ಮುಂಬೈ ತಂಡದ ನಾಯಕ ರೋಹಿತ್ ಗೆ ದಂಡ!

ಕೋಲ್ಕತಾ: ಮುಂಬೈ ಇಂಡಿಯನ್ಸ್ ತಂಡದ ನಾಯಕ ರೋಹಿತ್ ಶರ್ಮಾ ಅವರು ಕೋಲ್ಕತಾ ನೈಟ್ ರೈಡರ್ಸ್ ವಿರುದ್ಧ ಈಡನ್ ಗಾರ್ಡನ್ ನಲ್ಲಿ ನಡೆದ ಪಂದ್ಯದ ವೇಳೆ ಐಸಿಸಿ ಹಾಗೂ ಐಪಿಎಲ್ ನಿಯಮಗಳ ವಿರುದ್ಧವಾಗಿ ನಡೆದುಕೊಂಡಿದ್ದಾರೆ ಎಂದು ಅವರ ಮೇಲೆ ಪಂದ್ಯ ಸಂಭಾವನೆಯ ಶೇ. 15 ರಷ್ಟು ದಂಡ ವಿಧಿಸಲಾಗಿದೆ. 

ಭಾನುವಾರ ನಡೆದ ಪಂದ್ಯದಲ್ಲಿ ಮುಂಬೈ ಬ್ಯಾಟಿಂಗ್ ಮಾಡುವಾಗ 4ನೇ ಓವರ್ ನಲ್ಲಿ ಕೆಕೆಆರ್ ಬೌಲರ್ ಹ್ಯಾರಿ ಗರ್ನಿ ಎಸೆತದಲ್ಲಿ ರೋಹಿತ್ ಶರ್ಮಾ ಎಲ್ಬಿ ಡಬ್ಲ್ಯೂ ಬಲೆಗೆ ಬಿದ್ದರು. ಆಗ ಫೀಲ್ಡ್ ಅಂಪೈರ್ ಔಟ್ ಎಂದು ತೀರ್ಪು ನೀಡಿದರು. ರೋಗಿತ್ ಶರ್ಮಾ ಡಿಆರ್ಎಸ್ ಮೊರೆ ಹೋದರು. ಮೇಲ್ಮನವಿಯಲ್ಲಿ ಅಂಪೈರ್ ಪರವೇ ತೀರ್ಪು ಬಂದಿತು. ರೋಹಿತ್ ಒಲ್ಲದ ಮನಸ್ಸಿನಿಂದ ಪೆವಿಲಿಯನ್ ನತ್ತ ಹೆಜ್ಜೆ ಹಾಕಿದರು. ಈ ವೇಳೆ ಅಂಪೈರ್ ನಿಂತಿದ್ದ ತುದಿಯಲ್ಲಿನ ವಿಕೆಟ್ ಗಳ ಬೇಲ್ಸ್ ಹಾರಿಸಿ ಅಸಾಮಾಧಾನ ಹೊರ ಹಾಕಿದರು. 

ರೋಹಿತ್ ಶರ್ಮಾ ಆಟಗಾರರ ಐಪಿಎಲ್ ನಿಯಮವನ್ನು ಗಾಳಿಗೆ ತೂರಿದ ಹಿನ್ನೆಲೆಯಲ್ಲಿ ಅವರ ಮೇಲೆ ಮ್ಯಾಚ್ ರೆಫ್ರಿ ದಂಡ ವಿಧಿಸಿದರು. 

ಮುಂಬೈ ಪಂದ್ಯದಲ್ಲಿ 233 ರನ್ ಗಳ ಸವಾಲಿನ ಗುರಿಯನ್ನು ಬೆನ್ನಟ್ಟಿತು. ಮುಂಬೈ ಭರ್ಜರಿ ಆರಂಭ ಪಡೆಯುವ ಆಸೆ ಹೊಂದಿತ್ತು. ಅಲ್ಲದೆ ರೋಹಿತ್ ಉತ್ತಮವಾಗಿಯೇ ಆಡುತ್ತಾ ಇದ್ದರು. ಇವರು ಆರಂಭದಲ್ಲಿ ಮೂರು ಭರ್ಜರಿ ಬೌಂಡರಿ ಬಾರಿಸಿ ರನ್ ಕಲೆ ಹಾಕಿದರು.