ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2026) ನಲ್ಲಿ ಭಾಗವಹಿಸಲು ನಿರಾಕ್ಷೇಪಣಾ ಪ್ರಮಾಣಪತ್ರಗಳನ್ನು (ಎನ್ಒಸಿ) ಪಡೆಯಲು ಶ್ರೀಲಂಕಾ ಕ್ರಿಕೆಟ್ ತನ್ನ ಆಟಗಾರರು ಫಿಟ್ನೆಸ್ ಪರೀಕ್ಷೆಗಳಲ್ಲಿ ಉತ್ತೀರ್ಣರಾಗುವುದನ್ನು ಕಡ್ಡಾಯಗೊಳಿಸಿದೆ. ನುವಾನ್ ತುಷಾರ, ಮತೀಷ ಪತಿರಾನ, ವನಿಂದು ಹಸರಂಗ ಸೇರಿದಂತೆ ಹಲವಾರು ಶ್ರೀಲಂಕಾ ಆಟಗಾರರು ವಿವಿಧ ಫ್ರಾಂಚೈಸಿಗಳ ಭಾಗವಾಗಿದ್ದಾರೆ. ಮಾರ್ಚ್ 28 ರಿಂದ ಪ್ರಾರಂಭವಾಗಲಿರುವ ಐಪಿಎಲ್ 2026 ಪ್ರಾರಂಭವಾಗುವ ಕೆಲವೇ ದಿನಗಳ ಮೊದಲು ಎಸ್ಎಲ್ಸಿ ತನ್ನ ಆಟಗಾರರಿಗೆ ಈ ನಿರ್ದೇಶನ ನೀಡಿದೆ.
ಇಎಸ್ಪಿಎನ್ಕ್ರಿಕ್ಇನ್ಫೋ ಪ್ರಕಾರ, ದುಷ್ಮಂತ ಚಮೀರ, ಪಾತುಮ್ ನಿಸ್ಸಂಕ ಮತ್ತು ಕಮಿಂದು ಮೆಂಡಿಸ್ ದೈಹಿಕ ಕಾರ್ಯಕ್ಷಮತೆ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿದ್ದಾರೆ ಮತ್ತು ಐಪಿಎಲ್ 2026 ರಲ್ಲಿ ಭಾಗವಹಿಸಲು ಎನ್ಒಸಿಗಳನ್ನು ಪಡೆದಿದ್ದಾರೆ. ವನಿಂದು ಹಸರಂಗ (ಎಲ್ಎಸ್ಜಿ), ಮತೀಷ ಪತಿರಾನ (ಕೆಕೆಆರ್), ನುವಾನ್ ತುಷಾರ (ಆರ್ಸಿಬಿ) ಮತ್ತು ಇಶಾನ್ ಮಲಿಂಗ (ಎಸ್ಆರ್ಹೆಚ್) ಫಿಟ್ನೆಸ್ ಪರೀಕ್ಷೆಯನ್ನು ಇನ್ನೂ ತೆಗೆದುಕೊಂಡಿಲ್ಲದ ಆಟಗಾರರಾಗಿದ್ದಾರೆ. ಈ ಮೂವರೂ ಟಿ20 ವಿಶ್ವಕಪ್ 2026ಕ್ಕೂ ಮೊದಲು ಗಾಯಗೊಂಡಿದ್ದರು ಮತ್ತು ಸದ್ಯ ಪುನರ್ವಸತಿಯಲ್ಲಿದ್ದಾರೆ.
'ಐಪಿಎಲ್ನಲ್ಲಿ ಭಾಗವಹಿಸಲು ನುವಾನ್ ತುಷಾರ ಅವರ ಎನ್ಒಸಿ ಅರ್ಹತೆಯು ಅವರ ದೈಹಿಕ ಕಾರ್ಯಕ್ಷಮತೆ ಪರೀಕ್ಷೆಯ ಫಲಿತಾಂಶಕ್ಕೆ ಒಳಪಟ್ಟಿರುತ್ತದೆ. ಐಪಿಎಲ್ 2026 ರಲ್ಲಿ ಭಾಗವಹಿಸಲು ಎನ್ಒಸಿಗಳನ್ನು ಕೋರಿರುವ ವನಿಂದು ಹಸರಂಗ, ಇಶಾನ್ ಮಲಿಂಗ ಮತ್ತು ಮತೀಷ ಪತಿರಾನ ಇನ್ನೂ ದೈಹಿಕ ಕಾರ್ಯಕ್ಷಮತೆ ಪರೀಕ್ಷೆಗೆ ಒಳಗಾಗಿಲ್ಲ. ಏಕೆಂದರೆ, ಅವರು ಇನ್ನೂ ಗಾಯಗಳಿಂದ ಚೇತರಿಸಿಕೊಳ್ಳುತ್ತಿದ್ದಾರೆ' ಎಂದು ಎಸ್ಎಲ್ಸಿ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ತಿಳಿಸಿದೆ.
ಗುರುವಾರ ವರದಿಗಳ ಪ್ರಕಾರ, ಪತಿರಾನ ಮಾತ್ರ ಏಪ್ರಿಲ್ ಮಧ್ಯಭಾಗದ ವೇಳೆಗೆ ಕೆಕೆಆರ್ ಪರ ಆಡಲು ಲಭ್ಯವಿರುತ್ತಾರೆ. ಅಂದರೆ, ಅವರು ಮೊದಲ ಕೆಲವು ಪಂದ್ಯಗಳಿಗೆ ಲಭ್ಯರಿರುವುದಿಲ್ಲ. ಐಪಿಎಲ್ ಕಾಂಟ್ರಾಕ್ಟ್ ಆಟಗಾರರಿಗೆ ಫಿಟ್ನೆಸ್ ಪರೀಕ್ಷೆಗಳನ್ನು ಕಡ್ಡಾಯಗೊಳಿಸುವ ನಿರ್ಧಾರವನ್ನು ಹೊಸ ಪುರುಷರ ಆಯ್ಕೆ ಸಮಿತಿ ಮತ್ತು ಶ್ರೀಲಂಕಾ ಸರ್ಕಾರದ ಕ್ರೀಡಾ ಸಚಿವಾಲಯ ತೆಗೆದುಕೊಂಡಿದೆ.
'ಈ ಉಪಕ್ರಮವು ಮುಂಬರುವ ಅಂತರರಾಷ್ಟ್ರೀಯ ಕಾರ್ಯಯೋಜನೆಗಳಿಗೆ ಆಟಗಾರರ ದೈಹಿಕ ಕಾರ್ಯಕ್ಷಮತೆಯ ಗುಣಮಟ್ಟವನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ. ಈ ಕಾರ್ಯಕ್ರಮದ ಜೊತೆಗೆ, ಆಟಗಾರರು ಕಡ್ಡಾಯ ದೈಹಿಕ ಕಾರ್ಯಕ್ಷಮತೆ ಪರೀಕ್ಷೆಗಳಿಗೆ ಒಳಗಾಗುತ್ತಿದ್ದಾರೆ. ಇದು ಆಟಗಾರರ ಫಿಟ್ನೆಸ್ ಮಾನದಂಡಗಳನ್ನು ಪರಿಶೀಲಿಸಲು ಅನುಸರಿಸಲಾಗುವ ನಿಯಮಿತ ಪ್ರಕ್ರಿಯೆಯಾಗಿದೆ. ದೈಹಿಕ ಕಾರ್ಯಕ್ಷಮತೆ ಪರೀಕ್ಷೆಗಳ ಅಗತ್ಯ ಮಾನದಂಡಗಳನ್ನು ಯಶಸ್ವಿಯಾಗಿ ಪೂರೈಸುವವರಿಗೆ ಮಾತ್ರ ನಡೆಯುತ್ತಿರುವ ದೇಶೀಯ ಪಂದ್ಯಾವಳಿಯಲ್ಲಿ ಭಾಗವಹಿಸಲು ಅನುಮತಿ ನೀಡಲಾಗುತ್ತದೆ ಮತ್ತು ಐಪಿಎಲ್ 2026 ರಲ್ಲಿ ಭಾಗವಹಿಸಲು ಎನ್ಒಸಿಯನ್ನು ಸಹ ನೀಡಲಾಗುತ್ತದೆ' ಎಂದು ಪ್ರಕಟಣೆ ತಿಳಿಸಿದೆ.
Advertisement
