ಮೆಕ್ಕಲಮ್ ಆರೋಪದಲ್ಲಿ ಹುರುಳಿಲ್ಲ; ನನ್ನ ಕರ್ತವ್ಯ ನಿಭಾಯಿಸಿದ್ದೇನೆ: ರವಿ ಸಾವನಿ

ನವದೆಹಲಿ: 2008ರ ಐಪಿಎಲ್ ಸ್ಪಾಟ್ ಫಿಕ್ಸಿಂಗ್ ಪ್ರಕರಣ ಸಂಬಂಧ ನ್ಯೂಜಿಲೆಂಡ್ ತಂಡದ ಮಾಜಿ ಆಟಗಾರ ಬ್ರೆಂಡನ್ ಮೆಕ್ಕಲಂ ಸಿಡಿಸಿದ್ದ ಫಿಕ್ಸಿಂಗ್ ಆರೋಪದಲ್ಲಿ ಹುರುಳಿಲ್ಲ ಎಂದು  ಐಸಿಸಿಯ ಭ್ರಷ್ಟಾಚಾರ ನಿಗ್ರಹದಳದ ಮಾಜಿ ಮುಖ್ಯಸ್ಥ ರವಿ ಸಾವನಿ ಹೇಳಿದ್ದಾರೆ.

ಐಪಿಎಲ್ ಸ್ಪಾಟ್ ಫಿಕ್ಸಿಂಗ್ ಪ್ರಕರಣ ಸಂಬಂಧ ಮೆಕ್ಕಲಂ ಆರೋಪಿಸಿರುವಂತೆ ಏನೂ ಇಲ್ಲ. ಕ್ರಿಸ್ ಕೇರ್ನ್ಸ್ ರನ್ನು ಬುಕ್ಕಿಯೊಬ್ಬ ಸಂಪರ್ಕಿಸಿದ ಕುರಿತು ಮೆಕ್ಕಲಂ ಮಾಹಿತಿ ನೀಡುತ್ತಿದ್ದಂತೆಯೇ  ತಾವು ಅದನ್ನು ಐಸಿಸಿ ಗಮನಕ್ಕೆ ತಂದಿದ್ದೇನೆ. ಇದರಲ್ಲಿ ಯಾವುದೇ ವಿಳಂಬ ಮಾಡಿಲ್ಲ. ನನ್ನ ಕರ್ತವ್ಯವನ್ನು ನಾನು ಚಾಚೂ ತಪ್ಪದೇ ಮಾಡಿದ್ದೇನೆ ಎಂದು ರವಿ ಸಾವನಿ ಹೇಳಿದ್ದಾರೆ.

ಇತ್ತೀಚೆಗೆ ಲಂಡನ್ ನಲ್ಲಿ ನಡೆದ ‘ಎಂಸಿಸಿ ಸ್ಪಿರಿಟ್‌ ಆಫ್‌ ಕ್ರಿಕೆಟ್‌’ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ್ದ ನ್ಯೂಜಿಲೆಂಡ್ ತಂಡದ ಮಾಜಿ ಆಟಗಾರ ಮೆಕ್ಕಲಂ "2008ರ ಚೊಚ್ಚಲ  ಐಪಿಎಲ್‌ ಟೂರ್ನಿಯ ವೇಳೆ ಮತ್ತು ನಮ್ಮ ತಂಡ ಇಂಗ್ಲೆಂಡ್‌ ಪ್ರವಾಸ ಕೈಗೊಂಡಾಗ ನಮ್ಮದೇ ತಂಡದ ಆಟಗಾರ ಕ್ರಿಸ್‌  ಕೇರ್ನ್ಸ್‌ ಮ್ಯಾಚ್‌ ಫಿಕ್ಸಿಂಗ್‌ನಲ್ಲಿ ಭಾಗಿಯಾಗುವಂತೆ ಸಂಪರ್ಕಿಸಿದ್ದರು.  ಈ ವಿಷಯವನ್ನು ಐಸಿಸಿಯ ಭ್ರಷ್ಟಾಚಾರ ನಿಗ್ರಹ ತಡೆ ಘಟಕಕ್ಕೆ ತಿಳಿಸಿದರೂ ಏನೂ ಪ್ರಯೋಜನವಾಗಲಿಲ್ಲ. ಗಂಭೀರ ವಿಚಾರವನ್ನು ವಿಶ್ವ ಕ್ರಿಕೆಟ್ ಮಂಡಳಿ ಲಘುವಾಗಿ ಪರಿಗಣಿಸಿತು" ಎಂದು  ಆರೋಪಿಸಿದ್ದರು.