ಬಿಬಿಎಂಪಿ ಅಧಿಕಾರಿಗಳು ಮಟನ್, ಮೀನು, ಚಿಕನ್, ಗೋಮಾಂಸ, ಹಂದಿ ಮಾಂಸ ಹಾಗೂ ಮೊಟ್ಟೆ ಅಂಗಡಿಗಳಿಗೆ ಪ್ರತ್ಯೇಕ ಪರವಾನಗಿಗಳನ್ನು ನೀಡಿರುತ್ತದೆ. ಪರವಾನಗಿಯನ್ನು ಎರಡು ರೀತಿಯಲ್ಲಿ ನೀಡಲಾಗಿರುತ್ತದೆ. ತಾಜಾ ಮಾಂಸ ಮಾರಾಟ ಅಂಗಡಿಗಳಿಗೆ ( ರೂ.2 ಸಾವಿರ ಪರವಾನಗಿ) ಹಾಗೂ ಶೇಖರಿಸಿಟ್ಟ ಮಾಂಸ ( ತಂಪು ಸಂಗ್ರಹಣೆಯ ಸೌಲಭ್ಯ)ದ ಅಂಗಡಿಗಳಿಗೆ (ರೂ.10,000 ಪರವಾನಗಿ) ಪ್ರತ್ಯೇಕವಾಗಿ ಪರವಾನಗಿಗಳನ್ನು ನೀಡಿರುತ್ತದೆ. ಪರವಾನಗಿಗೆ ಅರ್ಜಿ ಸಲ್ಲಿಕೆ ಮಾಡಿದವರು ಅಂಗಡಿ ಸ್ಥಾಪನೆ ಮಾಡುವುದಕ್ಕೂ ಮುನ್ನ ಆಯಾ ಕಟ್ಟಡಗಳು ಮತ್ತು ನೆರೆಮನೆಯವರ ಒಪ್ಪಿಗೆಯನ್ನು ಪಡೆದುಕೊಂಡಿರಬೇಕಾಗಿರುತ್ತದೆ.
ಹೊರ ವರ್ತುಲ ರಸ್ತೆಯಲ್ಲಿ ಮಾಂಸದ ಅಂಗಡಿಯನ್ನು ನಡೆಸಬೇಕಾದರೆ, ರಸ್ತೆಯು 40 ಅಡಿಯಷ್ಟು ವಿಸ್ತೀರ್ಣವನ್ನು ಹೊಂದಿರಬೇಕಾಗಿರುತ್ತದೆ. ಹೊರ ವರ್ತುಲ ರಸ್ತೆಯಿಂದ ಹೊರಗೆ ನಡೆಸುವ ಅಂಗಡಿಗಳ ರಸ್ತೆಗಳ ವಿಸ್ತೀರ್ಣ 60 ಅಡಿಯಷ್ಟಿರಬೇಕು. ದಾಳಿ ವೇಳೆ ಅಧಿಕಾರಿಗಳು ಅಂಗಡಿಗಳ ಸ್ವಚ್ಛತೆ ಹಾಗೂ ನೈರ್ಮಲ್ಯವನ್ನು ಪರಿಶೀಲನೆ ನಡೆಸಲಿದ್ದಾರೆ. ಅಲ್ಲದೆ, ಅಂಗಡಿಯ ಪರವಾನಗಿಯನ್ನು ಪರಿಶೀಲನೆ ನಡೆಸಲಿದ್ದಾರೆ. ಈ ಎಲ್ಲಾ ನಿಯಮಗಳನ್ನು ಉಲ್ಲಂಘನೆ ಮಾಡಿದ ಅಂಗಡಿಗಳನ್ನು ಬಿಬಿಎಂಪಿ ಅಧಿಕಾರಿಗಳು ಬಂದ್ ಮಾಡಿಸಲಿದ್ದಾರೆಂದು ಹೇಳಲಾಗುತ್ತಿದೆ.
