ಕೊಪ್ಪಳ: ಮುಂದುವರಿದ ರೈತರ ಆತ್ಮಹತ್ಯೆ, ಮಂಡ್ಯದಲ್ಲಿಯೂ ಇಬ್ಬರು ಸಾವು

ಕೊಪ್ಪಳ: ಸಾಲ ಬಾಧೆ ತಾಳಲಾರದೆ ಕೊಪ್ಪಳದಲ್ಲಿ ನಿನ್ನೆ ಮತ್ತೊಬ್ಬ ರೈತ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಕೊಪ್ಪಳದ ಇರಕಲ್ಗಡ ಗ್ರಾಮದಲ್ಲಿ ಮಂಜುನಾಥ್ ಪಿನ್ನಿ ಎಂಬ ರೈತ 2 ಲಕ್ಷ ರೂಪಾಯಿಗಳನ್ನು ಪ್ರಗತಿ ಕೃಷ್ಣ ಗ್ರಾಮೀಣ ಬ್ಯಾಂಕಿನಿಂದ ಸಾಲ ಪಡೆದಿದ್ದರು. ಅಲ್ಲದೆ ಖಾಸಗಿ ವ್ಯಕ್ತಿಗಳಿಂದಲೂ ಸಾಲ ಪಡೆದಿದ್ದರು. 

ಈ ಮೂಲಕ ಕಳೆದ ತಿಂಗಳಿನಿಂದ ಸಾಲ ಬಾಧೆ ತಾಳಲಾರದೆ ಆತ್ಮಹತ್ಯೆ ಮಾಡಿಕೊಂಡ ರೈತರ ಸಂಖ್ಯೆ 8ಕ್ಕೇರಿದೆ ಎಂದು ಕೃಷಿ ಇಲಾಖೆ ತಿಳಿಸಿದೆ. 

ಪರಿಹಾರಕ್ಕೆ ಪರಿಗಣನೆ ಅಥವಾ ಅನುಮೋದನೆ ನೀಡುವ ಕೃಷಿ ಇಲಾಖೆಯ ಸಹಾಯಕ ಆಯುಕ್ತರ ನೇತೃತ್ವದ ಸಮಿತಿ ಮುಂದೆ ಈ 8 ಆತ್ಮಹತ್ಯೆ ಕೇಸುಗಳು ಕೂಡ ದಾಖಲಾಗಿಲ್ಲ. 2016-17ನೇ ವರ್ಷದ 5 ಆತ್ಮಹತ್ಯಾ ಕೇಸುಗಳಿಗೆ ಪರಿಹಾರ ಇನ್ನೂ ಬಿಡುಗಡೆಯಾಗಿಲ್ಲ. ಒಂದು ಕೇಸು ತಿರಸ್ಕೃತವಾಗಿದೆ. ಇತರ ಆರು ಜನರಿಗೆ ಪರಿಹಾರಗಳನ್ನು ನೀಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಮಂಡ್ಯದಲ್ಲಿ ಇಬ್ಬರು ರೈತರು ಆತ್ಮಹತ್ಯೆ: ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿ ಸಾವು ಬದುಕಿನ ನಡುವೆ ಹೋರಾಟ ನಡೆಸುತ್ತಿದ್ದ ಜಗದೀಶ್ ಎಂಬ ರೈತ ಮಂಡ್ಯದ ಸರ್ಕಾರಿ ಆಸ್ಪತ್ರೆಯಲ್ಲಿ ನಿಧನರಾಗಿದ್ದಾರೆ. ಇವರು ಮಂಡ್ಯ ಜಿಲ್ಲೆಯ ಮಳವಳ್ಳಿ ತಾಲ್ಲೂಕಿನ ಡಿ.ಹಲಸಹಳ್ಳಿಯವರಾಗಿದ್ದಾರೆ.

ಜಗದೀಶ್ 5 ಲಕ್ಷ ರೂಪಾಯಿ ಸಾಲ ಮಾಡಿಕೊಂಡವರು.ಮಂಡ್ಯ ಜಿಲ್ಲೆಯ ಕೆ.ಆರ್.ಪೇಟೆ ತಾಲ್ಲೂಕಿನ ಶ್ಯಾಲನಗೆರೆ ಎಂಬಲ್ಲಿ ರಾಮಚಂದ್ರ ಎಂಬ ಮತ್ತೊಬ್ಬ ರೈತರು ತಾವು ಪಡೆದಿದ್ದ 5 ಲಕ್ಷ ರೂಪಾಯಿ ಸಾಲವನ್ನು ಹಿಂತಿರುಗಿಸಲಾಗದೆ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.