ನಾಡ ಅಧಿದೇವತೆ ಚಾಮುಂಡೇಶ್ವರಿ ದೇಗುಲಕ್ಕೆ ಚಿನ್ನದ ಬಾಗಿಲು ಸಮರ್ಪಣೆ!

ಮೈಸೂರು: ನಾಡ ಅಧಿದೇವತೆ ಚಾಮುಂಡೇಶ್ವರಿ ದೇವಿಗೆ ಸಚಿವ ಡಿಕೆ ಶಿವಕುಮಾರ್ ಅವರು ಬೆಳ್ಳೆ ಆನೆ ಸಮರ್ಪಿಸಿದ ಬೆನ್ನಲ್ಲೇ ಇದೀಗ ವ್ಯಕ್ತಿಯೊಬ್ಬರು ದೇಗುಲಕ್ಕೆ ಕೋಟ್ಯಂತರ ಮೌಲ್ಯದ ಚಿನ್ನದ ಬಾಗಿಲನ್ನು ಸಮರ್ಪಣೆ  ಮಾಡಿದ್ದಾರೆ.

ಮಾಧ್ಯಮಗಳು ವರದಿ ಮಾಡಿರುವಂತೆ ಬೆಂಗಳೂರು ಮೂಲದ ವಕೀಲ ಜಯಶ್ರೀ ಶ್ರೀಧರ್ ಎಂಬುವವರು ಮೈಸೂರಿನ ಚಾಮುಂಡೇಶ್ವರಿ ದೇಗುಲಕ್ಕೆ ಸುಮಾರು 4 ಕೆಜಿ ತೂಕದ ಚಿನ್ನದ ಬಾಗಿಲನ್ನು ಸರ್ಮರ್ಪಿಸಿದ್ದಾರೆ. ಗರ್ಭಗುಡಿ  ಬಾಗಿಲಿಗೆ ಚಿನ್ನದ ಪಟ್ಟಿ ಬಾಗಿಲು ಅರ್ಪಿಸುವುದಾಗಿ ಈ ಹಿಂದೆ ಜಯಶ್ರೀ ಶ್ರೀಧರ್ ಅವರು ಹರಕೆ ಹೊತ್ತಿದ್ದರಂತೆ. ಅದರಂತೆ 2 ವರ್ಷಗಳ ಹಿಂದೆ ದೇಗುಲದ ಆಡಳಿತ ಮಂಡಳಿಯೊಂದಿಗೆ ಈ ಬಗ್ಗೆ ಚರ್ಚಿಸಿ, ಆಡಳಿತ ಮಂಡಳಿಯಿಂದ  ಒಪ್ಪಿಗೆ ಪಡೆದು ಇದೀಗ ತಮ್ಮ ಹರಕೆ ತೀರಿಸಿದ್ದಾರೆ.

ಈ ಚಿನ್ನದ ಬಾಗಿಲು ಸುಮಾರು 4 ಕೆಜಿ ತೂಕವಿದ್ದು, ಬಾಗಿಲಿನ ಮೇಲೆ ನವದುರ್ಗೆಯರಿರುವ ಚಿತ್ರಗಳನ್ನು ಚಿತ್ರಿಸಲಾಗಿದೆ.  ಈ ಹಿಂದೆ ಬಾಗಿಲಿನ ಮೇಲೆ ಬೆಳ್ಳಿಯ ಪಟ್ಟಿ ಹಾಕಲಾಗಿತ್ತು. ಇದೀಗ ಮತ್ತೆ ಅದೇ ಬೆಳ್ಳಿ ಪಟ್ಟಿಯ ಮೇಲೆ  ಚಿನ್ನದ ಪಟ್ಟಿಯನ್ನು ಕೂರಿಸಲಾಗಿದೆ.