ಶ್ರೀನಗರ: ವೆಚ್ಚ ಕಡಿತ ತಂತ್ರಗಳಿಗೆ ಮೊರೆ ಹೋಗುತ್ತಿರುವ ಕೇಂದ್ರ, ಈಗ ರಾಜ್ಯ ಸರ್ಕಾರಗಳಿಗೆ ನೀಡುವ ಅನುದಾನಕ್ಕೂ ಕತ್ತರಿ ಹಾಕುವ ಸೂಚನೆ ನೀಡಿದೆ. ಅಭಿವೃದ್ಧಿ ಹಾಗೂ ಇತರೆ ಯೋಜನೆಗಳಿಗೆ ರಾಜ್ಯಗಳು ಸ್ವಂತ ಆದಾಯ ಮೂಲಗಳನ್ನು ಸೃಷ್ಟಿಸಿಕೊಳ್ಳಬೇಕೆಂದು ವಿತ್ತ ಸಚಿವ ಅರುಣ್ ಜೇಟ್ಲಿ ಹೇಳಿದ್ದಾರೆ.
ಬಜೆಟ್ ಮಂಡನೆಗೆ ಸಿದ್ಧತೆ ನಡೆಸುತ್ತಿರುವ ಜೇಟ್ಲಿ ಅವರಿಂದ ಈ ರೀತಿಯ ಹೇಳಿಕೆ ಹೊರ ಬಿದ್ದಿರುವುದು ಆದಾಯ ಸಂಗ್ರಹಿಸಲು ಒದ್ದಾಡುತ್ತಿರುವ ರಾಜ್ಯಗಳಿಗೆ ತಲೆನೋವು ತಂದಿದೆ.
ರಾಜ್ಯಗಳ ಕೇವಲ ಸರ್ಕಾರ ನಡೆಸುವ ಹಾಗೂ ಕೇಂದ್ರ ಅಗತ್ಯ ಸಂಪನ್ಮೂಲ ಒದಗಿಸುವ ದಿನಗಳು ಹೋದವು. ಈಗ ರಾಜ್ಯಗಳು ತಮ್ಮ ಕಾಲ ಮೇಲೆ ನಿಲ್ಲಬೇಕು. ರಾಜ್ಯಗಳ ಆರ್ಥಿಕತೆ ಹೂಡಿಕೆಯನ್ನು ಅವಲಂಬಿಸಿದೆ. ಹೂಡಿಕೆದಾರರು ಲಾಭವನ್ನು ನಿರೀಕ್ಷಿಸುತ್ತಾರೆ ನಿಜ. ಅದರ ಜತೆಗೆ ಉದ್ಯೋಗ ಸೃಷ್ಟಿಸುತ್ತಾರೆ, ತೆರಿಗೆಯನ್ನೂ ಪಾವತಿಸುತ್ತಾರೆ. ರಾಜ್ಯ ಸರ್ಕಾರಗಳು ಈ ಮೂಲಕ ಗಳಿಸುವ ಆದಾಯವನ್ನು ಅಭಿವೃದ್ಧಿಗೆ ಹಾಗೂ ಬಡವರ ಕಲ್ಯಾಣ ಯೋಜನೆಗಳಿಗೆ ವಿನಿಯೋಗಿಸಬಹುದು.
