ಸರ್ಕಾರಿ ಪ್ರೊಫೆಸರ್ ಗಳಿಗೆ ಹೆಚ್ಚುವರಿ ಕೆಲಸ, ಕಾಲೇಜು ಶಿಕ್ಷಣ ಇಲಾಖೆ ಆದೇಶದಿಂದ ಕಿರಿಕಿರಿ 

ಬೆಂಗಳೂರು: ವಾರದಲ್ಲಿ ಪ್ರಾಯೋಗಿಕ ತರಗತಿಗಳೊಂದಿಗೆ ಕಡ್ಡಾಯವಾಗಿ 20 ಗಂಟೆ ಬೋಧನೆ ಸೇರಿದಂತೆ ಹೆಚ್ಚುವರಿಯಾಗಿ ನಾಲ್ಕು ಗಂಟೆಗಳ ಕಾಲ ಪ್ರಿನ್ಸಿಪಾಲರಿಗೆ ಆಡಳಿತಾತ್ಮಕ ಕೆಲಸಗಳಲ್ಲಿ ತೊಡಗಿಸಿಕೊಳ್ಳುವಂತೆ ಕಾಲೇಜು ಶಿಕ್ಷಣ ಇಲಾಖೆ ಕಳೆದ ಡಿಸೆಂಬರ್ 12ರಂದು ಆದೇಶ ಹೊರಡಿಸಿದೆ. ಈ ಆದೇಶಕ್ಕೆ ಪ್ರಥಮ ದರ್ಜೆ ಕಾಲೇಜುಗಳ ಪ್ರೊಫೆಸರ್ ಗಳು ಅಸಮಾಧಾನಗೊಂಡಿದ್ದಾರೆ 

ಪ್ರಾಯೋಗಿಕ ತರಗತಿಗಳು ಸೇರಿದಂತೆ ಸಹಾಯಕ ಪ್ರೊಫೆಸರ್ ಗಳಿಗೆ 16 ಗಂಟೆ ಹಾಗೂ ಅಸೊಸಿಯೇಟ್ ಪ್ರೊಫೆಸರ್ಸ್ ಹಾಗೂ ಪ್ರೊಫೆಸರ್ ಗಳಿಗೆ ಪ್ರಾಯೋಗಿಕ ತರಗತಿಗಳು ಸೇರಿದಂತೆ ವಾರದಲ್ಲಿ 14 ಗಂಟೆ ಕಡ್ಡಾಯ ಮಾಡಿರುವ ಯುಜಿಸಿ ಮಾರ್ಗದರ್ಶಿ ಸೂತ್ರಗಳನ್ನು ಈ ಆದೇಶ ಉಲ್ಲಂಘಿಸಿದೆ ಎಂದು ಪ್ರೊಫೆಸರ್ ಒಬ್ಬರು ಹೇಳುತ್ತಾರೆ. ಉಳಿದ ವೇಳೆಯನ್ನು ಸಂಶೋಧನೆ, ಸಂಶೋಧನಾ ಗ್ರಂಥ ಬರವಣಿಗೆ ಹಾಗೂ ಪ್ರಬಂಧ ಮಂಡನೆ ಮತ್ತಿತರ ಉದ್ದೇಶಗಳಿಗೆ ಬಳಸಿಕೊಳ್ಳಲಾಗುತ್ತದೆ ಎಂದು ಅವರು ಹೇಳುತ್ತಾರೆ.

ಕಾಲೇಜು ಶಿಕ್ಷಣ ಇಲಾಖೆಯ ಆದೇಶದಿಂದ ಕೆಲಸದ ಒತ್ತಡ ಹೆಚ್ಚಾಗಿದೆ. ಇದರಿಂದಾಗಿ ಪ್ರಿನ್ಸಿಪಾಲ್ ಅವರೊಂದಿಗೆ ಆಡಳಿತಾತ್ಮಕ ಕಾರ್ಯಗಳಿಗೆ ಸಮಯವನ್ನು ವ್ಯರ್ಥ್ಯ ಮಾಡುವಂತಾಗಿದೆ. ಸಂಶೋಧನೆ, ಸಂಶೋಧನಾ ಗ್ರಂಥ ಬರವಣಿಗೆ, ಮತ್ತಿತರ ಕೆಲಸಗಳನ್ನು ಮಾಡಲು ಸಮಯವೇ ಇಲ್ಲದಂತಾಗಿದೆ ಎಂದು ಪ್ರೊಫೆಸರ್ ಒಬ್ಬರು ಪರಿಸ್ಥಿತಿಯನ್ನು ವಿವರಿಸಿದ್ದಾರೆ.

ನೇರ ಬೋಧನಾ ಅವಧಿಯ ಸಂಖ್ಯೆಯನ್ನು ಬದಲಾಯಿಸಲು ಸಾಧ್ಯವಿಲ್ಲ.  ಥಿಯರಿ ತರಗತಿಗಾಗಿ ವಾರದಲ್ಲಿ 16 ರಿಂದ 14 ಗಂಟೆ ಅವಧಿ ನಿಗದಿಪಡಿಸಲಾಗಿದೆ. ಉಳಿದ ಅವಧಿ ಪ್ರಾಯೋಗಿಕ ತರಗತಿಗೆ ಬಳಸಿಕೊಳ್ಳಬಹುದು. ಅಲ್ಲದೇ ವಿದ್ಯಾರ್ಥಿಗಳ ವೇತನಕ್ಕೆ ಸಂಬಂಧಿಸಿದಂತೆ ವಿದ್ಯಾರ್ಥಿಗಳಿಗೆ ಮಾಹಿತಿ ನೀಡುವ, ಪರೀಕ್ಷೆಗಾಗಿ ಆನ್ ಲೈನ್ ಅರ್ಜಿ ಹಾಕುವ ವಿದ್ಯಾರ್ಥಿಗಳಿಗೆ ನೆರವು ನೀಡುವುದು ಮತ್ತಿತರ ಆಡಳಿತಾತ್ಮಕ ಕಾರ್ಯಗಳನ್ನು ಪ್ರೊಫೆಸರ್ ಗಳು ಮಾಡಬೇಕಾಗುತ್ತದೆ ಎಂದು ಕಾಲೇಜು ಶಿಕ್ಷಣ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು ಪ್ರತಿಕ್ರಿಯಿಸಿದ್ದಾರೆ.