ಮನೆಯ ಅಡುಗೆಗಳಲ್ಲಿ ಬಳಸುವ ಅರಿಶಿನ (ಹಲದಿ) ಆರೋಗ್ಯಕ್ಕೆ ಬಹಳ ಉಪಯುಕ್ತ ಎಂದು ಪರಂಪರೆಯಿಂದಲೇ ನಂಬಲಾಗುತ್ತದೆ. ಇದು ಆಹಾರಕ್ಕೆ ಬಣ್ಣ, ರುಚಿ ಹಾಗೂ ಔಷಧೀಯ ಗುಣಗಳನ್ನು ನೀಡುತ್ತದೆ. ಆದರೆ,ಇತ್ತೀಚಿನ ದಿನಗಳಲ್ಲಿ ಮಾರುಕಟ್ಟೆಯಲ್ಲಿ ಕೃತಕವಾಗಿ ಮಿಶ್ರಣ ಮಾಡಿದ ಅರಿಶಿನ ಹೆಚ್ಚುತ್ತಿರುವುದು ಗಂಭೀರ ಆತಂಕಕ್ಕೆ ಕಾರಣವಾಗಿದೆ.
ಅನೇಕ ಮನೆಗಳಲ್ಲಿ ಇನ್ನೂ ಪ್ಯಾಕೆಟ್ ಬ್ರ್ಯಾಂಡ್ಗಳಿಗಿಂತ ಸ್ಥಳೀಯ ಅಂಗಡಿಗಳಿಂದ ಸಡಿಲವಾಗಿ(ಲೂಸ್ ಪೌಡರ್) ದೊರೆಯುವ ಅರಿಶಿನವನ್ನು ಬಳಸಲಾಗುತ್ತದೆ. ಆದರೆ, ಇಂತಹ ಉತ್ಪನ್ನಗಳಲ್ಲಿ ಕೆಲವೊಮ್ಮೆ ಬಣ್ಣ ಹೆಚ್ಚಿಸಲು, ತೂಕ ಹೆಚ್ಚಿಸಲು ಅಥವಾ ಕಡಿಮೆ ವೆಚ್ಚದಲ್ಲಿ ಹೆಚ್ಚು ಲಾಭ ಪಡೆಯಲು ರಾಸಾಯನಿಕಗಳು, ಕೃತಕ ಬಣ್ಣಗಳು ಅಥವಾ ಇತರ ವಸ್ತುಗಳನ್ನು ಮಿಶ್ರಣ ಮಾಡುವ ಸಾಧ್ಯತೆ ಇದೆ.
ಇಂತಹ ಅಶುದ್ಧ ಅರಿಶಿನವನ್ನು ಅಡುಗೆಯಲ್ಲಿ ಬಳಸುವುದರಿಂದ ಮಾತ್ರವಲ್ಲದೆ, ದೇಹಕ್ಕೆ ಹಚ್ಚಿದಾಗಲೂ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು. ಕೆಲವರಿಗೆ ಚರ್ಮದ ಮೇಲೆ ತೀವ್ರ ಉರಿ, ಕೆಂಪು ಚುಕ್ಕೆಗಳು, ಖಜ್ಜಳಿ ಅಥವಾ ಊತ ಉಂಟಾಗಬಹುದು.
ಇದು ಸಾಮಾನ್ಯವಾಗಿ ರಾಸಾಯನಿಕ ಮಿಶ್ರಣ ಅಥವಾ ಕಡಿಮೆ ಗುಣಮಟ್ಟದ ವಸ್ತುಗಳಿಂದ ಉಂಟಾಗುವ ಅಲರ್ಜಿಕ್ ಪ್ರತಿಕ್ರಿಯೆಯಾಗಿರಬಹುದು. ಇಂತಹ ಸಮಸ್ಯೆಗಳು ಕೆಲವೊಮ್ಮೆ ಸಣ್ಣ ಮಟ್ಟದಲ್ಲಿ ಆರಂಭವಾದರೂ, ನಿರಂತರ ಸಂಪರ್ಕದಿಂದ ಗಂಭೀರ ಚರ್ಮದ ಸಮಸ್ಯೆಗಳಿಗೆ ಕಾರಣವಾಗಬಹುದು.
ಅದಕ್ಕಾಗಿ ಮನೆಗೆ ತಂದಿರುವ ಅರಿಶಿನ ಶುದ್ಧವೇ ಅಥವಾ ಮಿಶ್ರಿತವೇ ಎಂಬುದನ್ನು ಗುರುತಿಸುವುದು ಬಹಳ ಅಗತ್ಯವಾಗಿದೆ. ಇದನ್ನು ತಿಳಿಯಲು ಕೆಲ ಸರಳ ಮನೆಮಟ್ಟದ ಪರೀಕ್ಷೆಗಳನ್ನು ಮಾಡಬಹುದು.
ಉದಾಹರಣೆಗೆ ಬಣ್ಣ ಪರೀಕ್ಷೆಯಲ್ಲಿ ಶುದ್ಧ ಅರಿಶಿನವು ಗಾಢ ಹಳದಿ ಅಥವಾ ಬಂಗಾರದ ಬಣ್ಣ ಹೊಂದಿರುತ್ತದೆ. ಬಿಳಿ ಕಾಗದದ ಮೇಲೆ ಇಟ್ಟಾಗ ಅದು ಸಮಾನವಾದ ಹಳದಿ ಬಣ್ಣವನ್ನು ನೀಡುತ್ತದೆ. ಆದರೆ, ಮಿಶ್ರಿತ ಅರಿಶಿನದಲ್ಲಿ ಬಣ್ಣ ಅಸಮತೋಲನವಾಗಿರಬಹುದು ಅಥವಾ ಅತಿಯಾಗಿ ಹೊಳೆಯುವ ಕೃತಕ ಹಳದಿ ಬಣ್ಣ ಕಾಣಬಹುದು, ಇದು ಸಂಶಯಾಸ್ಪದವಾಗಿರುತ್ತದೆ.
ಮತ್ತೊಂದು ವಿಧಾನವೆಂದರೆ ಕೈಯಲ್ಲಿ ಉಜ್ಜುವ ಪರೀಕ್ಷೆ. ಶುದ್ಧ ಅರಿಶಿನ ಕೈಗೆ ಸ್ಪಷ್ಟ ಹಳದಿ ಬಣ್ಣವನ್ನು ನೀಡುತ್ತದೆ ಮತ್ತು ಸ್ವಲ್ಪ ಅಂಟಿಕೊಳ್ಳುತ್ತದೆ. ಆದರೆ, ಅಶುದ್ಧ ಅರಿಶಿನದಲ್ಲಿ ಬಣ್ಣ ತುಂಬಾ ಕಡಿಮೆ ಇರಬಹುದು ಅಥವಾ ಪುಡಿ ಸುಲಭವಾಗಿ ಕೈಯಿಂದ ಜಾರಿಬೀಳಬಹುದು. ಇದು ಅದರಲ್ಲಿ ಇರುವ ಮಿಶ್ರಣಗಳ ಸೂಚನೆಯಾಗಿರಬಹುದು.
ನೀರಿನಲ್ಲಿ ಮಾಡುವ ಪರೀಕ್ಷೆಯಲ್ಲಿಯೂ ಅರಿಶಿನದ ಗುಣಮಟ್ಟವನ್ನು ಗುರುತಿಸಬಹುದು. ಒಂದು ಗ್ಲಾಸ್ ನೀರಿಗೆ ಅರಿಶಿನ ಹಾಕಿ ಕದಲಿಸದೆ ಇಟ್ಟರೆ, ಶುದ್ಧ ಅರಿಶಿನ ನಿಧಾನವಾಗಿ ಕೆಳಗೆ ಕುಳಿತುಕೊಳ್ಳುತ್ತದೆ ಮತ್ತು ನೀರು ಹಳದಿ ಬಣ್ಣ ಪಡೆಯುತ್ತದೆ. ಆದರೆ, ಮಿಶ್ರಿತ ಅರಿಶಿನದಲ್ಲಿ ಪುಡಿ ನೀರಿನ ಮೇಲೆ ತೇಲಬಹುದು ಅಥವಾ ನೀರಿನ ಬಣ್ಣ ಅಸಹಜವಾಗಿ ಬದಲಾಗಬಹುದು.
ವಾಸನೆ ಪರೀಕ್ಷೆಯೂ ಸಹ ಸಹಾಯಕವಾಗಿದೆ. ಶುದ್ಧ ಅರಿಶಿನದಲ್ಲಿ ಸಹಜವಾದ ಭೂಮಿಯ ಸುವಾಸನೆ ಇರುತ್ತದೆ. ಆದರೆ, ರಾಸಾಯನಿಕ ಮಿಶ್ರಣವಿದ್ದರೆ ವಾಸನೆ ಕಡಿಮೆ ಆಗಿರಬಹುದು ಅಥವಾ ಅಸಹಜವಾದ/ಕೆಮಿಕಲ್ (ರಾಸಾಯನಿಕ) ಕಾಣಿಸಬಹುದು.
ಕೆಲ ಸಂದರ್ಭಗಳಲ್ಲಿ ನಿಂಬೆ ರಸ ಬಳಸಿ ಪರೀಕ್ಷೆ ಮಾಡಲಾಗುತ್ತದೆ. ಅರಿಶಿನವನ್ನು ನೀರಿನಲ್ಲಿ ಹಾಕಿ ನಿಂಬೆ ಹನಿ ಸೇರಿಸಿದಾಗ ಯಾವುದೇ ಪ್ರತಿಕ್ರಿಯೆ ಇಲ್ಲದಿದ್ದರೆ ಅದು ಶುದ್ಧವಾಗಿರಬಹುದು ಎಂದು ಹೇಳಲಾಗುತ್ತದೆ. ಆದರೆ, ಬಬಲ್ಸ್, ಫಿಜ್ ಅಥವಾ ಅಸಹಜ ಪ್ರತಿಕ್ರಿಯೆ ಕಂಡುಬಂದರೆ ಅದು ಮಿಶ್ರಣ ಹೊಂದಿರುವ ಸಾಧ್ಯತೆ ಇದೆ ಎಂದು ಸೂಚಿಸುತ್ತದೆ.
ಈ ಎಲ್ಲಾ ವಿಧಾನಗಳು ಮನೆಯ ಮಟ್ಟದಲ್ಲಿ ಪ್ರಾಥಮಿಕ ಪರಿಶೀಲನೆಗೆ ಸಹಾಯಕವಾಗಿದ್ದರೂ, ಸಂಪೂರ್ಣ ಖಚಿತತೆಗೆ ನಂಬಲರ್ಹ ಬ್ರ್ಯಾಂಡ್ಗಳ ಅರಿಶಿನವನ್ನು ಖರೀದಿಸುವುದು ಅತ್ಯಂತ ಸುರಕ್ಷಿತವಾಗಿದೆ.
ಆಹಾರ ಸುರಕ್ಷತೆ ಮತ್ತು ಆರೋಗ್ಯದ ದೃಷ್ಟಿಯಿಂದ ಶುದ್ಧ ಉತ್ಪನ್ನಗಳನ್ನು ಆಯ್ಕೆ ಮಾಡುವುದು ಹಾಗೂ ಸಂಶಯಾಸ್ಪದ ವಸ್ತುಗಳನ್ನು ಬಳಸುವುದನ್ನು ತಪ್ಪಿಸುವುದು ಬಹಳ ಮುಖ್ಯವಾಗಿದೆ.