ಮಡಿಕೇರಿ: ಜಮ್ಮು-ಕಾಶ್ಮೀರ ಪಂಚಾಯತ್ ರಾಜ್ ನ ಚುನಾಯಿತ ಪ್ರತಿನಿಧಿಗಳು ಕರ್ನಾಟಕದ ಪೊನ್ನಂಪೇಟೆ ಗ್ರಾಮ ಪಂಚಾಯತ್ ಗೆ ಭೇಟಿ ನೀಡಿ ಅಲ್ಲಿನ ಆಡಳಿತ ಪ್ರಕ್ರಿಯೆ ಅಧ್ಯಯನ ನಡೆಸಿದ್ದಾರೆ. ಜಮ್ಮು ಕಾಶ್ಮೀರದಿಂದ 40 ಕ್ಕೂ ಹೆಚ್ಚು ಪ್ರತಿನಿಧಿಗಳು ಪೊನ್ನಂಪೇಟೆ ಗ್ರಾಮ ಪಂಚಾಯತ್ ನಲ್ಲಿ ಜಾರಿಗೊಳಿಸಲಾದ ವಿವಿಧ ಯೋಜನೆಗಳು ಮತ್ತು ಯೋಜನಾ ಕಾಮಗಾರಿಗಳ ಬಗ್ಗೆ ತಿಳಿದುಕೊಂಡರು.
ಪೊನ್ನಂಪೇಟೆ ಗ್ರಾಮ ಪಂಚಾಯತ್ ಇತ್ತೀಚೆಗೆ ಉತ್ತಮ ಆಡಳಿತ ಕುರಿತು ರಾಷ್ಟ್ರಮಟ್ಟದ ವಿಚಾರ ಸಂಕಿರಣವನ್ನು ಮಂಡಿಸಿತ್ತು. ಪೊನ್ನಂಪೇಟೆ ಪಂಚಾಯತ್ ತನ್ನ ಉತ್ತಮ ಆಡಳಿತಾತ್ಮಕ ವಿಧಾನಗಳಿಗೆ ಹೆಸರುವಾಸಿಯಾಗಿದೆ, ಇಲ್ಲಿನ ನಿವಾಸಿಗಳನ್ನು ಒಳಗೊಳ್ಳಲು ಮತ್ತು ಅಭಿವೃದ್ಧಿ ಕಾರ್ಯಗಳನ್ನು ಕೈಗೊಳ್ಳಲು ಹಲವಾರು ನವೀನ ಯೋಜನೆಗಳು ಜಾರಿಯಲ್ಲಿವೆ. ಪಂಚಾಯತ್‌ನ ಯಶೋಗಾಥೆ ರಾಷ್ಟ್ರಮಟ್ಟಕ್ಕೆ ತಲುಪಿದ್ದು, ಈ ಬಗ್ಗೆ ತಿಳಿದುಕೊಳ್ಳಲು ಜಮ್ಮು ಕಾಶ್ಮೀರದ ವಿವಿಧ ಪಂಚಾಯತ್‌ಗಳಿಂದ ಒಟ್ಟು 42 ಚುನಾಯಿತ ಪ್ರತಿನಿಧಿಗಳು ಪೊನ್ನಂಪೇಟೆಗೆ ಭೇಟಿ ನೀಡಿದ್ದಾರೆ.
ಇದನ್ನೂ ಓದಿ: ಕೊಡಗಿನ ಐದು ಪಂಚಾಯ್ತಿಗಳಿಗೆ ಗಾಂಧಿ ಗ್ರಾಮ ಪುರಸ್ಕಾರ
ಪೊನ್ನಂಪೇಟೆಗೆ ಚುನಾಯಿತ ಪ್ರತಿನಿಧಿಗಳನ್ನು ಸಾಂಪ್ರದಾಯಿಕ ಕೊಡವ ವಾಲಗ ಮೆರವಣಿಗೆಯೊಂದಿಗೆ ಅದ್ಧೂರಿಯಾಗಿ ಸ್ವಾಗತಿಸಲಾಯಿತು. ‘ಮಕ್ಕಳ ಗ್ರಾಮ ಸಭೆ’ (ಮಕ್ಕಳ ಪಂಚಾಯಿತಿ), ವೈಜ್ಞಾನಿಕ ತ್ಯಾಜ್ಯ ವಿಂಗಡಣೆ, ಡಿಜಿಟಲ್ ಲೈಬ್ರರಿ, ಸಾಮಾಜಿಕ ಜಾಲತಾಣಗಳಲ್ಲಿ ಇರುವಿಕೆ, ಹೂಳನ್ನು ಸಾರ್ವಜನಿಕ ಉದ್ಯಾನವನವನ್ನಾಗಿ ಪರಿವರ್ತಿಸುವುದು ಸೇರಿದಂತೆ ವಿವಿಧ ವಿನೂತನ ಕಾರ್ಯಗಳನ್ನು ಪ್ರತಿನಿಧಿಗಳಿಗೆ ಪಿಪಿಟಿ ಪ್ರಸ್ತುತಿ ಮೂಲಕ ವಿವರಿಸಲಾಯಿತು.
ಪಂಚಾಯತ್‌ನ ಮಕ್ಕಳ ಸ್ನೇಹಿ ವಿಧಾನದ ಬಗ್ಗೆ ತಿಳಿಯಲು ಕರ್ನಾಟಕ ಪಬ್ಲಿಕ್ ಸ್ಕೂಲ್ ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸಿದ ಪ್ರತಿನಿಧಿಗಳು ಡಿಜಿಟಲ್ ಲೈಬ್ರರಿ ಮತ್ತು ಮುಕ್ತ ಗ್ರಂಥಾಲಯಕ್ಕೆ ಭೇಟಿ ನೀಡಿದರು. ಸ್ಥಳೀಯ ತಿನಿಸುಗಳು, ಕಲೆ, ಜಾನಪದ ಕಥೆಗಳು ಮತ್ತು ಇತರ ಸಂಸ್ಕೃತಿಗಳ ಬಗ್ಗೆಯೂ ಪ್ರತಿನಿಧಿಗಳಿಗೆ ವಿವರಿಸಲಾಯಿತು. ಕೊಡಗಿನ ವಿಶಿಷ್ಟವಾದ ಜೇನು ತೆಗೆಯುವಿಕೆ, ಕಾಫಿ ತೋಟ ಮತ್ತು ಇತರ ವಿಷಯಗಳ ಬಗ್ಗೆಯೂ ಅವರು ಕಲಿತರು. ಪಿಡಿಒ ಪುಟ್ಟರಾಜು, ಅಧ್ಯಕ್ಷೆ ಗಿರಿಜಾ ವಿ ಮತ್ತಿತರರು ಉಪಸ್ಥಿತರಿದ್ದರು.
