ಅಮೆರಿಕ ಸುಂಕಕ್ಕೆ ಭಾರತದ ಹೊಸ ಚೌಕಾಸಿ ಅಸ್ತ್ರ: ಕಾದು ನೋಡಲು ನೆರವಾಗಿದೆ ಭಾರತದ ಪ್ರಬಲ ಆರ್ಥಿಕತೆ

ಭಾರತೀಯ ಉತ್ಪನ್ನಗಳ ಮೇಲೆ ಅಮೆರಿಕ ಬರೋಬ್ಬರಿ 50% ಸುಂಕ ವಿಧಿಸಿದಾಗ, ಭಾರತ ತಕ್ಷಣವೇ ಗಾಬರಿಗೊಳಗಾಗಿ, ಅಮೆರಿಕ ನೀಡುವ ಯಾವುದೇ ಒಪ್ಪಂದಕ್ಕಾದರೂ ಸಹಿ ಹಾಕಬಹುದು ಎಂದು ಅನೇಕರು ಭಾವಿಸಿದ್ದರು. ಆದರೆ, ಅಂದುಕೊಂಡದ್ದಕ್ಕಿಂತ ಭಿನ್ನವಾದ ಬೆಳವಣಿಗೆ ನಡೆಯುತ್ತಿದ್ದು, ಭಾರತ ಸಮಾಧಾನದಿಂದ 'ನಾವು ಕಾಯಬಲ್ಲೆವು' ಎಂದಿದೆ. ಭಾರತದ ಈ ನಡೆಯ ಹಿಂದೆ ಆಸಕ್ತಿಕರ ಕಾರಣವೂ ಇದೆ.

ಅಂಕಿ-ಅಂಶಗಳು ನಮಗೆ ಒಂದು ಕುತೂಹಲಕಾರಿ ಕಥೆಯನ್ನು ಹೇಳುತ್ತವೆ. ಅಕ್ಟೋಬರ್ ತಿಂಗಳಲ್ಲಿ ಅಮೆರಿಕಗೆ ಭಾರತದ ರಫ್ತು 8.6% ಇಳಿಕೆ ಕಂಡು, 55,440 ಕೋಟಿ ರೂಪಾಯಿ ತಲುಪಿತ್ತು. ಆದರೆ, ಸೆಪ್ಟೆಂಬರ್ ತಿಂಗಳ 12% ಇಳಿಕೆಗೆ ಹೋಲಿಸಿದರೆ ಇದು ಕಡಿಮೆಯಾಗಿತ್ತು. ಇದೇ ವೇಳೆ, ಜಪಾನ್ ಮತ್ತು ದಕ್ಷಿಣ ಕೊರಿಯಾದಂತಹ ದೇಶಗಳು ವಾಷಿಂಗ್ಟನ್ ಜೊತೆ ಒಪ್ಪಂದ ಮಾಡಿಕೊಳ್ಳಲು ಧಾವಿಸಿದ್ದವು. ಆದರೆ, ಭಾರತ ತನಗೆ ಬೇಕಾದ ಸಮಯ ತೆಗೆದುಕೊಳ್ಳುತ್ತಿದೆ. "ಸದ್ಯದ ಮಟ್ಟಿಗೆ ಅಮೆರಿಕದ 50% ಸುಂಕದ ಅತ್ಯಂತ ಕೆಟ್ಟ ಪರಿಣಾಮವನ್ನು ನಾವು ತಪ್ಪಿಸಿದ್ದೇವೆ. ಒಂದು ವೇಳೆ ಅವಶ್ಯಕತೆ ಎದುರಾದರೆ, ನಾವು ಇನ್ನಷ್ಟು ಕಾಯಲು ಸಿದ್ಧರಿದ್ದೇವೆ" ಎಂದು ಓರ್ವ ಭಾರತೀಯ ಹಿರಿಯ ಅಧಿಕಾರಿ ಹೇಳಿದ್ದಾರೆ.

ಸುಂಕ ವಿವಾದ ಕೊನೆಗೊಂಡಿದೆಯೇ?

ಭಾರತ ಮತ್ತು ಅಮೆರಿಕ ಎರಡೂ ಈಗ ಒಂದು ಮಧ್ಯಮ ಮಾರ್ಗದತ್ತ ಚಲಿಸುತ್ತಿವೆ ಎಂದು ಇತ್ತೀಚಿನ ಬೆಳವಣಿಗೆಗಳು ಸೂಚಿಸುತ್ತಿವೆ. ಮುಂದಿನ ಘೋಷಣೆ ಸದ್ಯದಲ್ಲೇ ಬರಬಹುದು ಎಂದು ಅಮೆರಿಕ ಸುಳಿವು ನೀಡಿದ್ದು, ಭಾರತವೂ ತನ್ನದೇ ನಿಲುವಿನಲ್ಲಿ ಒಂದಷ್ಟು ರಾಜಿ ಮಾಡಿಕೊಳ್ಳಲು ಇಚ್ಛೆ ಪ್ರದರ್ಶಿಸಿದೆ. ಅಮೆರಿಕ ಮೊದಲು ರಷ್ಯ‌ನ್ ತೈಲ ಖರೀದಿಗೆ ಸಂಬಂಧಿಸಿದಂತೆ ಭಾರತದ ಮೇಲಿರುವ ಹೆಚ್ಚುವರಿ 25% ಸುಂಕವನ್ನು ತೆಗೆಯುವ ಸಾಧ್ಯತೆಗಳಿದ್ದು, ಬಳಿಕ ಒಟ್ಟಾರೆ ಸುಂಕವನ್ನು ಕ್ರಮೇಣ 15% ಆಸುಪಾಸಿಗೆ ತರಬಹುದು ಎಂದು ಭಾರತೀಯ ಮಧ್ಯಸ್ಥಿಕೆದಾರರು ಅಭಿಪ್ರಾಯ ಪಟ್ಟಿದ್ದಾರೆ. ಇದಕ್ಕೆ ಪ್ರತಿಯಾಗಿ, ಭಾರತ 80%ಕ್ಕೂ ಹೆಚ್ಚು ಅಮೆರಿಕನ್ ಉತ್ಪನ್ನಗಳ ಮೇಲಿನ ಸುಂಕವನ್ನು ಕಡಿಮೆಗೊಳಿಸಲು ಸಿದ್ಧವಾಗಿದ್ದು, ಇದೇ ವೇಳೆ ಕೃಷಿಯಂತಹ ಪ್ರಮುಖ ವಲಯಗಳನ್ನು ರಕ್ಷಿಸಿಕೊಳ್ಳಲಿದೆ.

ಆದರೆ ಭಾರತ ಯಾಕೆ ಇಷ್ಟು ಆತ್ಮವಿಶ್ವಾಸ ಹೊಂದಿದೆ? ಭಾರತದ ಆರ್ಥಿಕತೆ ಹೇಗೆ ಸುಭದ್ರವಾಗಿದೆ ಎನ್ನುವದರಲ್ಲಿ ಇದಕ್ಕೆ ಉತ್ತರವಿದೆ. ಜುಲೈ - ಸೆಪ್ಟೆಂಬರ್ ತ್ರೈಮಾಸಿಕ ಅವಧಿಯಲ್ಲಿ ಭಾರತದ ಜಿಡಿಪಿ 7% ದರದಲ್ಲಿ ಬೆಳವಣಿಗೆ ಕಂಡಿದ್ದು, ಪ್ರಸ್ತುತ ಆರ್ಥಿಕ ವರ್ಷದಲ್ಲಿ ಭಾರತ 6.8% ಪ್ರಗತಿ ಸಾಧಿಸಬಹುದು ಎನ್ನುವುದು ರಿಸರ್ವ್ ಬ್ಯಾಂಕಿನ ನಿರೀಕ್ಷೆಯಾಗಿದೆ. ಈ ಪ್ರಬಲ ದೇಶೀಯ ಆರ್ಥಿಕತೆ ಸಂಧಾನಕಾರರಿಗೆ ಕೈಗೆ ಸಿಕ್ಕ ಒಪ್ಪಂದಕ್ಕೆ ಸಹಿ ಹಾಕುವ ಬದಲು, ಉತ್ತಮ ಒಪ್ಪಂದಕ್ಕೆ ಬರುವಂತೆ ಮಾಡಲು ಕಾಲಾವಕಾಶ ಕಲ್ಪಿಸಿದೆ.

ಭಾರತೀಯ ರಫ್ತುದಾರರೂ ಈಗ ಮೌನವಾಗಿ ಕುಳಿತಿಲ್ಲ. ಅವರು ಬುದ್ಧಿವಂತಿಕೆಯಿಂದ ಆಲೋಚಿಸುತ್ತಿದ್ದು, ತಮ್ಮ ಗಮನವನ್ನು ಆಫ್ರಿಕಾ ಮತ್ತು ಯುರೋಪಿಯನ್ ಮಾರುಕಟ್ಟೆಗಳತ್ತ ಹರಿಸುತ್ತಿದ್ದಾರೆ. ಇದಕ್ಕೆ ಪೂರಕವಾಗಿ, ಭಾರತ ಇತ್ತೀಚೆಗೆ ಯುಕೆ, ಯುಎಇ, ಮತ್ತು ಆಸ್ಟ್ರೇಲಿಯಾಗಳೊಡನೆ ವ್ಯಾಪಾರ ಒಪ್ಪಂದಗಳನ್ನು ಮಾಡಿಕೊಂಡಿದೆ. ಬಹಳಷ್ಟು ಕಂಪನಿಗಳು ತಮ್ಮ ಅಮೆರಿಕನ್ ಗ್ರಾಹಕರನ್ನು ಉಳಿಸಿಕೊಳ್ಳುವ ಸಲುವಾಗಿ, 20% ತನಕ ಹೆಚ್ಚುವರಿ ವೆಚ್ಚವನ್ನು ಭರಿಸಿಕೊಳ್ಳುತ್ತಿದ್ದು, ಗ್ರಾಹಕರಿಗೆ ರಿಯಾಯಿತಿ ಮತ್ತು ಹೆಚ್ಚಿನ ಪೂರೈಕೆ ಅವಧಿಯನ್ನು ನೀಡುತ್ತಿದ್ದಾರೆ. ಫೆಡರೇಶನ್ ಆಫ್ ಇಂಡಿಯನ್ ಎಕ್ಸ್‌ಪೋರ್ಟ್ ಆರ್ಗನೈಸೇಶನ್ಸ್ ಸಂಸ್ಥೆಯ ಅಜಯ್ ಸಹಾಯ್ ಅವರು "ನಾವು ಪರಿಸ್ಥಿತಿಯನ್ನು ಸದ್ಯಕ್ಕೆ ನಿಭಾಯಿಸುತ್ತಿದ್ದೇವೆ" ಎಂದಿದ್ದು, ಗ್ರಾಹಕರೊಂದಿಗೆ ಸಂಬಂಧ ಉಳಿಸಿಕೊಳ್ಳುವ ಸಲುವಾಗಿ ವಸ್ತ್ರ ಮತ್ತು ಪಾದರಕ್ಷೆ ಕಂಪನಿಗಳು ಹೊಡೆತ ತಿನ್ನುತ್ತಿವೆ ಎಂದಿದ್ದಾರೆ.

ಸರ್ಕಾರವೂ ಸಹ ನಾಟಕೀಯ ಕಾರ್ಯತಂತ್ರವನ್ನು ಅನುಸರಿಸುವ ಬದಲು, ಪ್ರಾಯೋಗಿಕವಾದ ಹೆಜ್ಜೆಯನ್ನು ಇಟ್ಟಿದೆ. ಬೃಹತ್ ಪ್ರೋತ್ಸಾಹಕ ಪ್ಯಾಕೇಜ್‌ಗಳನ್ನು ಘೋಷಿಸುವ ಬದಲು, ನವದೆಹಲಿ ಕೆಲವು ನಿರ್ದಿಷ್ಟ ಕ್ರಮಗಳನ್ನು ಅನುಸರಿಸಿದೆ. ಸೆಪ್ಟೆಂಬರ್ ನಂತರ ನೂರಾರು ಗ್ರಾಹಕ ಉತ್ಪನ್ನಗಳ ಮೇಲಿನ ತೆರಿಗೆ ಕಡಿತಗೊಳಿಸಿದ್ದು, ಇದರಿಂದ ಸ್ಥಳೀಯವಾಗಿ ಬೇಡಿಕೆ ಹೆಚ್ಚಾಗಿ, ರಫ್ತುದಾರರಿಗೆ ಸ್ಪರ್ಧಾತ್ಮಕತೆ ಕಾಯ್ದುಕೊಳ್ಳಲು ಅನುಕೂಲ ಕಲ್ಪಿಸಿದೆ. ಮಾನವ ನಿರ್ಮಿತ ಫೈಬರ್‌ಗಳಂತಹ ಉತ್ಪನ್ನಗಳ ಮೇಲೆ ತೆರಿಗೆ ಕಡಿತಗೊಳಿಸಿದ್ದು, ಇದು ವಿಶೇಷವಾಗಿ ತಿರುಪ್ಪೂರಿನಂತಹ ಪ್ರದೇಶಗಳ ವಸ್ತ್ರ ರಫ್ತುದಾರರಿಗೆ ನೆರವಾಗಿದೆ. ಅವರು ಈಗ ಖರೀದಿ ಆದೇಶದ ಗಾತ್ರದ ಅನುಸಾರವಾಗಿ, 10-20% ರಿಯಾಯಿತಿ ನೀಡಲು ಸಾಧ್ಯವಾಗುತ್ತಿದೆ.

ಇದರೊಡನೆ, ರಫ್ತು ಉತ್ತೇಜನ ನೀಡುವ ಸಲುವಾಗಿ 44,880 ಕೋಟಿ ರೂಪಾಯಿಗಳ ಬೆಂಬಲ ಪ್ಯಾಕೇಜ್ ಸಹ ಘೋಷಿಸಲಾಗಿದ್ದು, ಬಾಧಿತ ಉದ್ಯಮಗಳಿಗೆ ಸಣ್ಣ ಸಾಲ ಮರುಪಾವತಿಗೆ ಹೆಚ್ಚಿನ ಅವಧಿ ನೀಡಲಾಗಿದೆ. ಕೇಂದ್ರೀಯ ಬ್ಯಾಂಕ್ ಮತ್ತು ಸರ್ಕಾರ ಅವಶ್ಯಕತೆ ಇದ್ದಲ್ಲಿ ಮಾತ್ರ ನೆರವು ನೀಡುವ ಹೆಜ್ಜೆಯನ್ನು ಅನುಸರಿಸಿವೆ.

ಹಾಗೆಂದು ಎಲ್ಲವೂ ಸುಗಮವಾಗಿಯೇ ಸಾಗುತ್ತಿದೆ ಎಂದರ್ಥವಲ್ಲ. ಇವೆಲ್ಲದರ ನಡುವೆ ಭಾರತಕ್ಕೊಂದು ಅನಿರೀಕ್ಷಿತ ಸವಾಲು ಎದುರಾಗಿದೆ. ಅದೇ ಚೀನಾ. ಚೀನೀ ಕಾರ್ಖಾನೆಗಳಲ್ಲಿ ಅತಿಯಾದ ಉತ್ಪಾದನಾ ಸಾಮರ್ಥ್ಯವಿದ್ದು, ಜಗತ್ತಿನಾದ್ಯಂತ ಎಲ್ಲ ಮಾರುಕಟ್ಟೆಗಳಲ್ಲೂ ಚೀನೀ ಉತ್ಪನ್ನಗಳ ಪ್ರವಾಹವೇ ಹರಿಯುತ್ತಿದೆ. ಇವು ಭಾರತೀಯ ರಫ್ತುದಾರರಿಗೆ ಗಂಭೀರ ಸ್ಪರ್ಧೆ ಒಡ್ಡುತ್ತಿವೆ. "ಚೀನೀ ಉದ್ಯಮಗಳು ಆಳವಾಗಿ ಬೇರೂರಿ, ಬಲಿಷ್ಠವಾಗಿವೆ. ಚೀನಾದ ಆಂತರಿಕ ಪರಿಸ್ಥಿತಿಯೂ ಅವುಗಳನ್ನು ಅತ್ಯಂತ ಸ್ಪರ್ಧಾತ್ಮಕವಾಗಿಸಿವೆ" ಎಂದು ಮುಂಬೈ ಮೂಲದ ಆಪ್ಟೈಮ್ ಸಂಸ್ಥೆಯ ಸಿಇಒ ರಾಹುಲ್ ಟಿಕೂ ಹೇಳಿದ್ದಾರೆ.

ಇಲ್ಲಿ ಇನ್ನೊಂದು ಆಶ್ಚರ್ಯಕರ ವಿಚಾರವಿದೆ. ಅಮೆರಿಕಾಗೆ ನಡೆಸುವ ರಫ್ತಿಗೆ ಹೋಲಿಸಿದರೆ, ಅಮೆರಿಕೇತರ ಮಾರುಕಟ್ಟೆಗಳಿಗೆ ಭಾರತದ ರಫ್ತು ಹೆಚ್ಚಿನ ಕುಸಿತ (ಅಕ್ಟೋಬರ್ ತಿಂಗಳಲ್ಲಿ 12.5%) ಕಂಡಿದೆ. ಇದಕ್ಕೆ ದುರ್ಬಲವಾದ ಇಂಜಿನಿಯರಿಂಗ್, ಪೆಟ್ರೋಲಿಯಂ ಮತ್ತು ಆಭರಣ ಸಾಗಾಣಿಕೆಗಳು ಕಾರಣವಾಗಿವೆ. ಎಚ್ಎಸ್‌ಬಿಸಿಯ ಭಾರತದ ಮುಖ್ಯ ಅರ್ಥಶಾಸ್ತ್ರಜ್ಞ ಪ್ರಾಂಜುಲ್ ಭಂಡಾರಿ ಅವರು ಇದು ಅಮೆರಿಕೇತರ ಮಾರುಕಟ್ಟೆಗಳಲ್ಲಿ ಹೆಚ್ಚಾಗಿರುವ ಸ್ಪರ್ಧೆಗೆ ಸಾಕ್ಷಿಯಾಗಿದೆ ಎಂದಿದ್ದು, ಅಮೆರಿಕದ ಸುಂಕ ಘೋಷಣೆಯ ಬಳಿಕ ಬಹಳಷ್ಟು ದೇಶಗಳು ತಮ್ಮ ರಫ್ತನ್ನು ವಿವಿಧ ಕಡೆಗಳಿಗೆ ಹೆಚ್ಚಿಸುತ್ತಿವೆ.

ಭಾರತದ ಆರ್ಥಿಕತೆ ಈಗ ಸುಭದ್ರವಾಗಿದ್ದು, ಆಘಾತವನ್ನು ತಾಳಿಕೊಳ್ಳಲು ಸಮರ್ಥವಾಗಿರುವ ಕಾರಣದಿಂದ ಭಾರತದ 'ಗಡಿಬಿಡಿ ಇಲ್ಲದ' ಕಾರ್ಯತಂತ್ರ ಸರಿಯಾಗಿ ಕಾರ್ಯಾಚರಿಸುತ್ತಿದೆ. ಇದೇ ವೇಳೆ ವಸ್ತ್ರೋದ್ಯಮಿಗಳಿಗೆ ಅಮೆರಿಕದಿಂದ ಖರೀದಿ ಆದೇಶಗಳು ಕಡಿಮೆಯಾಗಿದ್ದರೂ, ಒಟ್ಟಾರೆ ಪರಿಣಾಮವನ್ನು ನಿರ್ವಹಿಸಲು ಸಾಧ್ಯವಾಗುತ್ತಿದೆ. ಸರ್ಕಾರದ ಬಹು ಆಯಾಮದ ಕಾರ್ಯತಂತ್ರದಡಿ ಹೊಸ ವ್ಯಾಪಾರ ಒಪ್ಪಂದಗಳು, ತೆರಿಗೆ ಕಡಿತಗಳು, ನಿರ್ದಿಷ್ಟ ವಿನಾಯಿತಿಗಳು ಮತ್ತು ರಫ್ತು ಉತ್ತೇಜಕಗಳು ಸೇರಿದ್ದು, ಉದ್ಯಮಗಳಿಗೆ ಪರಿಸ್ಥಿತಿಗೆ ಹೊಂದಿಕೊಂಡು, ಸುಧಾರಿಸಿಕೊಳ್ಳಲು ಅವಕಾಶ ಕಲ್ಪಿಸಿದೆ.

ಈಗ ಭಾರತ ಮತ್ತು ಅಮೆರಿಕಗಳೆರಡೂ ರಾಜಿ ಮಾಡಿಕೊಳ್ಳುವ ಸುಳಿವು ನೀಡಿದ್ದು, ಇಬ್ಬರಲ್ಲಿ ಯಾರು ಮೊದಲಿಗೆ ಕೈ ಚಾಚುತ್ತಾರೆ ಎನ್ನುವುದನ್ನು ಕಾದು ನೋಡಬೇಕಿದೆ. ಸದ್ಯದ ಮಟ್ಟಿಗೆ, ಭಾರತ ಕಾದು ನೋಡುವ ಆಟದಲ್ಲಿ ಆರಾಮವಾಗಿರುವಂತೆ ಕಾಣುತ್ತಿದ್ದು, ಮನೆಯಲ್ಲಿನ ಆರ್ಥಿಕ ಶಕ್ತಿ ಹೊರಗಡೆ ಚೌಕಾಸಿ ನಡೆಸಲು ನೆರವಾಗುತ್ತದೆ ಎಂದು ಸಾಬೀತುಪಡಿಸಿದೆ.

ಗಿರೀಶ್ ಲಿಂಗಣ್ಣ ಅವರು ವಿಜ್ಞಾನ ಬರಹಗಾರ, ರಕ್ಷಣೆ, ಏರೋಸ್ಪೇಸ್, ಮತ್ತು ರಾಜಕೀಯ ವಿಶ್ಲೇಷಕರಾಗಿದ್ದು, ಬೆಂಗಳೂರಿನಲ್ಲಿ ನೆಲೆಸಿದ್ದಾರೆ. ಅವರು ಜರ್ಮನಿಯ ಎಡಿಡಿ ಇಂಜಿನಿಯರಿಂಗ್ ಜಿಎಂಬಿಎಚ್ ಸಂಸ್ಥೆಯ ಅಂಗಸಂಸ್ಥೆಯಾದ ಎಡಿಡಿ ಇಂಜಿನಿಯರಿಂಗ್ ಕಾಂಪೊನೆಂಟ್ಸ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯ ನಿರ್ದೇಶಕರಾಗಿದ್ದಾರೆ.

ಇಮೇಲ್: girishlinganna@gmail.com