ಕದ್ದಿದ್ದ ಐಫೋನ್‌ಗಾಗಿ ಸ್ನೇಹಿತನ ಹತ್ಯೆ: ಮೂವರ ಬಂಧನ

ಬೆಂಗಳೂರು: ಕೆಂಗೇರಿ ರೈಲ್ವೆ ಹಳಿ ಬಳಿ ಪತ್ತೆಯಾಗಿದ್ದ 19 ವರ್ಷದ ಯುವಕನ ಕೊಲೆ ಪ್ರಕರಣವನ್ನು ಬೆಂಗಳೂರು ಪೊಲೀಸರು ಪತ್ತೆ ಹಚ್ಚಿಸಿದ್ದು ಐಫೋನ್ ಗಾಗಿ ಸ್ನೇಹಿತರೇ ಯುವಕನನ್ನು ಹತ್ಯೆ ಮಾಡಿರುವ ವಿಷಯವನ್ನು ಬಹಿರಂಗಪಡಿಸಿದ್ದಾರೆ. 

ಮಾರ್ಚ್ 4ರಂದು 19 ವರ್ಷದ ಚಿನ್ನು ಅಲಿಯಾಸ್ ಶ್ರೀನಿವಾಸ್ ಎಂಬಾತನ ಮೃತದೇಹ ಕೆಂಗೇರಿಯ ರೈಲ್ವೆ ಹಳಿ ಬಳಿ ಪತ್ತೆಯಾಗಿತ್ತು. ಈ ಸಂಬಂಧ ಶ್ರೀನಿವಾಸ್ ಸ್ನೇಹಿತರಾದ ಅಭಿಷೇಕ್, ಮಧುಕುಮಾರ್ ಮತ್ತು ಮದನ್ ಎಂಬುವರನ್ನು ಪೊಲೀಸರು ಬಂಧಿಸಿದ್ದಾರೆ. ಕದ್ದ ಐಫೋನ್ ಗಾಗಿ ಸ್ನೇಹಿತನನ್ನು ಹತ್ಯೆ ಮಾಡಿರುವುದಾಗಿ ಮೂವರು ಆರೋಪಿಗಳು ಒಪ್ಪಿಕೊಂಡಿದ್ದಾರೆ. 

ಈ ನಾಲ್ವರು ದೂಮಪಾನಕ್ಕೆ ದಾಸರಾಗಿದ್ದು ತಮ್ಮ ಚಟವನ್ನು ತೀರಿಸಿಕೊಳ್ಳಲು ಮೊಬೈಲ್ ಗಳನ್ನು ಕಳ್ಳತನ ಮಾಡುತ್ತಿದ್ದರು. ಶ್ರೀನಿವಾಸ್ ಮೂರು ಮೊಬೈಲ್ ಗಳನ್ನು ಕದ್ದಿದ್ದು, ಇದರಲ್ಲಿ ಎರಡು ಫೋನ್ ಗಳು ಐಫೋನ್ ಆಗಿದ್ದವು. ಒಂದು ಐಫೋನ್ ಗೆ ಆರು ಸಾವಿರ ಕೊಡುವುದಾಗಿ ಪ್ರಮುಖ ಆರೋಪಿ ಅಭಿಶೇಕ್ ಕೇಳಿದ್ದಾನೆ ಇದಕ್ಕೆ ಶ್ರೀನಿವಾಸ್ ಒಪ್ಪದಿದ್ದರಿಂದ ಆತನನ್ನು ಕೊಲೆ ಮಾಡಲಾಗಿದೆ ಎಂದು ಪೊಲೀಸ್ ಅಧಿಕಾರಿ ಅನೂಪ್ ಎ ಶೆಟ್ಟಿ ಹೇಳಿದ್ದಾರೆ. 

ಐಫೋನ್ ಗಳಿಗೆ ಒಳ್ಳೆ ಬೆಲೆ ಕೊಡಿಸುವುದಾಗಿ ಮೂವರು ಆರೋಪಿಗಳು ಶ್ರೀನಿವಾಸ್ ನನ್ನು ಕೆಂಗೇರಿಗೆ ಕರೆದುಕೊಂಡು ಹೋಗಿದ್ದಾರೆ. ರೈಲ್ವೆ ಟ್ರಾಕ್ ಬಳಿ ಆತನಿಗೆ ಮಾರಿಜುನ್ನಾ ಸೇದುವಂತೆ ಹೇಳಿದ್ದು ಬಳಿಕ ಆತನ ಮೇಲೆ ಹಲ್ಲೆ ಮಾಡಿ ಕಲ್ಲಿನಿಂದ ಜಜ್ಜಿ ಕೊಲೆ ಮಾಡಿ ಟ್ರಾಕ್ ಮೇಲೆ ಬಿಸಾಡಿ ಹೋಗಿದ್ದರು. ಇದೇ ಟ್ರಾಕ್ ಮೇಲೆ ರೈಲು ಹೋಗಿದ್ದು ಶ್ರೀನಿವಾಸನ ದೇಹ ತುಂಡಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.