ್ಕೋರ್ ಸಮಸ್ಯೆಗೆ ಕಾರಣಗಳು

ಕ್ವಾಶಿಯೋರ್ಕೋರ್ ಸಮಸ್ಯೆ ಮುಖ್ಯವಾಗಿ ಪ್ರೋಟೀನ್ ಕಡಿಮೆ ಇರುವ ಆಹಾರದಿಂದ ಉಂಟಾಗುತ್ತದೆ. ಕಾರ್ಬೋಹೈಡ್ರೇಟುಗಳು ಶಕ್ತಿಯನ್ನು ಒದಗಿಸಿದರೆ, ದೇಹದ ದುರಸ್ತಿ, ಬೆಳವಣಿಗೆ, ರೋಗನಿರೋಧಕ ಶಕ್ತಿ ಮತ್ತು ದ್ರವ ಸಮತೋಲನಕ್ಕೆ ಪ್ರೋಟೀನುಗಳು ಅತ್ಯಗತ್ಯ. ಹಾಗೆಯೇ ಸೂಕ್ಷ್ಮ ಪೋಷಕಾಂಶಗಳ ಕೊರತೆಯು ದೃಷ್ಟಿ ನಷ್ಟ, ರೋಗನಿರೋಧಕತೆ ಕೊರತೆ ಮತ್ತಿತರ ಸಮಸ್ಯೆಗಳಿಗೆ ಕಾರಣವಾಗುತ್ತದೆ. ಇದಲ್ಲದೇ ಬಡತನ ಮತ್ತು ಪೌಷ್ಠಿಕಾಂಶದ ಬಗ್ಗೆ ತಿಳಿವಿನ ಕೊರತೆಯೂ ಈ ರೋಗ ಬರಲು ಸಾಮಾನ್ಯ ಕಾರಣಗಳಾಗಿವೆ.

ಕ್ವಾಶಿಯೋರ್ಕೋರ್ ಸಮಸ್ಯೆಗೆ ಚಿಕಿತ್ಸೆ

ಕ್ವಾಶಿಯೋರ್ಕೋರ್ ಸಮಸ್ಯೆಯನ್ನು ಆರಂಭದಲ್ಲಿಯೇ ಪತ್ತೆ ಹಚ್ಚಿದರೆ ಚಿಕಿತ್ಸೆ ನೀಡಬಹುದು. ಮೊದಲಿಗೆ ಮಕ್ಕಳನ್ನು ಆರೋಗ್ಯವನ್ನು ಸ್ಥಿರಗೊಳಿಸಲು ಶಕ್ತಿಯುತ ಆದರೆ ಪ್ರೋಟೀನ್ ಕಡಿಮೆ ಇರುವ ಆಹಾರವನ್ನು ನೀಡಬೇಕು. ನಂತರ ನಿಧಾನವಾಗಿ ಹೆಚ್ಚು ಪ್ರೋಟೀನ್, ಕೊಬ್ಬು ಮತ್ತು ಸೂಕ್ಷ್ಮ ಪೋಷಕಾಂಶಗಳಿAದ ಸಮೃದ್ಧವಾಗಿರುವ ಆಹಾರಗಳನ್ನು ನೀಡಬೇಕು. ನಿರ್ಜಲೀಕರಣವನ್ನು ನಿಭಾಯಿಸಲು ಮತ್ತು ಸಮತೋಲನವನ್ನು ಪುನಃಸ್ಥಾಪಿಸಲು ಸೂಕ್ತ ದ್ರವ ಮತ್ತು ಎಲೆಕ್ಟ್ರೋಲೈಟುಗಳನ್ನು ಕೊಡಬೇಕು. ಇದರಿಂದ ರೋಗನಿರೋಧಕ ಶಕ್ತಿ ಕ್ರಮೇಣ ಬಲಗೊಳ್ಳುತ್ತದೆ. ಸೋಂಕುಗಳ ವಿರುದ್ಧ ಹೋರಾಡುವ ಶಕ್ತಿ ದೊರಕುತ್ತದೆ. ವಿಟಮಿನ್ ಮತ್ತು ಖನಿಜ ಪೂರಕಗಳನ್ನು ವಿಶೇಷವಾಗಿ ವಿಟಮಿನ್ ಎ, ಸತು ಮತ್ತು ಕಬ್ಬಿಣ ಕೊಡಲಾಗುತ್ತದೆ. ತೀವ್ರತೆಯ ಆಧಾರದ ಮೇರೆಗೆ ಈ ಸಮಸ್ಯೆಯಿಂದ ಚೇತರಿಸಿಕೊಳ್ಳಲು ಮಕ್ಕಳಿಗೆ ಕೆಲವು ವಾರಗಳಿಂದ ಅಥವಾ ತಿಂಗಳುಗಳು ಬೇಕಾಗಬಹುದು.

ಕ್ವಾಶಿಯೋರ್ಕೋರ್ ಸಮಸ್ಯೆ ತಡೆಯುವುದು ಹೇಗೆ?

ಈ ರೋಗವನ್ನು ಮುಖ್ಯವಾಗಿ ಸರಿಯಾದ ಪೋಷಣೆ ಮತ್ತು ಜಾಗೃತಿಯ ಮೂಲಕ ತಡೆಗಟ್ಟಬಹುದು. ಮಕ್ಕಳಿಗೆ ಮೊದಲ 6 ತಿಂಗಳವರೆಗೆ ಕೇವಲ ಹಾಲುಣಿಸಬೇಕು ಮತ್ತು ನಂತ ಪೂರಕ ಆಹಾರದೊಂದಿಗೆ 2 ವರ್ಷಗಳವರೆಗೆ ಹಾಲುಣಿಸಬೇಕು. ಕಾರ್ಬೋಹೈಡ್ರೇಟುಗಳ ಜೊತೆಗೆ ದ್ವಿದಳ ಧಾನ್ಯಗಳು, ಮೊಟ್ಟೆ, ಡೈರಿ ಪದಾರ್ಥಗಳು, ಮೀನು ಅಥವಾ ಮಾಂಸ ಹೀಗೆ ಸಾಕಷ್ಟು ಪ್ರೋಟೀನ್ ಇರುವ ಆಹಾರ ಕೊಡಬೇಕು. ಹಳ್ಳಿಗಳಲ್ಲಿದ್ದರೆ ಮಧ್ಯಾಹ್ನದ ಊಟ ಕಾರ್ಯಕ್ರಮಗಳು, ಅಂಗನವಾಡಿ ಸೇವೆಗಳು ಮತ್ತು ಸಮಗ್ರ ಮಕ್ಕಳ ಅಭಿವೃದ್ಧಿ ಸೇವೆಗಳು ಅಪೌಷ್ಟಿಕತೆಯನ್ನು ನಿಭಾಯಿಸಲು ಸಹಾಯ ಮಾಡುತ್ತವೆ. ಮಕ್ಕಳನ್ನು ನಿಯಮಿತವಾಗಿ ಆರೋಗ್ಯ ತಪಾಸಣೆಗೆ ಒಳಪಡಿಸಬೇಕು.

ಒಟ್ಟಾರೆಯಾಗಿ ಹೇಳುವುದಾದರೆ ಕ್ವಾಶಿಯೋರ್ಕೋರ್ ಒಂದು ಅಪಾಯಕಾರಿ ಆದರೆ ತಡೆಗಟ್ಟಬಹುದಾದ ಅಪೌಷ್ಟಿಕತೆಯ ಸಮಸ್ಯೆಯಾಗಿದೆ. ಮಕ್ಕಳಿಗೆ ಸಾಕಷ್ಟು ಪ್ರೋಟೀನ್, ಸೂಕ್ಷ್ಮ ಪೋಷಕಾಂಶಭರಿತ ಆಹಾರ ಮತ್ತು ಸೂಕ್ತ ಆರೈಕೆ ಸಿಗುವುದನ್ನು ಖಚಿತಪಡಿಸಿಕೊಳ್ಳುವ ಮೂಲಕ ಈ ರೋಗವನ್ನು ತಡೆಗಟ್ಟಿ ಅವರ ಆರೋಗ್ಯಕರ ಬೆಳವಣಿಗೆಯನ್ನು ಉತ್ತೇಜಿಸಬಹುದು.