ರಂಗೇರಿದ ಐಪಿಎಲ್ ಸಿದ್ಧತೆ, ಟೂರ್ನಿ ಗೀತೆ ಬಿಡುಗಡೆ

ನವದೆಹಲಿ: 2018ನೇ ಸಾಲಿನ ಐಪಿಎಲ್ ಟೂರ್ನಿಗೆ ದಿನಗಣನೆ ಆರಂಭವಾಗಿರುವಂತೆಯೇ ಟೂರ್ನಿಯ ಪ್ರಚಾರ ಕಾರ್ಯಕ್ಕೆ ಐಪಿಎಲ್ ಮಂಡಳಿ ವಿದ್ಯುಕ್ತ ಚಾಲನೆ ನೀಡಿದ್ದು, ಟೂರ್ನಿಯ ಪ್ರಚಾರ ಗೀತೆ, ಬೆಸ್ಟ್ ವರ್ಸಸ್ ಬೆಸ್ಟ್ ಗೀತೆಯನ್ನು ಬಿಡುಗಡೆ ಮಾಡಿದೆ.

ಇದೇ ಮೊದಲ ಬಾರಿಗೆ ಬಿಸಿಸಿಐ ಮತ್ತು ಐಪಿಎಲ್ ಆಡಳಿತ ಮಂಡಳಿ ಟೂರ್ನಿಯ ಪ್ರಚಾರಕ್ಕಾಗಿ ಗೀತೆಯೊಂದನ್ನು ಹೊರತಂದಿದ್ದು, ಗೀತೆಯ ಬಿಡುಗಡೆ ಮೂಲಕ ಟೂರ್ನಿಯ ಪ್ರಚಾರ ಕಾರ್ಯಕ್ಕೆ ಅಧಿಕೃತ ಚಾಲನೆ ನೀಡಿದೆ. ಬಿಸಿಸಿಐ ಬಿಡುಗಡೆ ಮಾಡಿರುವ ಟೂರ್ನಿಯ ಬೆಸ್ಟ್ ವರ್ಸಸ್ ಬೆಸ್ಟ್ ಗೀತೆಯನ್ನು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ ಎಂಎಸ್ ಧೋನಿ ತಮ್ಮ ಟ್ವಿಟರ್ ಖಾತೆಯಲ್ಲಿ ಶೇರ್ ಮಾಡಿದ್ದು, ಗೀತೆ ಇದೀಗ ವ್ಯಾಪಕ ವೈರಲ್ ಆಗಿದೆ.

ಇನ್ನುಸಂಪೂರ್ಣ ಗೀತೆಯನ್ನು ಭಾರತೀಯರನ್ನುಗುರಿಯಾಗಿಸಿಕೊಂಡು ಚಿತ್ರಿಸಲಾಗಿದ್ದು, ಈ ಹಿಂದಿನ ಟೂರ್ನಿಗಳಲ್ಲಿ ಮೆಲುಕು ಹಾಗೂ ಅಭಿಮಾನಿಗಳ ಕಾತರವನ್ನುಗೀತೆಯಲ್ಲಿ ಚಿತ್ರಿಸಲಾಗಿದೆ. ಈ ಬಗ್ಗೆ ಮಾತನಾಡಿರುವ ಬಿಸಿಸಿಐನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ರಾಹುಲ್ ಜೋಹ್ರಿ ಅವರು ಭಾರತದಲ್ಲಿ ಕ್ರಿಕೆಟ್ ಧರ್ಮವಾಗಿ ಬದಲಾಗಿದ್ದು, ಕ್ರಿಕೆಟ್ ಗಾಗಿ ಏನೇ ಮಾಡಿದರೂ ಅಭಿಮಾನಿಗಳಿಗೆ ಖುಷಿ ನೀಡುತ್ತದೆ. ಐಪಿಎಲ್ ಭಾರತೀಯ ಕ್ರಿಕೆಟ್ ಅಭಿಮಾನಿಗಳ ಪಾಲಿಗೆ ಉತ್ಸವವಾಗಿರಲಿದೆ ಎಂದು ಹೇಳಿದ್ದಾರೆ. 

ಇದೇ ಏಪ್ರಿಲ್ 7 ರಿಂದ 2018ನೇ ಸಾಲಿನ ಐಪಿಎಲ್ ಟೂರ್ನಿ ಆರಂಭವಾಗುತ್ತಿದ್ದು, ಈ ಹಿಂದೆ ಟೂರ್ನಿಯಿಂದ ಹೊರ ಬಿದ್ದಿದ್ದ ಚೆನ್ನೇ ಸೂಪರ್ ಕಿಂಗ್ಸ್ ತಂಡ ಮತ್ತೆ ಟೂರ್ನಿಗೆ ವಾಪಸ್ ಆಗಿರುವುದು ಟೂರ್ನಿಯ ಮೇಲಿನ ಕುತೂಹಲವನ್ನು ಮತ್ತಷ್ಟು ಕೆರಳಿಸಿದ್ದು, ಮಹೇಂದ್ರ ಸಿಂಗ್ ಧೋನಿ ನೇತೃತ್ವದ ಚೆನ್ನೈ ತಂಡ ಇದೀಗ ಎಲ್ಲರ ಕೇಂದ್ರ ಬಿಂದುವಾಗಿದೆ.