3ನೇ ಟಿ20 ಪಂದ್ಯ: ಮಳೆಯಾಟದ ನಡುವೆಯೂ ಗೆದ್ದ ಭಾರತಕ್ಕೆ ಸರಣಿ ಜಯ!

ತಿರುವನಂತಪುರಂ: ಪ್ರವಾಸಿ ನ್ಯೂಜಿಲೆಂಡ್ ವಿರುದ್ಧದ ಅಂತಿಮ ಹಾಗೂ ನಿರ್ಣಾಯಕ ಪಂದ್ಯದಲ್ಲಿ ಮಳೆಯಾಟದ ಹೊರತಾಗಿಯೂ ಭಾರತ ತಂಡ 6 ರನ್ ಗಳ ರೋಚಕ ಜಯ ದಾಖಲಿಸಿ 2-1 ಅಂತರದಲ್ಲಿ ಟಿ20 ಸರಣಿಯನ್ನು ತನ್ನದಾಗಿಸಿಕೊಂಡಿದೆ.

ಕೇರಳದ ತಿರುವನಂತಪುರಂನ ಗ್ರೀನ್ ಫೀಲ್ಡ್ ಇಂಟರ್ ನ್ಯಾಷನಲ್ ಮೈದಾನದಲ್ಲಿ ಇಂದು ನಡೆದ ಅಂತಿಮ ಪಂದ್ಯದಲ್ಲಿ ಟಾಸ್ ಗೆದ್ದ ನ್ಯೂಜಿಲೆಂಡ್ ತಂಡ ಬೌಲಿಂಗ್ ಆರಿಸಿಕೊಂಡಿತು. ಸತತ ಮಳೆ ಸುರಿದ ಪರಿಣಾಮ ಪಂದ್ಯವನ್ನು ತಲಾ 8 ಓವರ್ ಗಳಿಗೆ ಸೀಮಿತಗೊಳಿಸಲಾಗಿತ್ತು.  ಮೊದಲು ಬ್ಯಾಟಿಂಗ್ ಮಾಡಿದ್ದ ಭಾರತ ತಂಡ 8 ಓವರ್ ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 67 ರನ್ ಕಲೆಹಾಕಿತು. ಭಾರತದ ಪರ ವಿರಾಟ್​ ಕೊಹ್ಲಿ (13) ರನ್​ ಗಳಿಸಿದರೆ ಮನೀಷ್​ ಪಾಂಡೆ (17), ಹಾರ್ದಿಕ್​ ಪಾಂಡ್ಯ (14*) ರನ್​ ಗಳಿಸಿದರು. ನ್ಯೂಜಿಲೆಂಡ್​ ಪರ ಟಿಮ್​ ಸೌಥಿ (13 ಕ್ಕೆ 3), ಇಶ್​  ಸೋಧಿ (23 ಕ್ಕೆ 2) ಮತ್ತು ಟ್ರೆಂಟ್​ ಬೋಲ್ಟ್​ (13 ಕ್ಕೆ 1) ವಿಕೆಟ್​ ಪಡೆದರು. 

68 ರನ್ ಗಳ ಗುರಿಯನ್ನು ಬೆನ್ನತ್ತಿದ ನ್ಯೂಜಿಲೆಂಡ್​ ತಂಡ ನಿಗದಿತ 8 ಓವರ್​ಗಳಲ್ಲಿ 6 ವಿಕೆಟ್​ ಕಳೆದುಕೊಂಡು 61 ರನ್ ಗಳನ್ನು ಮಾತ್ರ ಗಳಿಸಲು ಶಕ್ತವಾಯಿತು. ಆ ಮೂಲಕ ಭಾರತದ ಎದುರು 6 ರನ್ ಗಳ ವಿರೋಚಿತ ಸೋಲು ಅನುಭವಿಸಿತು. ನ್ಯೂಜಿಲೆಂಡ್​ ಪರ ಕೇನ್​ ವಿಲಿಯಮ್ಸ್​  (8 ರನ್), ಕೋಲಿನ್​ ಮುನ್ರೋ (7ರನ್) ರನ್​, ಗ್ಲೇನ್​ ಫಿಲಿಪ್ಸ್​ (11ರನ್), ಗ್ರಾಂಡ್​ ಹೋಮ್​ (17 ರನ್)  ಉತ್ತಮ ಬ್ಯಾಟಿಂಗ್ ಮಾಡುವ ಪ್ರಯತ್ನ ಮಾಡಿದರಾದರೂ ತಂಡಕ್ಕೆ ಗೆಲುವು ತಂದು ಕೊಡುವಲ್ಲಿ ಯಶಸ್ವಿಯಾಗಲಿಲ್ಲ. ಭಾರತದ ಪರ ಜಸ್ಪ್ರೀತ್​ ಬುಮ್ರಾ 2 ವಿಕೆಟ್ , ಭುವನೇಶ್ವರ್​  ಕುಮಾರ್​ ಮತ್ತು ಕುಲದೀಪ್​ ಯಾದವ್​ ತಲಾ ಒಂದು ವಿಕೆಟ್​ ಪಡೆದರು.

2 ವಿಕೆಟ್ ಕಬಳಿಸಿ ಭಾರತದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ ಬುಮ್ರಾ ಪಂದ್ಯ ಶ್ರೇಷ್ಟಪ್ರಶಸ್ತಿ ಮತ್ತು ಸರಣಿ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.