ಕೋಲಾರ ಬಳಿ ಭೀಕರ ಅಪಘಾತ: ನೆರವಿಗೆ ಬರುವ ಬದಲು ವಿಡಿಯೋ ಮಾಡುವತ್ತ ಜನರು ಮಗ್ನ!

ಕೋಲಾರ: ಬಂಗಾರಪೇಟೆ-ಕೆಜಿಎಫ್ ಮುಖ್ಯ ರಸ್ತೆಯಲ್ಲಿ ಹೆಚ್ ಜಿಆರ್ ರೆಸಾರ್ಟ್ ಹತ್ತಿರ ವೇಗವಾಗಿ ಬರುತ್ತಿದ್ದ ಕಾರು ಬೈಕ್ ಗೆ ಡಿಕ್ಕಿ ಹೊಡೆದ ಕಾರಣ ರಕ್ತದ ಮಡುವಿನಲ್ಲಿ ಬಿದ್ದ ದ್ವಿಚಕ್ರ ವಾಹನ ಸವಾರನ್ನು ಆಸ್ಪತ್ರೆಗೆ ದಾಖಲಿಸುವ ಬದಲು ನೋಡುಗರು ಕರುಣೆಯಿಲ್ಲದೆ 

ವಿಡಿಯೊ ತೆಗೆಯುವುದರಲ್ಲಿ ನಿರತರಾಗಿದ್ದ ಘಟನೆ ನಿನ್ನೆ ನಸುಕಿನ ಜಾವ ನಡೆದಿದೆ.

ಕೋಲಾರದ ದಾಸರ ಹೊಸಹಳ್ಳಿಯ 20 ವರ್ಷದ ಜಾರ್ಜ್ ಎಂಬ ಯುವಕ ಮೃತಪಟ್ಟವನಾಗಿದ್ದಾರೆ. ಹಿಂಬದಿ ಸವಾರ ಶ್ರೀಕಾಂತ್ ಎಂಬುವವರು ಅಪಘಾತದಲ್ಲಿ ತೀವ್ರವಾಗಿ ಗಾಯಗೊಂಡು ಇದೀಗ ಆಸ್ಪತ್ರೆಯಲ್ಲಿದ್ದಾರೆ. ಅಪರಿಚಿತ ಕಾರು ಕೆಜಿಎಫ್ ಕಡೆಗೆ ತೆರಳುತ್ತಿದ್ದು ಬಂಗಾರಪೇಟೆಯಲ್ಲಿ ನಿನ್ನೆ ನಸುಕಿನ ಜಾವ 4.30ರ ಸುಮಾರಿಗೆ ಬೈಕ್ ಗೆ ಡಿಕ್ಕಿ ಹೊಡೆಯಿತು.

ಅಪಘಾತವಾದ ನಂತರ ಕಾರು ಮತ್ತು ಹಲವು ದ್ವಿಚಕ್ರ ವಾಹನ ಸವಾರರು ಸ್ಥಳದಲ್ಲಿ ನಿಂತು ನೋಡಿದ್ದಾರೆಯೇ ಹೊರತು ಯಾರು ಕೂಡ ಗಂಭೀರ ಗಾಯಗೊಂಡ ಯುವಕರನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗುವ ಮನಸ್ಸು ತೋರಲಿಲ್ಲ. 

ಸ್ಥಳಕ್ಕೆ ಆಂಬ್ಯುಲೆನ್ಸ್ ಬರುವುದು ತಡವಾಗಿತ್ತು. ಅಷ್ಟು ಹೊತ್ತು ನೋಡುಗರಲ್ಲಿ ಕೆಲವರು ಯುವಕರಿಬ್ಬರು ರಕ್ತದ ಮಡುವಿನಲ್ಲಿ ಬಿದ್ದಿರುವುದನ್ನು ನೋಡಿ ವಿಡಿಯೊ ಮಾಡುತ್ತಿದ್ದರು. ಒಬ್ಬರು ಮಾಡಿರುವ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಆಂಬ್ಯುಲೆನ್ಸ್ ತಲುಪುವ ಹೊತ್ತಿಗೆ ಒಬ್ಬನ ಪ್ರಾಣಪಕ್ಷಿ ಹಾರಿಹೋಗಿತ್ತು.